Klei Aê Diê Blŭ: II Têsalônik 2:1-3a
Êlan kliăng:“Đăm brei arăng duah mplư diih ôh” (II Têsalônik 2:3a)
Klei êmuh ksiêm mĭn: Hŏng ya klei mplư phung đăo ti Sang Aê Diê Têsalônik dôk bi tlă anăp? Khua ƀĭng kna Y-Pôl mtă brei phung đăo răng kơ ya klei? Ya drei srăng ngă čiăng amâo lĕ ôh hlăm klei phung khua pô hưn êlâo soh mplư?
Hlăm kdrêč I, Khua ƀĭng kna Y-Pôl bi mni leh kơ klei hdĭp klei đăo leh anăn klei khăp phung đăo ti ƀuôn Têsalônik ăt đĭ hriê kơ prŏng hlăm klei arăng ngă jhat. Ƀiădah lĕ, hlăm Phung Sang Aê Diê ăt mâo mơh đa đa mnuih mjhua klei arăng ngă jhat kơ phung đăo hlăk anăn čiăng mtô snei, klei arăng ngă jhat jing klei bi knăl kơ “hruê Khua Yang truh leh”. Klei mtô soh anăn bi mgei leh anăn bi huĭ lu mnuih kyuadah digơ̆ mĭn kơ digơ̆ dôk hdĭp hlăm klei knap mñai truh bhiâo riâo rit hlăm hruê Khua Yang lŏ hriê (I Têsalônik 5:1-3). Klei jhat mơ̆ng klei mplư anei jing ngă kơ lu mnuih mâo klei rŭng răng, amâo lŏ mđing ôh kơ knhuah hdĭp klei hdĭp mngăt yang đar.
Khua ƀĭng kna Y-Pôl mtă kơ phung đăo ti ƀuôn Têsalônik răng tơdah blŭ djŏ kơ klei Khua Yang srăng lŏ hriê leh anăn kơ klei drei srăng bi tuôm hŏng Ñu, “đăm brei klei mĭn diih djăl mgei amâodah rŭng răng ôh, thâodah hŏng klei yang mtrŭt, amâodah hŏng klei blŭ, amâodah hŏng hră arăng lač mơ̆ng hmei, čiăng hưn kơ Hruê Khua Yang truh leh” (êlan 1-2). Ñu bi mđĭ ai phung đăo đăm rŭng răng ôh kyua klei phung mgưt lač kơ diñu mâo klei yang mtrŭt anăn, kyuadah phung anăn jing phung khua pô hưn êlâo soh, diñu yua klei blŭ, si tô hmô diñu mtô mblang leh anăn duah mgưt hră čih mơĭt mơ̆ng Khua ƀĭng kna Y-Pôl kăp đru kơ klei diñu blŭ luar. Klei anei brei drei ƀuh phung mplư bŏ hŏng klei mnêč snăk, diñu yua lu êlan hdră leh anăn mnơ̆ng hưn bi sĭt jing msĕ si klei sĭt kăp mplư phung đăo. Kyuanăn Khua ƀĭng kna Y-Pôl mtă brei Phung Sang Aê Diê ƀuôn Têsalônik răng, “đăm brei arăng duah mplư diih ôh” (êlan 3).
Klei Aê Diê Blŭ mtă brei răng hlăm jih jang ênuk, ăt mâo nanao phung khua pô hưn êlâo soh leh anăn pô mtô soh hlăm Phung Sang Aê Diê čiăng mplư phung anak čô Aê Diê hŏng lu mnêč hgăm snăk. Mjhua bruă mđung rup, mđung asăp mâo klei đĭ kyar, diñu yua internet pioh mtô klei mtô luar, boh nik nak hưn kơ hruê Khua Yang Yêsu Krist lŏ hriê, ngă lu klei bi kdjăt leh anăn klei rŭng răng hlăm Phung Sang Aê Diê. Brei drei dôk êđăp ênang, kyuadah tơdah drei đăo sĭt kơ Khua Yang, drei jing phung anak klei mngač. Đăm brei arăng duah mplư drei hŏng ya mta klei ôh. Amâo mâo pô thâo ôh hruê mmông Khua Yang lŏ hriê ƀiădah hdruôm hră Klei Aê Diê Blŭ brei thâo tơdah Khua Yang lŏ hriê, jih jang mnuih srăng ƀuh klă msĕ si jih jang mnuih ƀuh Ñu đĭ wĭt kơ adiê mơh (Bruă Phung Khua Ƀĭng Kna 1:11). Brei drei dôk răng, hur har dlăng leh anăn hriăm Klei Aê Diê Blŭ grăp hruê. Klei Khua Yang Blŭ srăng mtrang mngač đru drei thâo kral ti jing klei blŭ luar leh anăn ti jing klei blŭ sĭt, kyuadah hruê anei knŏng hjăn hdruôm hră Klei Aê Diê Blŭ yơh jing klei bi êdah klă ênŭm hĭn mơ̆ng Aê Diê.
Si ngă diih hur har dlăng, hriăm leh ksiêm mĭn Klei Aê Diê Blŭ grăp hruê mơ̆?
Wah lač: Ơ Aê Diê Pô Kpă Ênô, đru kâo hur har dlăng, hriăm leh anăn ksiêm mĭn Klei Ih Blŭ grăp hruê čiăng kơ kâo amâo lĕ hlăm klei arăng mplư hŏng klei mtô soh ôh. Đru kâo thâo đru phung ayŏng adei kâo mbĭt sa ai khăp, leh anăn hriăm Klei Ih Blŭ čiăng thâo kral leh anăn weh đuĕ mơ̆ng phung khua pô hưn êlâo soh, pô mtô soh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
