Klei Aê Diê Blŭ: Klei Bi Hriêng 7:10-20
Êlan kliăng: “Gưt bĕ klei kâo mtă leh anăn ih srăng dôk hdĭp, mă pioh bĕ klei kâo mtă jing msĕ si asăr ală ih.” (Klei Bi Hriêng 7:2)
Klei êmuh ksiêm mĭn: Hưn thâo brei dŭm mta knuih, klei bi knăl mơ̆ng sa čô mniê knhông jing? Hruê anei, jih mta klei anei bi êdah hŏng si klei jing? Ya klei hưn êlâo brei drei răng čiăng kăp răng hlăm klei hdĭp drei grăp hruê?
Knuih tal êlâo mơ̆ng sa čô mniê knhông jing klei čŏng čuăn ngă (êlan 10). Êkei amâo duah ƀiădah mniê knhông pô yơh čŏng hriê duah. Lu mnuih hruê anei mĭndah pô jing ktang kjăp, ênuah ênô yơh hlăm klei khăp, snăn amâo srăng gun kpăk đuôm gam ôh hŏng mnêč ƀưi klei mplư klei bi khăp êkei mniê, ƀiădah diñu wơr bĭt hĕ Satan amâo dôk guôn diñu mŭt hlăm ƀưi ƀêč klei êkei mniê ôh, ƀiădah ñu srăng yua phung jing dŏ ñu, čŏng tui duah leh anăn nao mplư diñu (I Y-Pêtrôs 5:8). Kăp răng bĕ čiăng thâo kral leh anăn dưi găn klei mplư.
Mniê knhông ktŭng hrip êkei hŏng kdrăp ti êngao “hơô čhiăm ao msĕ si sa čô mniê knhông” (êlan 10). Mniê anei mâo ung leh (êlan 19) snăn amâo srăng čŭt hơô čiăng kơ arăng thâo kral ñu jing mniê knhông ôh, ƀiădah tinei lač klei ñu čŭt hơô amâo hgăm hgĕ, mčhur ai tiê. Klei dlăng ƀuh dưi atăt drei kơ klei soh, kyuanăn phung êkei đăo kơ Krist brei răng hŏng phung mniê čŭt hơô mčhur ai tiê, leh anăn phung mniê đăo kơ Krist brei mđing uêñ čŭt hơô hgăm hgĕ, ênuah ênô.
Mniê knhông jing mnuih mâo “ai tiê mnêč” (êlan 10). Mâo sa klei bi dră anăn jing, mniê knhông čŏng myưng hưn mdah asei mlei ƀiădah ñu mdăp mnêč hlăm ai tiê ñu. Mtao Y-Salômôn mtă mtăn kơ anak brei mâo klei thâo mĭn djă pioh klei mtô lač hlăm ai tiê (êlan 2) čiăng dưi tlaih mơ̆ng mniê mâo “ai tiê bŏ hŏng mnêč”. Mniê anei mâo ung leh ƀiădah dôk hdĭp amâo djŏ tui si klei jing sa čô mniê hlăm gŏ sang ôh, bi kdơ̆ng, tui duah nanao ya mta klei amâodah mnuih mkăn (êlan 11-12). Sa čô mniê đăo kơ Krist brei jing sa čô huĭ mpŭ kơ Khua Yang (I Y-Pêtrôs 3:1-4) čiăng kơ đăm lĕ ôh hlăm mnêč yang jhat mplư.
Mniê knhông wăt jing mnuih luar mgưt. Mniê anei lač kơ “mnơ̆ng myơr klei êđăp ênang” (êlan 14) čiăng ktŭng đoh êkei amâo djŏ hŏng klei êkei mniê ôh ƀiădah mbĭt hŏng mnơ̆ng ƀơ̆ng huă jăk, kyuadah hlăm mnơ̆ng myơr klei êđăp ênang, knŏng sa kdrêč điêt myơr kơ Aê Diê, bi kdrêč prŏng adôk anăn pioh kơ pô myơr (Bruă Lêwi 3 leh anăn 7). Leh anăn kyuadah ung ñu amâo ti sang ôh snăn ñu mplư, tơdah leh myơr mnơ̆ng myơr “brei drei bi mơak drei pô hŏng klei khăp!” (êlan 18-19). Anei knŏng jing klei đăo sa čô mnuih luar mgưt. Hruê anei, klei đăo kơ Aê Diê brei bi êdah hŏng klei drei mjing mah jiăng, duah prăk, čhĭ mnia, hlăp mdei, blei mnơ̆ng… brei drei hdơr snei, Khua Yang čiăng kơ drei myơr asei mlei drei jing mnơ̆ng myơr hdĭp leh anăn doh jăk, bi mơak kơ Ñu (Rôm 12:1). Brei grăp čô drei gưt klei mtă leh anăn djă pioh klei mtô mơ̆ng Khua Yang, čiăng dưi găn klei lông dlăng tơdah tuôm hŏng klei mplư.
Si ngă čiăng kơ drei thâo kral klei huĭ hyưt mơ̆ng phung mplư čiăng dưi găn?
Wah lač: Ơ Khua Yang, akâo Ih brei kâo mâo ai tiê dlăng phă Khua Yang leh anăn Klei Ih Blŭ, čiăng kơ kâo mâo klei thâo mĭn thâo kral klei mplư kbiă hriê mơ̆ng Satan čiăng bi lĕ kâo hlăm klei soh leh anăn čiăng kâo dôk kbưi hŏng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
