Klei Aê Diê Blŭ: Klei Čŏk Hia 3:55-66
Êlan kliăng: “Ih ƀuh leh klei jhat arăng ngă kơ kâo, Ơ Yêhôwa; brei ih phat brei kđi kâo. Ih ƀuh leh jih jang mnêč klei diñu rŭ ênua, jih jang klei diñu čiăng ngă kơ kâo.” (Klei Čŏk Hia 3:59-60)
Klei êmuh ksiêm mĭn: Ya klei bi mlih hlăm klei Khua pô hưn êlâo Y‑Yêrêmi leh anăn phung ƀuôn sang ƀuh kơ klei diñu dôk găn? Si klei čih hlăm êlan 55 lač kơ boh klei? Ya klei drei čang hmăng tơdah tlă anăp hŏng klei truh, klei lông dlăng?
Mphŭn pŏk kdrêč 3 hdruôm hră Klei Čŏk Hia, Khua pô hưn êlâo Y‑Yêrêmi hia kơ klei luč čang hmăng kơ boh klei djuê ana ñu dôk tuôm, ñu thâo săng kơ djăp klei truh kyua kngan Yêhôwa yơr bi kmhal leh phung ƀuôn sang Ñu (Y‑Yêrêmi 3:1-18). Khădah snăn, pô čih hră thâo “blŭ dŭñ dŭñ kơ klei bi kmhal klei soh ñu?” srăng amâo ba klei tŭ dưn ôh, ñu akâo kơ phung ƀuôn sang Aê Diê brei “lông dlăng leh anăn ksiêm êlan drei, leh anăn lŏ wĭt kơ Yêhôwa” (êlan 39-40). Ăt mơ̆ng anăn kơh, Khua pô hưn êlâo Y‑Yêrêmi leh anăn phung ƀuôn sang mâo klei dlăng mngač hĭn kơ klei pô dôk găn. Kyua đăo knang kơ Aê Diê, snăn mơ̆ng klei blŭ duñ duñ diñu lŏ ksiêm dlăng pô leh anăn kmhal, mơ̆ng klei luč čang hmăng, ară anei diñu bŏ hŏng klei čang hmăng.
Khua pô hưn êlâo Y‑Yêrêmi brei thâo “Kâo iêu wah lač kơ anăn Ih, Ơ Yêhôwa, mơ̆ng anôk êlam hlăm ƀăng” (êlan 55). Hlăm anôk êlam hlăm ƀăng jing anôk kƀah klei mngač, hlăm anôk ñu lač anei jing “mmăt” leh anăn “êlam snăk”. Klei čih anei lač kơ boh klei knap mñai snăk kơ anôk ñu dôk amâo mâo sa klei mngač ôh wăt tơdah điêt dhiêt dưn. Rup anei brei ƀuh amâo mâo sa klei čang hmăng ôh kơ Khua pô hưn êlâo Y‑Yêrêmi ăt msĕ mơh jih jang phung ƀuôn sang. Khădah snăn, mơ̆ng anôk msĕ si luč klei čang hmăng anăn diñu dlăng kơ Yêhôwa leh anăn akâo wah lač hŏng Ñu. Leh anăn lu boh blŭ, “Ih hmư̆ leh klei kâo kwưh”, “Ih hriê giăm kâo leh tơdah kâo iêu wah lač kơ ih; ih lač leh, ‘Đăm huĭ ôh!”, “Ih mgang leh kđi kâo”, “Ih ƀuh leh klei jhat arăng ngă kơ kâo”, “brei ih phat brei kđi kâo”, “Brei ih tiŏ diñu hŏng klei ngêñ leh anăn bi rai hĕ diñu” (êlan 55-66). Dŭm klei anei bi êdah klei čang hmăng prŏng prĭn hŏng ai tiê bi jih yuôm bhăn snăk phung ƀuôn sang. Hlăm djăp boh klei dleh dlan diñu tuôm, Yêhôwa ƀuh jih leh. Ñu srăng ngă bruă čiăng mgang phung ƀuôn sang Ñu. “Yêsu Krist ăt jing msĕ mbruê, hruê anei, leh anăn hlŏng lar” (Hêbrơ 13:8). Pô drei dôk kkuh mpŭ lă lar ăt adôk snăn. Klei thâo mâo Khua Yang wĭt lač leh anăn bi mtlaih amâo djŏ knŏng brei kơ hjăn phung ƀuôn sang Aê Diê hlăk đưm ôh amâodah hlăm sa wưng đuč ôh, ƀiădah Aê Diê hruê anei ăt ƀuh jih djăp klei phung ƀuôn sang Aê Diê dôk tlă anăp. Khua Yang ƀuh jih leh, bruă drei jing dưm klei đăo knang hlăm Khua Yang čiăng wah lač hŏng Ñu mơ̆ amâodah hơăi. Brei kjăp ai tiê tơdah tuôm hŏng ya klei dleh dlan hlăm klei hdĭp, brei hdơr Khua Yang ƀuh leh jih! Ñu srăng ngă bruă hlue si mmông Ñu. Halêluya!
Drei kjăp ai tiê mơ̆ tơdah tuôm hŏng klei dleh dlan hlăm klei hdĭp?
Wah lač: Ơ Khua Yang khăp hơiêng! Bi mni kơ Ih kyua Ih jing phŭn đăo knang kơ kâo. Akâo kơ Khua Yang đru kâo kjăp êbat mbĭt hŏng Ih hlăm djăp boh klei kyua thâo sĭt Khua Yang ƀuh leh djăp mta klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
