Klei Aê Diê Blŭ: Y‑Mathiơ 18:7-9
Êlan kliăng: “Hlăk anăn ih srăng êbat êlan ih hŏng klei hơĭt, leh anăn jơ̆ng ih amâo srăng têč hnêč ôh.” (Klei Bi Hriêng 3:32)
Klei êmuh ksiêm mĭn: Ya rup Khua Yang Yêsu yua čiăng bi hmô kơ mta phŭn mplư phung khua ƀĭng kna ngă soh? Si knuih Ñu mtô brei ngă hŏng klei soh? Si drei yua klei mtô anei kơ pô?
Hlăm trăn Klei Aê Diê Blŭ anei, Khua Yang Yêsu lŏ dơ̆ng hưn brei răng kơ phung ƀĭng kna kơ klei huĭ hyưt mơ̆ng klei soh. Ñu yua rup “kngan” leh anăn “ală” čiăng bi hmô kơ hdră arăng srăng mplư phung khua ƀĭng kna lĕ hlăm klei soh, mơ̆ng anăn đru diñu thâo kơ boh jhat mơ̆ng klei soh čiăng mâo knuih khut khat. Năng ai diñu srăng ngă soh, êbat hlăm anôk soh jhat amâodah ƀuh leh anăn čiăng kơ klei soh. Khua Yang mtô phung khua ƀĭng kna brei khut khat amâodah lui jih hŏng dŭm mta phŭn ngă kơ diñu srăng ngă soh. Khua Yang dôk yua klei bi hmô tơdah Ñu lač kơ digơ̆ brei khăt hĕ kngan amâodah jơ̆ng amâodah ƀlêč hĕ asăr lă tơdah dŭm anôk anăn ngă kơ diñu lĕ hlăm klei soh. Khua Yang čiăng kơ diñu thâo kơ boh jhat mơ̆ng klei soh kjham snăk kyua arăng srăng hwiê diñu hlăm war pui lă lar.
Bruă Khua Yang Yêsu lŏ mñă kơ klei Ñu mtô leh kơ phung ƀĭng kna hlăm Y‑Mathiơ 5:29-30 brei drei ƀuh klei huĭ hyưt snăk mơ̆ng klei soh ăt msĕ mơh boh jhat kjham klei soh ba kơ anak mnuih. Khua Yang čiăng kơ diñu thâo klei soh tưp lar, đĭ lêč pral snăk, kyua anăn amâo dưi kĭ kơ̆ amâodah pŏk êlan ôh ƀiădah brei msir mgaih khut khat, hwiê ñu bi kbưi čiăng amâo lŏ hmăi amâodah mplư phung ƀĭng kna ngă soh ôh. Brei khăt bi tloh amâodah lăm lui dŭm anôk hlăm asei mlei čiăng lač kơ phung khua ƀĭng kna tŭ klei ruă knap, amâo myun, klei ruă êka hlăm ai tiê hlăk êjai msir mgaih klei soh pô.
Klei soh jing pô roh ktŭng drei hlăm war pui lă lar, kyua anăn grăp čô drei brei lŏ dlăng kơ drei pô dôk mâo mơ̆ ya klei mưng, ti anôk, ya klei mĭn, ya klei čiăng, amâodah klei bi mguôp dôk mčhur drei ngă soh. Brei drei khut khat lăm lui klei anăn mtam, tơdah amâo ngă snăn srăng huĭ hyưt snăk. Bruă lăm lui sa bruă, sa klei mưng amâodah sa anôk, amâodah klei khăp kơ klei soh amâo djŏ jing klei ênưih ôh ƀiădah brei drei srăng tŭ klei ruă čiăng lui ñu, khăt tloh klei soh anăn msĕ si khăt sa klŏ brŭ hlăm asei mlei pô. Klei Bi Hriêng 3:32 brei thâo Khua Yang bi êmut kheh kơ soh ƀiădah mjing găp hŏng mnuih kpă ênô. Drei amâo čiăng ôh pô jing pô roh hŏng Aê Diê ƀiădah čiăng kơ Ñu mjing găp hŏng drei, amâo čiăng ôh dôk ti war pui ƀiădah čiăng dôk ti ƀuôn ala mtao jăk mơak. Čiăng khut khat lui klei soh, drei amâo dưi ôh čŏng pô mâo klei dưi, ƀiădah knang kơ ai ktang Khua Yang, drei dưi kgŭ leh anăn khut khat hŏng klei soh (Rôm 7:24-25). Yuôm bhăn hĭn jing drei čiăng khut khat hŏng klei soh mơ̆ amâodah hơăi đuč.
Si knuih brei ngă hŏng klei soh? Khut khat lăm lui amâodah kĭ kơ̆?
Wah lač: Ơ Khua Yang, akâo kơ Ih mtrang čiăng kơ kâo thâo bruă ngă, ti anôk, ya klei čiăng dôk ngă kơ kâo ngă soh hŏng Ih. Akâo kơ Ih đru kâo jhŏng hưn lui klei soh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
