Mathais 18:7-9
Nqe cim:
“Rau qhov tus Tswv ntxub tej neeg uas ua phem ua qias, tiamsis nws txaus siab rau cov neeg ncaj ncees.” (Pajlug 3:32)
Lus nug rau sawvdaws xav:
– Tswv Yexus siv tus duab twg los piv txog qhov keebtiv ua rau lwm tus ua txhaum?
– Nws qhia kom yuav tsum muaj tus cwjpwm rau kev txhaum zoo li cas?
– Peb siv cov qhia no li rau yus?
Hauv ntu Vajluskub no, Tswv Yexus rov qab ceebtoom ntxiv rau cov thwjtim txog kev ua txhaum. Nws siv tus duab “tes”, “taw” thiab “qhovmuag” los piv txog qhov uas cov thwjtim yuav raug ntxias mus ua txhaum, piv li ntawd kom lawv zeem paub nqi zog ntawm txojkev txhaum komxwv lawv muaj tus cwjpwm txiav tu nrho. Lawv yuav ua txhaum, taug kev mus tej chaw ua txhaum lossis ntsia pom thiab ntshaw kev txhaum. Tus Tswv qhia kom cov thwjtim txiav tu nrho lossis tsis koom nrog tej keebtiv ua rau peb ua txhaum. Tus Tswv tabtom siv lub ntsiab pajlug thaum nws qhia kom lawv yuav tsum txiav tes, taw lossis kaus qhovmuag yog tias cov ntawd coj mus ua txhaum. Tus Tswv xav kom lawv zeem paub nqi zog ntawm txojkev txhaum txaus ntshai heev, rau qhov yuav raug muab pov rau hauv ntuj tawg mus ibtxhis.
Qhov uas tus Tswv rov hais txog yam uas Nws twb muab qhia rau cov thwjtim hauv Mathais 5:29-30 qhia rau peb paub tias kev txhaum txaus ntshai kawg nkaus li, nqi zog ua kev txhaum coj neeg mus puastsuaj. Tus Tswv xav kom lawv zeem paub kev txhaum kis, loj hlob sai heev, yog li tsis txhob yug kev txhaum lossis tos mam tiamsis cia li txiav tu nrho, muab nws pov kom deb thiaj tsis ua hiam lossis ntxias tau lawv ua txhaum. Qhov uas txiav lossis muab tej tes, taw, qhovmuag ntawm lub cev pov tseg muaj lub ntsiab qhia kom cov thwjtim yuav tsum nyiaj tej kev mob, poob thaum yus txiav txim rau kev txhaum.
Kev txhaum yog tus yeebncuab coj peb mus rau hauv ntuj tawg ibtxhis, yog li peb txhua tus yuav tsum tig saib tus kheej saib yus tabtom muaj cov kev nyiam ua twg, cov chaw twg, cov kev xav twg, cov kev ntshaw twg, lossis cov kev sib raug zoo twg tabtom ntxias peb mus ua txhaum. Peb yuav tau txiav tu nrho tej yam ntawd tamsim, yog tsis ua li yuav txaus ntshai kawg nkaus. Qhov uas tso ib qhov kev ua, ib qhov chaw, lossis tej kev nyiam mus tsis yog qhov yoojyim tiamsis peb yuav tsum txaus siab hlo tiv kev mob muab tso tseg, txiav tu nrho tej yam kev txhaum mus zoo li muab ib qhov mob txiav kiag povtseg hauv lub cev mus. Pajlug 3:32 qhia paub tus Tswv ntxub tej kev ua phem tiamsis Nws nrog neeg ncaj ncees ua phoojywg. Peb tsis xav kom yus ua yeebncuab rau Vajtswv tiamsis xav kom Nws ua phoojywg nrog peb, tsis xav nyob hauv ntuj tawg tiamsis xav mus nyob ntuj ceebtsheej kaj siab. Cia kom txiav tau tu nrho kev txhaum, peb tus kheej ua tsis tau, tiamsis yog vamkhom tus Tswv lub zog, peb sawv taus thiab txiav kev txhaum tu nrho (Loos 7:24-25). Qhov teebmeem yog saib peb puas xav txiav kev txhaum lossis tsis xav txiav xwb.
Thov Vajtswv,
Tus Tswv, thov Koj qhia kom nyuam yaus zeem paub tej haujlwm ua, chaw nyob, kev ntshaw twg tabtom ua rau nyuam yaus ua txhaum rau Koj. Thov Koj pab kom nyuam yaus muaj lub siab tawv qhawv hais tawm thiab tso tseg mus. Nyuam yaus tuav Tswv Yexus lub npe thov, Amees.
Peb muaj tus cwjpwm zoo li cas rau kev txhaum? Txiav tu nrho lossis yog maj mam?
Nyeem Vajluskub hauv peb lub xyoo: Yausuas 8
Kênh Youtube BHKTHN:
