Klei Aê Diê Blŭ: Hêbrơ 13:1-8
Êlan kliăng: “Brei diih ngă jăk hdơ̆ng diih pô, bŏ hŏng klei thâo pap” (Êphêsô 4:32a)
Klei êmuh ksiêm mĭn: Čiăng hdĭp bi mơak kơ Khua Yang, si ngă knuih brei phung đăo a)kơ Krist mâo hŏng phung riêng gah leh anăn hŏng ñu pô? Kơ klei drei knang čiăng drei dưi gĭr hlăm klei dôk dơ̆ng huă bi mơak kơ Khua Yang?
Hdĭp bi mơak kơ Khua Yang jing klei kñăm čiăng yuôm hĭn hlăm klei hdĭp grăp čô phung đăo kơ Krist. Klei anei amâo djŏ knŏng bi êdah hlăm knuih drei hŏng Khua Yang ôh ƀiădah wăt hlăm klei drei dôk dơ̆ng hŏng phung riêng gah msĕ mơh. Hlăm trăn Klei Aê Diê Blŭ anei, pô čih hră mơĭt kơ phung Hêbrơ bi hriăm phung đăo kơ Khua Yang êlan srăng dôk dơ̆ng ƀơ̆ng huă hŏng lu phung mdê mdê.
Hŏng phung ayŏng adei hlăm Khua Yang, “brei diih ăt bi khăp nanao hdơ̆ng ayŏng adei” (êlan 1). Hlăm Khua Yang Yêsu, mơ̆ng mnuih êgar drei jing ayŏng amai adei hdơ̆ng drei. Klei bi khăp hdơ̆ng ayŏng adei anei yơh mjing drei mdê hŏng phung lăn ala, leh anăn anei jing klei bi knăl brei digơ̆ thâo phung anei jing phung đăo kơ Aê Diê.
Hŏng phung tue, brei drei thâo jum kyuadah êjai ngă klei anăn amâo djŏ drei knŏng jum digơ̆ ôh ƀiădah dôk jum wăt Khua Yang pô mơh.
Hŏng phung arăng krư̆ leh anăn ngă jhat, brei drei uêñ mĭn leh anăn duah êlan đru digơ̆.
Hŏng klei bi dôk ung mô̆, brei drei djă pioh klei doh jăk hŏng klei dôk sĭt suôr hdơ̆ng ung mô̆, weh đuĕ kơ klei knhông leh anăn klei tlĕ piu. Êjai phung lăn ala dôk mtrŭt mjhar kơ knhuah hdĭp phưi tha, ngă soh hŏng klei êngiê, brei phung đăo mpŭ kơ klei bi dôk ung mô̆ Aê Diê mjing leh (êlan 1-4).
Amâo djŏ knŏng mtô kơ knuih dôk dơ̆ng ƀơ̆ng huă hŏng phung riêng gah ôh, pô čih hră mơĭt kơ phung Hêbrơ mtô wăt hlăm klei hdĭp phung đăo pô, brei digơ̆ dôk mơak hŏng mnơ̆ng digơ̆ mâo leh, đăo kơ klei Aê Diê đru leh anăn jhŏng bi tlă anăp hŏng djăp mta klei (êlan 5-6). Hrô kơ klei tui duah klei êđăp ênang leh anăn klei mơak hlăm ngăn dŏ, phung đăo kơ Krist amâo khăp kơ prăk ôh, ƀiădah hơ̆k mơak kyua mâo Khua Yang, Pô amâo tuôm lui drei ôh. Kyuanăn yơh, wăt tơdah klei hdĭp anei mâo lu klei lông dlăng knap mñai dưn, drei ăt dưi găn hŏng klei jhŏng kyua knang kơ klei ktang Khua Yang.
Dôk dơ̆ng ƀơ̆ng huă bi mơak kơ Khua Yang jing klei srăng ngă hlŏng jih klei hdĭp phung đăo. Klei anei amâo ênưih ôh, ƀiădah drei srăng tui klei bi hmô mơ̆ng phung nao êlâo mtô Klei Aê Diê Blŭ leh anăn gĭt gai drei hlăm klei đăo. Tơdah ksiêm dlăng kơ klei hdĭp digơ̆, boh tŭ mơ̆ng klei digơ̆ hdĭp hŏng klei đăo, klei khăp kơ jih jang mnuih, drei dưi tui knuih digơ̆ srăng hdĭp msĕ snăn. Klei jăk hĭn jing drei mâo klei ƀuăn, “Yêsu Krist ăt jing msĕ mbruê, hruê anei, leh anăn hlŏng lar” (êlan 8). Wăt tơdah klei hdĭp leh anăn jih jang mnơ̆ng jŭm dar drei bi mlih amâo mâo mdei dưn, ƀiădah Pô drei đăo leh anăn tui hlue amâo srăng bi mlih ôh. Ñu ăt dôk mbĭt, kiă kriê leh anăn brei klei ktang čiăng drei hdĭp bi mơak kơ Ñu.
Knhuah hdĭp drei ară anei hin leh anăn klei dôk dơ̆ng hŏng phung riêng gah dôk bi mơak kơ Khua Yang leh mơ̆ amâodah hơăi?
Wah lač: Ơ Aê Diê, kâo lač jăk kơ Ih Ơ Ama! Kyuadah Ih dôk mbĭt hŏng kâo nanao. Lač jăk kơ Ih Ơ Khua Yang Yêsu, kyuadah Ih amâo tuôm mlih ôh. Lač jăk kơ Khua Yang kyua klei bi hmô mơ̆ng phung đăo nao êlâo bi hmô leh kơ kâo čiăng kơ kâo jhŏng hdĭp bi mơak kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
