Klei Aê Diê Blŭ: Y‑Yakơ 1:5-8
Êlan kliăng: “Tơdah sa čô hlăm phung diih kƀah klei thâo mĭn, brei ñu akâo kơ Aê Diê, Pô brei kơ jih jang mnuih hŏng klei kmah leh anăn amâo ƀuah ôh, leh anăn Aê Diê srăng brei klei knhâo kơ ñu” (Y‑Yakơ 1:5).
Klei êmuh ksiêm mĭn: Hlei pô năng duah klei thâo mĭn leh anăn duah ya pioh ngă? Ti anôk drei dưi duah klei thâo mĭn leh anăn si ngă srăng duah?
Êjai dôk blŭ djŏ kơ klei “lông dlăng djăp mta” phung đăo dôk bi tlă anăp, Y‑Yakơ mtrŭt digơ̆ “tơdah sa čô hlăm phung diih kƀah klei thâo mĭn, brei ñu akâo kơ Aê Diê.” Êlan anei amâo djŏ čiăng lač knŏng sa dua čô mnuih đuč ôh čiăng klei thâo mĭn. Boh klă gơ̆, tơdah tuôm hŏng klei lông dlăng, jih jang čiăng sơăi kơ klei thâo mĭn. Năng ai mâo đa đa hlăm phung drei mâo klei knhâo hlăm sa mta bruă, ƀiădah hlei pô jing knhâo hlăm djăp mta bruă? Boh nik tơdah hdĭp ti krah klei lông dlăng, sĭt nik grăp čô drei srăng ƀuh sơăi kơ klei kƀah pô, leh anăn jih jang čiăng sơăi klei thâo mĭn. Ƀiădah ya ngă čiăng hĕ klei thâo mĭn tơdah tuôm hŏng klei lông dlăng? Khua pô mtô Warren W. Wiersbe mblang snei, “Drei čiăng mâo klei thâo mĭn čiăng drei amâo bi luč hơăi mang ôh mmông myun Aê Diê brei čiăng đru drei đĭ hriê kơ prŏng. Klei thâo mĭn đru drei thâo yua bi jăk djăp mta klei truh pioh bi hriăm mjuăt drei pô leh anăn brei klei guh kơang kơ Anăn Aê Diê.”
Kyuadah klei thâo mĭn đru klei đăo đĭ hriê kơ prŏng čiăng bi guh kơang Aê Diê kyuanăn amâo lŏ mâo sa anôk mkăn ôh drei dưi duah êngao kơ Aê Diê. Kyuanăn yơh Y‑Yakơ mtă kơ phung đăo duah klei thâo mĭn hŏng klei “akâo kơ Aê Diê” kyuadah Ñu jing “Pô brei kơ jih jang mnuih hŏng klei kmah leh anăn amâo ƀuah ôh.” Aê Diê jing akŏ kơ klei thâo mĭn leh anăn Ñu srăng brei kơ hlei pô duah Ñu. Aê Diê brei hŏng klei kmah, čiăng lač Ñu amâo hơưi, amâo lŏ djă pioh kơ Ñu pô ôh, ƀiădah brei lu hĭn kơ klei drei akâo. Aê Diê brei hŏng klei “amâo ƀuah ôh”, čiăng lač Ñu ngă klei anei hŏng klei mơak, kyuanăn đăm drei lŏ ŏ guam, huĭ amâodah hêñ ôh tơdah akâo.
Wăt tơdah Aê Diê srăng brei klei thâo mĭn ƀiădah Ñu čoh čuăn pô hriê akâo kơ Ñu “akâo hŏng klei đăo, amâo đing ôh.” Amâo dưi ôh drei hriê akâo kơ Aê Diê brei klei thâo mĭn leh anăn đing thâodah Aê Diê brei amâodah hơăi? Ñu bi hmô mnuih đing jing msĕ si êa poh yă, angĭn bi ktlư̆ leh anăn kpuh, mâo klei mĭn dua nah, leh anăn mnuih msĕ snăn “amâo dôk sa hnơ̆ng ôh.”
Hŏng klei đăo kjăp, drei akâo Aê Diê brei klei thâo mĭn čiăng hdĭp bi mơak kơ Ñu snăn sĭt nik Ñu srăng brei tui si klei Ñu ƀuăn leh: “Knang kơ Yêhôwa hŏng jih ai tiê, đăm knang ôh kơ klei mĭn ih pô. Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih” (Klei Bi Hriêng 3:5-6).
Drei dôk akâo klei thâo mĭn mơ̆ng Aê Diê hŏng jih ai tiê mơ̆?
Wah lač: Ơ Khua Yang, kâo thâo kơ klei awăt leh anăn klei kƀah kâo, amâo thâo săng jih ôh kơ ya klei truh jŭm dar kâo, boh nik nak tơdah tuôm hŏng klei lông dlăng. Kyuanăn yơh kâo hriê kơ Ih, akâo Ama brei kơ kâo klei thâo mĭn čiăng kâo đĭ hriê kơ prŏng leh anăn hdĭp bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
