2 Kevcai 31:1-8
Nqe cim:
“Tus TSWV uas yog nej tus Vajtswv yuav mus ua nej ntej thiab nws yuav tua txhua haivneeg uas nyob tid, … raws li tus TSWV tau hais tseg lawm.” (2Kevcai 31:3)
Lus nug rau sawvdaws xav:
– Ua ntej mus nrog Vajtswv nyob Mauxes hais rau cov Yixalayees yam dab tsi?
– Yam uas Mauxes xav ua dua hauv nws lub neej yuav xaus yog dab tsi?
– Mauxes tej lus hais tseg tus qauv twg rau txhua tus uas ua Vajtswv haujlwm?
Txij tshooj 31 mus tas phau ntawv 2 Kevcai yog sau txog qhov uas Mauxes muab lub meejmom coj Vajtswv haivneeg rau Yausuas, thiab yog Mauxes tej lus kawg rau Vajtswv haivneeg. Lolus “Kuv yuav mus mus los los tsis taus lawm” (nqe 2) yog hais txog lub meejmom coj Vajtswv haivneeg, tsis yog lub dag zog, vim thaum Mauxes tuag, nws qhov muag tseem pom kev zoo, nws lub zog kuj tsis ntaug (2 Kevcai 34:7). Ntu no yog tej lus zoo kawg nkaus ntawm ib tus thawjcoj laus uas muaj ib puas nees nkaum xyoo, ua ntej yuav tuag, nws tsis hais tej lus phem, lus yws, tsis taij ib yam dab tsis rau yus, tiamsis nws txhawb txhua tiam uas nyob tom qab zog kom yuavtsum muaj lub siab tawv, ntseeg ruaj rau ntawm Vajtswv tus uas yuav coj lawv hla dhau tus Dej Yauladees dhau los ntawm Yausuas tus uas hloov nws chaw coj kev.
Mauxes yog ib tug thawjcoj yug los thiab tuag nrog rau ob peb tiam neeg ntawm cov Yixalayees, ib ntsug kev deb plaub caug xyoos mus rau tebchaws coglus. Tiamsis nws tsis tau nrog Vajtswv haivneeg rhais ruam mus txog hauv lub tebchaws av rog ntawd, tsuas yog tau tuaj deb deb saib pom xwb. Tiamsis ntawd tsis yog yam uas Mauxes chim thiab yws Vajtswv, yws Nws haiv neeg, nws txaus siab ua raws li Vajtswv siab nyiam. Yam uas Mauxes xav ua rau lub sijhawm xaus nws lub neej yog txhawb Vajtswv haivneeg kom muaj lub siab tawv, muab siab npuab Vajtswv thiab ua raws li tus thawjcoj coj kev thiaj li yuav hla dhau tus Dej Yauladees mus rau sab tid, lub tebchaws uas Vajtswv coglus rau lawv cov yawgkoob lawd. Mauxes, yog tus thawjcoj laus muaj ib puas nees nkaum xyoo yuav xaus nws lub neej los tseem ncaj ncees ua neej raws li Vajtswv hu, ua neej vim pab yaj uas Vajtswv cob tsis yog vim nws tus kheej.
Thaum uas tig mus saib Mauxes lub neej, peb pom Vajtswv kev npaj tseg rau Mauxes thiab Vajtswv haivneeg zoo kawg nkaus. Vajtswv cawm Mauxes tawm hauv dej los thiab cob qhia hauv vajntxwv Iziv lub loog 40 xyoo, tom qab ntawd Vajtswv siv qhov uas Mauxes tua yuam kev ib tug neeg Iziv thiab rov cob qhia nws 40 xyoo rau tom tiaj suab puam. Thaum txog lub sijhawm lawm Vajtswv hu Mauxes, txawm yog ntau zaus Mauxes tsis kam teb Vajtswv tiamsis Vajtswv ua kom Mauxes yuavtsum mloog Vajtswv lus thiab cob feem xyuas rau nws mus cawm Vajtswv haivneeg tawm hauv tebchaws Iziv los. Thaum no, tuaj deb deb saib pom lub tebchaws uas Vajtswv coglus, tsis tau rhais ruam mus rau hauv tiamsis Mauxes kev ntseeg Vajtswv tseem khov kho li qub. Mauxes tej lus uas xaus rau hauv nws lub neej tseg tau ib tug qauv mloog Vajtswv lus txaus nkaus, hnov qab yus tus kheej, tu txhawj rau Vajtswv pab yaj. Thov Vajtswv pab kom peb txhua tus xyaum tau Mauxes tus qauv ncaj ncees rau Vajtswv mus txog hnub kawg.
Thov Vajtswv:
Vajtswv, thov pab nyuam yaus xyaum tau raws li Mauxes tus qauv, thiab txawm lub neej yuav zoo li cas los kom nyuam yaus ncaj ncees nrog Koj mus, paub hnov qab tus kheej tseg, tu thiab saib xyuas txhua tus kwvtij ntseeg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Mauxes tus qauv txhawb peb zog li cas?
Nyeem Vajluskub hauv peb lub xyoos: Cov Thawjtswj 6
Kênh Youtube BHKTHN:
