Nkauj Quaj Ntsuag 3:55-66
Nqe cim:
“Tus Tswv, koj twb pom tej uas luag ua tsis ncaj rau kuv lawm, thov koj txiav txim kom ncaj ncees rau kuv rooj plaub. Koj yeej paub hais tias kuv cov yeebncuab ntxub kuv heev thiab tuav hauv tawmtsam kuv li cas.” (Nkauj Quaj Ntsuag 3:59-60).
Lus nug rau sawvdaws xav:
– Puas muaj kev hloov pom tshiab ntawm tus cevlus Yelemis thiab Vajtswv haivneeg ntsig txog tej teebmeem uas lawv raug?
– Cov lus piav hauv nqe 55 hais txog tus duab zoo li cas?
– Txojkev cia siab ntawm peb thaum ntsib tej kev txomnyem, nyuaj siab yog dabtsi?
Qhib lus hauv tshooj 3 ntawm phau ntawv Nkauj Quaj Ntsuag, tus cevlus Yelemis quaj tu siab txog qhov uas nws haivneeg raug, Yelemis zeem paub hais tias txhua yam tshwm muaj puavleej yog tus Tswv txhais tes rau txim rau Nws haivneeg (Yelemis 3:1-18). Txawm yog li ntawd los, tus uas sau phau ntawv paub tias “lawv yws vim qhov uas raug txim” yog yam uas tsis muaj nqis dabtsi li, Yelemis thiaj taij thov tus Tswv hais tias, “Vim li cas peb pheej yws thaum peb raug txim, vim peb tej kev txhaum? Cia peb tshuaj saib peb lub neej thiab tig rov los cuag tus Tswv” (nqe 39-40). Kuj yog lo lus no, tus cevlus Yelemis thiab tagnrho cov pejxeem muaj lub qhov muag ntsia seem zoo thaum ntsib kev nyuaj. Vim qhov uas cia siab ntsoov rau Vajtswv, ntawm tus neeg yws yuav dhau mus ua tus neeg pom yus, lees txim, tu siab thiab muaj kev cia siab.
Tus cevlus Yelemis qhia paub “kuv nyob puag hauv qab qho, kuv quaj thov koj” (nqe 55). Nyob hauv tsev lojcuj yog qhov chaw muaj duab tshav ntuj tsawg, qhov chaw Yelemis hais txog yog hais “hauv qab qho”. Cov lus piav no nws hais txog ib tug duab uas txaus tu siab uas Yelemis tabtom nyob tsis muaj tus duab ci qhov twg tuaj li. Tus duab no qhia paub tsis muaj ib txojkev cia siab twg pub rau Yelemis thiab nws cov pejxeem li lawm. Tiamsis ntawm qhov chaw uas zoo li tsis muaj kev cia siab no lawv tsa muag ntsia tus Tswv thiab thov Nws pab. Txuas ntxiv ntawd muaj cov lus, “koj mloog kuv tej lus thov”, “hais kom kuv tsis txhob ntshai”, “cawm tau kuv txojsia lawm”, “koj twb pom tej uas luag ua tsis ncaj rau kuv lawm”, “koj rau txim rau lawv raws li tej uas lawv tau ua tas los lawm”, “koj caum lawv thiab raws kom lawv khiav tawm hauv lub ntiajteb no mus tas dulug.” (nqe 55-66). Cov lus no qhia tawm txojkev cia siab nrog rau kev txhawb zog ntawm cov pejxeem. Nyob rau txhua lub tsamthawj txomnyem uas lawv raug, tus Tswv yeej pom tagnrho. Nws yuav ua haujlwm tuaj Nws haivneeg tog.
“Yexus Khetos, nws yeej zoo nws li qub; nag hmo thiab hnub no nws zoo li cas, nws yeej zoo li ntawd mus ibtxhis li.” (Henplais 13:8). Tus Tswv uas peb pehawm yeej zoo li ntawd mus ibtxhis. Tau txais tej lus thov thiab cawm dim, tsis yog tus Tswv haivneeg hnub thaud lossis ib lub sijhawm twg xwb, tiamsis nimno Vajtswv yeej pom tagnrho txhua yam uas Nws cov menyuam tabtom raug. Vajtswv twb pom tas, feem ntawm peb yog saib puas ntseeg Nws, thov Nws xwb. Cia li ruaj siab thaum ntsib kev txomnyem, tu siab hauv lub neej, yuav tsum nco ntsoov tus Tswv! Nws yeej yuav ua haujlwm raws li sijhawm pub rau peb. Ha-le-lu-yas!
Thov Vajtswv,
Vajtswv, ua tsaug vim Koj yog lub hauvpaus cia siab ntawm nyuam yaus. Thov Koj pub kom nyuam yaus ua taus siab tawv qhawv tiv tej kev nyuaj, vim paub tias Koj yeej pom tagnrho txhua yam huvsi. Nyuam yaus tuav Tswv lub npe thov, Amees.
Peb puas ruaj siab thaum ntsib tej kev txomnyem lawm tau?
Nyeem Vajluskub hauv peb lub xyoo: Yausuas 4
Kênh Youtube BHKTHN:
