Pajlug 22:16
Nqe cim:
“Yog Koj muab khoom pub rau cov neeg npluanuj lossis quab yuam cov pluag kom Koj npluanuj ces Koj yuav txomnyem” (Pajlug 22:16 HWB)
Peb saib hauv phau txhais tshiab 2004
“Tus uas quab yuam tej pluag thiaj tau nyiaj txiag ntau thiab pub rau cov uas nplua nuj mas nws yuav rov pluag xwb.” (Pajlug 22:16 HMOWSV)
Lus nug rau sawvdaws xav:
– Vim li cas muab khoom pub rau tus neeg npluanuj, tus neeg muab khoom pub yuav dhau ua neeg pluag?
– Nqe Pajlug no qhia pom kev tsis ncaj ncees ntawm tibneeg txhua tus li cas?
– Vim li cas cov ntseeg yuavtsum coj ncaj ncees?
Pajlug 22:16 hais txog kev coj tsis ncaj ntawm tus neeg tsis ncaj ncees. Tagnrho ob qhov no yog quab yuam cov neeg pluag ua kom yus npluanuj thiab xiab khoom rau cov neeg npluanuj, puavleej ua tshwm kev txhaum. Quab yuam tsim txom cov neeg pluag yog txoj kev ua neej tsis muaj kev hlub, tsis muaj kev ncaj ncees hauv kev ua neej. Muab khoom rau tus neeg npluanuj tsis yog vim kev hlub tiamsis yog khoom xiab xwb. Ntawd yog ib qhov tsis muaj kev ncaj ncees li, yog vim li cas twb tsimnyog pab tus neeg pluag txomnyem uas cheemtsum kev pab, tiamsis ho nqa nyiaj, khoom qhov txhia chaw mus pub rau tus neeg npluanuj kom nriav tau ib yam kev pab twg rau tus kheej. Yog li ntawd, nqe pajlug no thiaj piav txog ib tus neeg – nrog lwm tus ua tes haujlwm quab yuam, tsim txom tus neeg pluag kom yus npluanuj, ces yuav siv cov nyiaj yus tau ntawd xiab rau tus neeg npluanuj kom yus nrov npe thiab tau txhua yam uas yus ntshaw tsis ncaj ncees. Tes haujlwm ua mus ua los ntawd yuav raug rhuav puastsuaj, tus tub tshawb fawb kev totaub Vajtswv Derek Kidner qhia meej tias vim li cas: “Quab yuam tus neeg pluag ua kom npluanuj rau Koj, thiab siv cov nyiaj ntawm tus neeg pluag muab pub rau tus neeg npluanuj, tsis ntev xwb, tus neeg npluanuj yuav taij ntau dua ntxiv, ces yuav ua rau Koj pluag mus”. Nqe Pajlug no thiaj xaus lus hais tias txhua tus uas quab yuam lwm tus, lawv yeej yuav raug rov zeem paub hais tias lawv yog ib tug tabtom raug quab yuam thiab!
Mloog dhau qhov no pom tsis muaj kev ncaj ncees li, tsis tsimnyog ib tus neeg pluag raug quab yuam cia luag yuav nws tej nyiaj coj mus pub rau cov neeg npluanuj, tiamsis qhov no tseem pheej muaj tshwm rau hauv kev ua neej. Ntau lub chaw ua haujlwm tau them nyiaj ntau kawg rau cov thawj uas muaj hwjchim, tiamsis ho muab cov neeg ua zog tau nyiaj hlis tsawg tsawg txo kom tsawg ntxiv. Txaus tu siab tshaj qhov ntawd, muaj ib txhia yog neeg pluag txomnyem ua zog xwb los muaj tej thaum lawv tseem siv yus cov nyiaj tsawg tsawg coj mus pub, mus xiab kom yuav tau lwm tus lub siab. Vajtswv cov menyuam yuavtsum coj ncaj ncees, dawbhuv rau hauv kev hlub. Ua neej ncaj ncees tej thaum yuav raug swb, raug thuam tiamsis cov ntseeg tuag nthi tsis ua neej raws li qhov uas tibneeg ntiajteb ua “txhawb saum, txo hauv” los nrhiav kev muaj txiag npluanuj rau yus. Vajtswv Txojlus hais tias: “ Nej tsis txhob nyias xam pom nyias tus kheej xwb yuav tsum xam pom lwm tus thiab” (Filipis 2:4 HMOWSV). Thov Vajtswv pab peb txhua tus ua neej ncaj ncees, xam pom peb tus kheej, tsev neeg thiab kuj yuavtsum xam pom lwm tus txawm yog pluag thiab txom nyem huv tibsi.
Thov Vajtswv:
Tus Tswv, nyuam yaus ua Koj tsaug uas Koj tau qhia nyuam yaus ua neej ncaj ncees rau txhua lub sijhawm. Thov pab nyuam yaus ntseeg ruaj khov rau Koj txoj kev tiv thaiv thiab txeev ua neej coj ncaj ncees. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb coj cwjpwm nrog rau cov neeg pluag thiab cov neeg npluanuj li cas?
Nyeem Vajluskub hauv peb lub xyoos: Cov Thawjtswj 8
Kênh Youtube BHKTHN:
