Klei Aê Diê Blŭ: Klei Mtô Mñă Klei Bhiăn 31:1-8
Êlan kliăng: “Yêhôwa, Aê Diê diih, ñu pô srăng êbat găn êa krông ti anăp diih; ñu srăng bi rai phung găp djuê anei ti anăp ih, snăn diih srăng mă bha ala čar diñu; leh anăn Y-Yôsuê srăng găn êlâo jing khua diih, tui si Yêhôwa blŭ leh” (Klei Mtô Mñă Klei Bhiăn 31:3)
Klei êmuh ksiêm mĭn: Êlâo kơ wĭt hŏng Khua Yang, ya klei Y-Môis lač hŏng phung ƀuôn sang Israel? Ya klei ñu mđing hĭn hlăm dŭm hruê knhal jih klei hdĭp ñu? Si klei mĭn Y-Môis bi hmô kơ phung mă bruă kơ Aê Diê?
Mơ̆ng kdrêč 31 truh jih hdruôm hră Klei Mtô Mñă Klei Bhiăn čih boh phŭn Y-Môis jao klei dưi kiă kriê phung ƀuôn sang Aê Diê kơ Y-Yôsuê, leh anăn dŭm klei čih bi ktlah ñu hŏng phung ƀuôn sang Aê Diê. Boh blŭ “amâo lŏ dưi kbiă leh anăn mŭt ôh” (êlan 2) lač kơ bruă ngă pô kiă kriê amâo djŏ klei suaih pral ôh, kyua tơdah djiê, ală Y-Môis amâo jing awăt ôh, kăn klei mơai gơ̆ hrŏ rei (Klei Mtô Mñă Klei Bhiăn 34:7). Anei jing trăn Klei Aê Diê Blŭ mgei ai tiê snăk mơ̆ng khua gĭt gai sa êtuh dua pluh thŭn, êlâo kơ djiê amâo blŭ klei ênguôt hnĭng, suăi êmăn ôh, amâo mâo ya klei čiăng kơ hjăn pô ôh, ƀiădah ñu amâo mdei mđĭ ai ênuk êdei brei jhŏng leh anăn ktang, đăo kơ Aê Diê jing Pô srăng atăt gai diñu găn êa krông Yurdan, ti gŭ klei atăt gai mơ̆ng pô lŏ čuê ñu jing Y-Yôsuê.
Y-Môis jing sa čô khua gĭt gai mâo lu blư̆ djiê hdĭp hŏng dŭm gưl ênuk phung ƀuôn sang Israel hlăm hdră pă pluh thŭn wĭt ti Lăn Aê Diê Ƀuăn. Ƀiădah ñu amâo dưi mbĭt hŏng phung ƀuôn sang Aê Diê mŭt hlăm lăn jăk siam anăn ôh, knŏng dưi dlăng mơ̆ng kbưi. Ƀiădah anei amâo djŏ jing klei Y-Môis ênguôt hnĭng leh anăn ƀuah Aê Diê, ƀuah phung ƀuôn sang Ñu ôh ƀiădah ñu tŭ ư gưt asăp Aê Diê. Klei ñu mđing hlăm wưng knhal jih klei hdĭp jing mđĭ ai phung ƀuôn sang Ñu kjăp ai tiê klei mĭn, jih ai tiê đăo knang kơ Aê Diê, leh anăn hlue ngă klei atăt gai mơ̆ng pô gĭt gai mrâo tơdah găn êa krông Yurdan čiăng nao phă lăn Aê Diê ƀuăn brei kơ aê ama diñu. Y-Môis, khua gĭt gai khua thŭn sa êtuh dua pluh thŭn truh knhal jih klei hdĭp pô ăt sa ai tiê sĭt suôr gưt asăp Aê Diê, hdĭp kyua êpul biăp Aê Diê jao hĭn kơ klei tŭ dưn kơ pô.
Tơdah lŏ dlăng wĭt klei hdĭp Y- Môis, drei ƀuh hdră Aê Diê brei kơ ñu leh anăn phung ƀuôn sang Ñu jăk snăk. Mơ̆ng bruă Aê Diê bi mtlaih ñu mơ̆ng sa ala čar hŏng klei yuôm bhăn leh anăn mtô bi hriăm ñu hlăm sang mtao Êjip bŏ pă pluh thŭn, truh kơ bruă Aê Diê yua klei soh mdjiê phung Êjip mơ̆ng ñu čiăng lŏ dơ̆ng bi hriăm ñu thiăm pă pluh thŭn dơ̆ng hlăm kdrăn tač. Tơdah truh wưng kčah, Aê Diê iêô ñu, wăt tơdah ñu hngah kơ Aê Diê nanao, ƀiădah Aê Diê ăt bi hriăm ñu čiăng jao bruă bi mtlaih phung ƀuôn sang Ñu kbiă mơ̆ng Êjip. Ară anei, dlăng ƀuh Lăn Aê Diê Ƀuăn mơ̆ng kbưi, amâo dưi mŭt ôh ƀiădah klei Y-Môis đăo kơ Aê Diê ăt amâo hrŏ ôh. Dŭm klei blŭ knhal jih klei hdĭp ñu jing klei bi hmô gưt mă bruă kơ Aê Diê kluôm ênŭm leh anăn ai tiê wơr pô kriê dlăng kơ êpul biăp Aê Diê. Čang hmăng drei lŏ čuê ai tiê khua gĭt gai khua thŭn Y-Môis sĭt suôr mă bruă Aê Diê tơl jih klei hdĭp.
Si klei bi hmô Y-Môis mđĭ ai drei?
Wah lač: Ơ Khua Yang, bi mni kơ Ih kyua klei Y-Môis bi hmô sĭt suôr tui hlue Aê Diê. Akâo kơ Ih đru kâo wăt ya klei mâo dưn ăt sĭt suôr êbat mbĭt hŏng Ih, wơr pô čiăng kriê dlăng kơ klei tŭ dưn ayŏng adei pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
