Klei Aê Diê Blŭ: Klei Bi Hriêng 22:16
Êlan kliăng: “Hlei pô ktư̆ juă mnuih ƀun ƀin čiăng bi mdrŏng ñu pô, leh anăn hlei pô brei ngăn sun kơ mnuih mdrŏng jih dua srăng truh kơ klei kƀah sơăi.” (Klei Bi Hriêng 22:16)
Klei êmuh ksiêm mĭn: Ya ngă brei ngăn sun kơ phung mdrŏng, mnuih brei srăng jing kƀah? Êlan Klei Bi Hriêng brei ƀuh si klei mdê hlăm ala ƀuôn? Ya ngă phung đăo brei hdĭp kpă ênô?
Klei Bi Hriêng 22:16 lač kơ klei hdĭp amâo kpă ênô phung amâo kpă ênô. Jih dua bruă ngă ktư̆ juă phung ƀun čiăng đĭ kơ mdrŏng leh anăn brei ngăn sun kơ phung mdrŏng srăng ba kơ klei soh sơăi. Ktư̆ juă, ngă jhat kơ phung ƀun jing knuih hdĭp amâo mâo klei khăp, amâo kpă ênô hlăm ala ƀuôn. Brei ngăn sun kơ phung mdrŏng amâo djŏ kyua klei khăp ôh ƀiădah čiăng sun ngăn. Sa klei mdê tinei jing hrô kơ đru phung ƀun ƀin kƀah jing phung čiăng snăk klei đru snăn lŏ ba prăk mah brei kơ phung mdrŏng mâo êbeh dlai čiăng duah klei tŭ dưn kơ pô. Kyua anăn, êlan Klei Bi Hriêng anei yua klei blŭ mưč mač čiăng lač kơ sa čô mnuih – sa čô tal êlâo hĭn ktư̆ juă, ngă jhat kơ phung ƀun ƀin čiăng bi mdrŏng kơ pô, leh anăn yua prăk anăn brei ngăn sun kơ phung mdrŏng čiăng blei thiăm klei hmăi leh anăn klei tŭ dưn amâo kpă ênô. Hdră bruă ngă anăn srăng bi kruh, pô ksiêm hriăm Klei Aê Diê Blŭ Derek Kidner mblang ya ngă phung ngă snăn srăng kƀah: “Ktư̆ juă phung ƀun čiăng bi mdrŏng kơ ih, leh anăn yua prăk phung ƀun brei ngăn sun kơ phung mdrŏng, amâo sui ôh, klei phung mdrŏng čiăng srăng đĭ hĭn mơh, ngă kơ ih jing ƀun hĭn”. Êlan Klei Bi Hriêng klah čŭn phung ktư̆ juă phung mkăn srăng mdih tơdah ƀuh diñu pô jing leh sa hlăm phung dôk tŭ klei arăng ktư̆ juă!
Sa klei hmư̆ jing mdê snăk tơdah phung ƀun tŭ klei arăng ktư̆ juă arăng mă prăk brei kơ phung mdrŏng, ƀiădah klei anei ăt khăng mâo hlăm klei hdĭp. Lu knơ̆ng bruă tla leh lu prăk kơ khua gĭt gai čiăng mâo klei dưi, ƀiădah lŏ kpĭ hĕ prăk mlan ƀiă snăk kơ phung mă bruă. Ênguôt hĭn jing phung mă bruă ƀun ƀin tăp năng lŏ yua prăk ƀiă adôk čiăng brei mnơ̆ng, brei ngăn sun čiăng mă ai khua. Phung ƀuôn sang Aê Diê brei hdĭp kpă ênô, djŏ hlăm klei khăp. Hdĭp kpă ênô tăp năng srăng tlă anăp hŏng klei amâo myun, arăng mưč mač, ƀiădah phung đăo amâo dưi hdĭp hlue si mnuih ti lăn ala anei ôh, “Ti dlông đua, ti gŭ juă” čiăng duah klei mdrŏng sah, hing ang kơ pô. Klei Aê Diê Blŭ lač: “Klei kâo blŭ leh anăn klei kâo mtô amâo djŏ hŏng klei blŭ thâo mĭn mnuih ôh, ƀiădah hŏng klei Yang Mngăt Jăk bi êdah leh anăn hŏng klei myang Aê Diê” (Philip 2:4). Akâo kơ Khua Yang đru grăp čô drei hdĭp kpă ênô, mđing kơ drei pô, gŏ sang, ƀiădah ăt mđing mơh klei dưi kơ phung mkăn wăt tơdah digơ̆ ƀun ƀin amâodah mdrŏng sah.
Si drei hdĭp leh hŏng phung ƀun ƀin leh anăn mdrŏng sah?
Wah lač: Ơ Aê Diê, kâo bi mni kơ Ama mtô leh kâo hdĭp kpă ênô hlăm djăp boh klei. Akâo kơ Ih đru kâo đăo kjăp hlăm klei Ama hlăm adiê răng mgang, hơêč hmưi hdĭp kpă ênô. Akâo kơ Ih đru kâo hdĭp thâo khăp, thâo kah mbha prăk mah kơ phung ƀun ƀin, leh anăn đru digơ̆ hlăm klei hdĭp grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
