Klei Aê Diê Blŭ: Philip 1:27-30
Êlan kliăng: “Knŏng brei diih hdĭp năng hŏng klei mrâo mrang jăk Krist, … Klei anăn jing klei bi knăl sĭt kơ klei diñu srăng rai tuč, ƀiădah jing klei bi knăl sĭt kơ klei bi mtlaih diih, leh anăn klei anăn kbiă hriê mơ̆ng Aê Diê.” (Philip 1:27-28)
Klei êmuh ksiêm mĭn: Hdĭp “năng hŏng klei mrâo mrang jăk” leh anăn klei bi mtlaih ya mâo klei bi mguôp mbĭt, leh anăn si klei ngă leh? Si drei ngă čiăng dưi ngă tui si klei mtă anei? Si klei mtô anei đru drei dưi găn gao klei lông dlăng, tơdah tŭ klei phung lăn ala ñĕ đuĕ, ksŭng ngă kơ drei?
Klei bi mtlaih Aê Diê brei kyua klei pap leh anăn dưi mă tŭ hŏng klei đăo (Êphêsô 2:8-10), ƀiădah lĕ, klei đăo amâo mâo bruă bi êdah jing klei đăo djiê (Y‑Yakơ 2:17). Blŭ mdê, hdĭp năng hŏng Klei Mrâo Mrang Jăk wăt jing klei bi knăl leh anăn wăt jing boh tŭ dưn mơ̆ng klei bi mtlaih mơh.
Hdĭp “năng hŏng Klei Mrâo Mrang Jăk” êlâo hĭn brei “dôk kjăp” (êlan 27). Anei jing boh blŭ čiăng lač kơ kahan răng mgang kơ anôk bruă ñu hŏng jih ai tiê. Phung đăo kơ Krist brei dôk kjăp hlăm Khua Yang, hlăm klei sĭt nik, leh anăn hlăm klei kpă ênô. Leh anăn, brei “sa ai” leh anăn “sa klei mĭn”. Jing kdrêč hlăm sa asei mlei, phung đăo kơ Krist čiăng mâo nanao ayŏng adei hlăm Phung Sang Aê Diê đru drei dưi “dôk kjăp” hlăm klei đăo. Brei drei “sa ai” leh anăn “sa klei mĭn” kyuadah drei jing dŏ kơ Khua Yang leh anăn kơ hdơ̆ng drei. Kyuanăn, djă pioh klei sa ai hlăm Phung Sang Aê Diê jing sa klei djiê hdĭp yơh. Hĭn mơh, Phung Sang Aê Diê ăt lŏ “sa klei mĭn mđrăm mbĭt čiăng mgang klei đăo kơ klei mrâo mrang jăk”. “Sa klei mĭn mđrăm mbĭt čiăng mgang” jing boh blŭ bi mtuôp hlăm klei Grek, kač čih sa rup hlăm klei bi lông pral ktang asei mlei dleh dlan, phung bi lông brei gĭr ktưn snăk, bi đru hdơ̆ng găp čiăng mmiă mâo klei dưi hĭn. Msĕ snăn mơh, klei “dôk kjăp” hlăm klei đăo leh anăn bi mguôp “sa ai” hŏng ayŏng adei, đru phung đăo dưi bi kdơ̆ng hŏng phung roh hŏng Klei Mrâo Mrang Jăk ƀiădah amâo mâo klei huĭ ôh.
Dua klei sĭt nik yuôm bhăn čiăng dưi bi blah hlăm kdrăn blah mngăt myang anei jing klei Aê Diê “brei leh kơ diih amâo djŏ knŏng đăo kơ Krist ôh”, ƀiădah wăt “tŭ klei knap mñai kyua Ñu msĕ mơh” (êlan 29). Klei bi mtlaih leh anăn klei tŭ klei knap mñai jing klei brei mơ̆ng Aê Diê. Drei amâo dưi đăo kơ Khua Yang Yêsu ôh tơdah amâo djŏ kyua klei pap mơ̆ng Aê Diê brei, leh anăn drei ăt kăn dưi tŭ klei knap mñai kyua Khua Yang rei, tơdah amâo djŏ kyua klei pap mơ̆ng Ñu brei.
Amâo djŏ ôh hjăn phung đăo ti ƀuôn Philip leh anăn hjăn phung drei hruê anei tuôm hŏng klei lông dlăng, leh anăn mâo klei dưi hĭn hŏng klei lông dlăng klă klơ̆ng. khua ƀĭng kna Y‑Pôl jing klei bi knăl kơ bruă sa čô dưi dôk kjăp bi kdơ̆ng hŏng klei ksŭng blah mơ̆ng êngao wăt mơ̆ng lam, knŏng hŏng klei pap êbeh dlai mơ̆ng Aê Diê (êlan 30). Thâo săng kơ jih jang phung đăo hlăk hlê hŏng drei dôk mbĭt sa tĭng kdrăn blah, jing sa klei bi mđĭ ai leh anăn mtrŭt drei dôk kjăp găn gao jih jang klei lông dlăng tơdah tlă anăp hŏng klei bi kdơ̆ng mơ̆ng phung lăn ala.
Si klei bi mđĭ ai drei mơ̆ng klei khua ƀĭng kna Y‑Pôl bi hmô hlăm klei ñu dưi hĭn hŏng klei lông dlăng?
Wah lač: Ơ Khua Yang, bi mni kơ Ih kyua brei kâo dưi mguôp mbĭt hlăm klei Ih tŭ klei knap mñai, tơdah kâo tuôm hŏng klei bi kdơ̆ng leh anăn ñĕ đuĕ mơ̆ng phung lăn ala. Brei kâo knang kơ klei pap Khua Yang, čiăng dưi hĭn nanao hlăm jih knhuang êlan klei hdĭp mngăt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
