Yakaunpaus 1:5-8
Nqe cim:
“Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws, rau qhov Vajtswv yog tus muaj siab dawb siab zoo pub ib puas tsav yam rau sawvdaws, nws tsis khuvxim li.” (Yakaunpaus 1:5)
Lus nug rau sawvdaws xav:
– Leejtwg yog tus uas tsimnyog nrhiav txojkev txawj ntse thiab nrhiav ua tus dabtsi?
– Peb yuav nrhiav kev txawj ntse qhovtwg thiab tsimnyog nrhiav zoo li cas?
Thaum hais txog “ntau yam kev nyuaj siab” uas cov ntseeg tabtom raug, Yakaunpaus txhawb lawv zog hais tias “leejtwg tsis muaj tswvyim, kom nws cia li thov ntawm Vajtswv.” Nqe no tsis yog hais txog lub ntsiab tias tsuas muaj qee tus thiaj cheemtsum kev txawj ntse xwb. Tseeb tiag thaum ntsib kev sim siab, tagnrho sawvdaws puavleej cheemtsum muaj kev txawj ntse. Tej zaum hauv peb cov no muaj qee tus paub rau ib seem twg heev, tsis muaj leejtwg paub tas txhua yam? Tshwjxeeb yog thaum ua neej nyob nrog tej kev sim siab, peb yuav pom tias yus tsis muaj kev txawj ntse txaus, thiab txhua tus cheemtsum kev txawj ntse. Vim li cas cheemtsum kev txawj ntse thaum ntsib kev nyuaj siab? Kx Warren W. Wiersbe hais tias, “peb cheemtsum muaj kev txawj ntse kom peb tsis muab lub sijhawm uas tus Tswv pub rau peb tso tseg khoob, peb thiaj loj hlob. Kev txawj ntse ua rau peb paub siv lub sijhawm los xyaum tus kheej thiab ua kom Vajtswv tau ntsejmuag.”
Vim kev txawj ntse pab kom peb loj hlob txojkev ntseeg thiab ua rau Vajtswv tau ntsejmuag, yog li peb tsuas nrhiav tau kev txawj ntse nyob hauv Vajtswv xwb. Yakaunpaus ntuas cov ntseeg tus Tswv nrhiav kev txawj ntse los ntawm qhov “thov ntawm Vajtswv”, vim Nws yog “tus muaj siab dawb siab zoo pub ib puas tsav yam rau sawvdaws, nws tsis khuvxim li.” Vajtswv yog lub hauvpaus kev txawj ntse thiab Nws zoo siab hlo pub rau cov neeg uas nrhiav Nws. Vajtswv pub npluamias, txhais tau tias Nws tsis tuav cia, Nws pub ntau tshaj qhov uas peb xav tau. Vajtswv pub “tsis khuvxim li”, txhais tau tias Nws zoo siab hlo ua qhov no, yog li peb tsis txhob txajmuag thiab ntshai thaum peb thov.
Txawm yog Vajtswv txaus siab hlo pub kev txawj ntse los Nws xav kom tus neeg thov Nws “ntseeg tsis txhob ua xyem xyav.” Peb puas tseem thov Vajtswv pub kev txawj ntse es yus tseem ua xyem xyav? Yakaunpaus muab tus neeg ua xyem xyav piv zoo li hiavtxwv ntas mus ntas los, tsis muaj chaw nres, thiab tus neeg zoo li “ua dabtsi los ua tsis tsheej”.
Los ntawm txojkev ntseeg, peb thov Vajtswv pub kev txawj ntse kom peb ua tau lub neej haum Nws siab, ua li no peb yeej yuav tau tej uas Nws coglus tseg. “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb.” (Pajlug 3:5-6).
Thov Vajtswv,
Vajtswv, nyuam yaus zeem paub tej uas nyuam yaus ua tsis tau thiab tsis muaj, tsis paub tas tej uas tshwmsim muaj ntawm ibncig, tseemceeb yog thaum ntsib kev sim siab. Yog li nyuam yaus los cuag Koj, thov Vajtswv Koj pub kev txawj ntse kom nyuam yaus kev ntseeg loj hlob thiab ua rau Koj tau ntsejmuag. Nyuam yaus tuav Tswv Yexus lub npe thov, Amees.
Peb puas tabtom siv zog nrhiav kev txawj ntse ntawm tus Tswv lossis tsis nrhiav?
Nyeem Vajluskub hauv peb lub xyoo: Yauhas 19
Kênh Youtube BHKTHN:
