Yakaunpaus 1:9-11
Nqe cim:
“Nej tej nyiaj txiag thiab qhov txhia chaw nyob qhov twg, nej lub siab yeej nyob qhov ntawd” (Lukas 12:34)
Lus nug rau sawvdaws xav:
– Tus uas“ua lub neej txom nyem” yog leejtwg thiab Yakaunpaus ntuas lawv li cas?
– Tus neeg npluanuj yuavtsum muaj tus cwjpwm li cas?
– Txawm pluag lossis npluanuj, yam tseemceeb tshaj peb yuavtsum muaj yog dab tsi?
Muaj kev sib txawv meej meej txog ntawm ob pab neeg, lolus ntawm “tus kwvtij ntseeg uas pluag” yog hais txog cov ntseeg pluag txomnyem uas khiav mus nyob rau qhov txhua chaw. Yakaunpaus ntuas lawv hais tias “nws yuav tsum zoo siab rau thaum Vajtswv tsa nws lub neej” Tej zaum peb yuav xav tsis thoob tus neeg pluag lub neej yuav sawv taus rau yam dab tsi? Yog hais txog nyiaj txiag, khoom qhov txhia chaw, hwjchim, koobmeej lawv yog cov uas tsis muaj dab tsi. Tiamsis Vajtswv cov menyuam yeej muaj lub meejmom siab tsis muaj ib yam dab tsi yuav piv tau, vim zoo li Tswv Yexus tau hais tseg “Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws? (Malakaus 8:36). Tau ua Vajtswv menyuam muaj nqis dua li tau tagnrho lub ntiajteb no. Yog li ntawd, puas muaj ib yam dab tsi uas yuav tav tau tsis pub peb qhuas, zoo siab thiab txaus siab rau lub meejmom ntawd?
Hauv cov ntseeg uas Yakaunpaus sau ntawv xa rau, muaj ib txhia kuj yog cov neeg npluanuj, Yakaunpaus qhia cov neeg npluanuj haistias “nws yuav tsum zoo siab rau thaum Vajtswv txo nws lub neej” rau qhov “cov neeg uas npluanuj yuav ploj mus ib yam li tej paj ntoos… tus uas npluanuj yuav raug kev puastsuaj thaum nws tseem tabtom ua nws tes haujlwm ntxhov hnyo”. Tibneeg ua neej tsuas yog ib pliag xwb yuav dhau mus sai sai, nyiaj txiag khoom qhov txhia chaw ntau, thaum tuag puas yuav coj tau mus? Muaj txhia neeg npluanuj ua nom ua tswv siv zog nrhiav tshuaj kho kom tsis txawj tuag, thiaj tau siv tej uas yus muaj tiamsis ntawd tsuas yog tej kev xav uas tsis muaj tseeb. “zoo siab rau thaum Vajtswv txo” raws li tibneeg pom mas ntawd yog kev poob nqis, tiamsis hauv sab ntsujplig mas raws li Yakaunpaus qhia rau tus neeg npluanuj “lub neej nyob ib nyuag pliag” yog qhov uas nws pom khuv xim thiab saib muaj nqis. Vim qhov ntawd pab rau lawv ua neej saib pom qhov yog, saib pom lub neej uas yuav nyob mus ib txhis, tsis yog tsuas saib pom lub neej nyob ib nyuag pliag no xwb.
Yog thaum uas ua neej saib pom txog lub neej yuav nyob mus ib txhis, txawm peb tsis muaj ib yam dab tsi los peb yeej tsis txaj muag, tsis tas kev cia siab; txawm yuav muaj nyiaj txiag khoom qhov txhia chaw los peb tsis khav tej uas yus muaj. Yog li ntawd, yam uas tseemceeb tshaj tsis yog pluag lossis npluanuj, tiamsis yog qhov uas ua neej rau lub neej uas yuav nyob mus ib txhis li Tswv Yexus qhia: “Nej tej nyiaj txiag thiab qhov txhia chaw nyob qhov twg, nej lub siab yeej nyob qhov ntawd” (Lukas 12:34). Thov Vajtswv pab peb ua neej rau lub neej uas yuav nyob mus ib txhis los ntawm qhov uas nqis peev sib txuas peb tus kheej nrog rau Vajtswv hauv kev ntseeg. Thiab qhia tshwm kev ntseeg hauv peb lub neej txhua hnub dhau los ntawm qhov uas mloog thiab ua raws li Vajtswv Txojlus qhia, zoo ib yam li tus muaj tswvyim ua tsev rau saum pobzeb, kom peb thiaj sawv ruaj khov rau tej kev sim siab uas nyob puag ncig peb.
Thov Vajtswv:
Vajtswv, nyuam yaus ua Koj tsaug, nyuam yaus muaj nqis tsis yog vim muaj nyiaj txiag khoom qhov txhia chaw lossis meejmom tiamsis yog qhov kev sib txuas ntawm nyuam yaus thiab Koj. Thov pab nyuam yaus paub txo hwjchim nrhiav Koj kawg siab kawg ntsws, txawm yog npluanuj, pluag los xij, thov cia nyuam yaus paub txaus siab rau Koj ib leeg xwb. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom npaj peb lub neej rau txoj kev muaj nqis ntawm lub neej tiam no lossis ntawm lub neej nyob mus ib txhis?
Nyeem Vajluskub hauv peb lub xyoos: Cov Thawjtswj 2
Kênh Youtube BHKTHN:
