Klei Aê Diê Blŭ: Y-Yakơ 1:9-11
Êlan kliăng: “Kyuadah ti anôk ngăn yuôm diih dôk, tinăn mơh ai tiê diih srăng dôk” (Y-Luk 12:34)
Klei êmuh ksiêm mĭn: Hlei pô jing “ƀun ƀin” leh anăn si ngă Y-Yakơ mtă kơ diñu? Si knuih hdĭp phung mdrŏng brei mâo? Wăt tơdah mdrŏng amâodah ƀun ƀin, ya klei yuôm bhăn hĭn brei mâo?
Hŏng klei mdê klă mngač plah wah dua êpul mnuih, boh blŭ mnuih “ƀun ƀin” lač kơ phung đăo ƀun ƀin dôk hdĭp lar bra djăp anôk. Y-Yakơ mtă kơ diñu “thâo mơak hlăm klei Aê Diê mđĭ diñu”. Năng ai drei čiăng êmuh phung ƀun ƀin snăn mâo ya bruă yuôm bhăn? Lač kơ prăk mah, mnơ̆ng dhơ̆ng, klei dưi, klei hing ang, diñu jing phung ƀun ƀin. Ƀiădah jing anak Aê Diê jing anôk yuôm bhăn hĭn amâo mâo mnơ̆ng dưi mkă ôh, kyua msĕ si Khua Yang Yêsu lač, “Kyuadah ya tŭ dưn tơdah sa čô mnuih mâo jih lăn ala, ƀiădah luč hĕ mngăt ñu? (Y-Markôs 8:36). Dưi jing anak Aê Diê yuôm hĭn lu mkă hŏng mâo jih lăn ala anei. Snăn ya mta ngă kơ drei ktưn hưn, hơ̆k mơak leh anăn hrăp ai tiê kơ klei yuôm bhăn anăn?
Hlăm ênoh phung đăo mâo Y-Yakơ čih hră, ăt mâo đa đa phung mdrŏng, leh anăn ñu mtô digơ̆ “thâo mơak hlăm klei Aê Diê bi mtrŭn diñu”. Čiăng mblang “bi mtrŭn” amâodah “anôk ti gŭ hĭn” mơ̆ng phung mdrŏng, Y-Yakơ lŏ lač, “kyuadah klei mdrŏng srăng êgao tuč msĕ si mnga rơ̆k…phung mdrŏng srăng rai tuč hlăm bruă diñu ngă”. Klei hdĭp knŏng jing êjai, pral tuč, snăn prăk mah mâo lu ya pioh ngă tơdah mgi dih djiê hĕ dưi ba mbĭt mơ̆? Mâo đa đa phung mdrŏng sah duah blei êa drao dưi hdĭp hlŏng lar ƀiădah anăn knŏng jing klei bi mĭn đuč. Hlue si klei anak mnuih ƀuh, anăn jing klei amâo myun, “bi mtrŭn”, ƀiădah hlăm klei hdĭp mngăt, Y-Yakơ mtô klei hdĭp anak mnuih pral đuĕ lŏ jing klei phung mdrŏng brei thâo mpŭ, ktưn hưn. Kyua klei anăn đru kơ diñu hdĭp hŏng klei ƀuh djŏ, klei ƀuh mơ̆ng jih klei hdĭp hlŏng lar amâo djŏ knŏng kƀĭn hlăm klei hdĭp jing êjai ti lăn ala anei ôh.
Tơdah hdĭp hŏng klei ƀuh kơ klei hdĭp hlŏng lar, wăt tơdah drei kƀah mnơ̆ng dhơ̆ng dưn ăt kăn ênguôt hnĭng rei, kăn luč klei čang hmăng mơh; Wăt tơdah mâo lu prăk mah ăt kăn hiu hưn, ngă mgao rei. Snăn bruă klă sĭt yuôm bhăn amâo djŏ jing mdrŏng amâodah ƀun ôh, ƀiădah jing hdĭp kơ klei hdĭp lăn ala anei amâodah klei hdĭp lă lar msĕ si Klei Khua Yang Yêsu mtô: “Kyuadah ti anôk ngăn yuôm diih dôk, tinăn mơh ai tiê diih srăng dôk” (Y-Luk 12:34). Akâo kơ Khua Yang đru drei hdĭp kơ klei hdĭp lă lar hŏng klei duh kơ bi mguôp hŏng Khua Yang kyua klei đăo, leh anăn bi êdah klei đăo anăn hlăm knuih hdĭp grăp hruê hlăm bruă gưt hlue si Klei Aê Diê Blŭ mtô msĕ si mnuih thâo mĭn mdơ̆ng sang pô ti dlông boh tâo, čiăng kơ klei hdĭp drei dôk kjăp nanao wăt tơdah tlă anăp hŏng djăp klei lông dlăng jŭm dar.
Drei dôk mkŏ mjing klei hdĭp pô mơ̆ng ênoh yuôm hlăm klei hdĭp ti lăn ala anei amâodah hlăm klei hdĭp lă lar?
Wah lač: Ơ Khua Yang, kâo bi mni kơ Ih kyua ênoh yuôm kâo ti anăp Ih amâo djŏ kyua prăk mah amâodah anôk dôk kâo mâo ôh, ƀiădah jing klei bi mguôp kâo hŏng Ih. Akâo kơ Ih đru kâo thâo luă gŭ leh anăn jih ai tiê tui duah Ih wăt tơdah dôk jing mdrŏng amâodah ƀun ƀin, leh anăn kâo ƀuăn knŏng mơak dôk hlăm Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
