Henplais 13:1-8
Nqe cim:
“Nej yuav tsum ua siab dawb siab zoo, ib tug hlub ib tug” (Efexus 4:32)
Lus nug rau sawvdaws xav:
– Ua neej haum Vajtswv siab, yuavtsum muaj tus cwjpwm li cas rau tej neeg ib ncig ntawm yus?
– Vim dab tsi peb thiaj ua siab ntev nrhiav txoj kev ua neej haum Vajtswv siab?
Ua neej haum Vajtswv siab yog lub homphiaj uas txhua tus ntseeg yuavtsum muaj. Tes haujlwm ntawd, tsis yog peb ua neej haum Vajtswv siab xwb tiamsis peb yuavtsum muaj tus cwjpwm zoo rau cov neeg ib ncig ntawm peb thiab. Hauv ntu Vajluskub no, tus sau phau ntawv Henplais qhia kom tus ntseeg Yexus yuavtsum muaj tus cwjpwm li cas rau Vajtswv thiab tibneeg.
Nyob nrog cov kwvtij ntseeg hauv Tswv Yexus mas “ib tug yuav tsum hlub ib tug ib yam li kwvtij sib hlub” (nqe 1). Peb txhua tus yeej tsis sib paub thiab tsis sib thooj, tiamsis hauv Tswv Yexus peb tau los nyob ua ke thiab ua kwv ua tij. Los ntawm txoj kev hlub uas sib hlub li kwv tij sib hlub ua rau peb txawv tibneeg ntiajteb, thiab ntawd yog lub cim rau neeg ntiajteb zeem paub hais tias peb yog cov ntseeg Tswv Yexus. Tus qhua, tus peb tsis paub, peb yeej zoo siab hlo txais tos nws thiab ua haujlwm pab txhua tus, ua li ntawd yog peb tabtom ua haujlwm rau Vajtswv ntag. Cov neeg uas raug kaw, raug tsimtxom, peb yeej hmov tshua lawv thiab nrhiav kev pab lawv. Kev ua txij nkawm, qhia kom sawvdaws yuavtsum ceev kom dawbhuv, ncaj ncees rau nyias tus txij nkawm, txav deb kev nkauj nraug. Thaum uas lub ntiajteb no tabtom txhawb txoj kev ua neej ywj siab li neeg kev ntshaw, tiamsis yog tus ntseeg yuavtsum saib yus txoj kev txij nkawm uas Vajtswv rhawv tsim kom muaj nqis thiab dawbhuv (nqe 1-4).
Tsis yog qhia muaj tus cwjpwm zoo ua neej nrog lwm tus xwb, tiamsis tus uas sau phau ntawv Henplais tseem qhia kom cov ntseeg Yexus yuavtsum paub ua neej txaus siab rau yus tus kheej, tso siab plhuav rau Vajtswv ua tus tu thiab yug peb, yuav tsum muaj lub siab tawv tiv txhua yam kev txomnyem (nqe 5-6). Tus ntseeg tsis nrhiav kev tso siab thiab tej khoom qhov txhia chaw hauv ntiajteb, tsis ntshaw nyiaj tiamsis txaus siab rau yus lub neej uas muaj Vajtswv nyob nrog thiab tsis tso yus tseg li. Yog li ntawd, txawm lub neej yuav ntsib kev txomnyem, kev sim siab li cas los, peb yeej vamkhom Vajtswv kev pab thiab sawv khov kho tiv kom hla dhau.
Nrhiav kev ua lub neej uas haum Vajtswv siab yog yam uas tus ntseeg yuav tsum ua mus tas sim neej. Ua li ntawd tsis yoojyim tiamsis peb yuav tsum kawm xyaum raws cov neeg muab siab rau ntseeg hnub thaud tus qauv thiab tej uas lawv qhia Vajtswv Txojlus rau peb thiab coj peb los lawm. Thaum peb saib lawv lub neej, tej uas lawv ua tau hauv kev ntseeg thiab txoj kev hlub uas lawv muab pub rau sawvdaws, peb yuav tsum kawm ua ib yam li ntawd. Qhov uas zoo tshaj plaws tej ntawd yog peb muaj lo lus cogtseg hais tias “Yexus Khetos, nws yeej zoo nws li qub; nag hmo thiab hnub no nws zoo li cas, nws yeej zoo li ntawd mus ibtxhis li” (nqe 8). Txawm yog peb lub neej thiab ib puas tsav yam nyob ib ncig peb yuav hloov pauv tsis nres li los, tus Tswv uas peb ntseeg yeej tsis hloov pauv li. Nws yeej nrog nraim peb nyob txhua lub sijhawm, tswj peb thiab pub peb muaj dag zog ua tau lub neej haum Vajtswv siab.
Thov Vajtswv:
Vajtswv Ntuj tus uas yog nyuam yaus Leej Txiv. Nyuam yaus ua Koj tsaug uas Koj pub nyuam yaus tau ua Koj menyuam. Thov Koj nyob nrog nraim nyuam yaus thiab pab kom nyuam yaus ua tau lub neej haum Koj siab mus tas nyuam yaus sim neej. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb ua neej rau Vajtswv thiab rau tej neeg ib ncig ntawm peb zoo li cas lawm?
Nyeem Vajluskub hauv peb lub xyoos:Henplais 5
Kênh Youtube BHKTHN:
