Klei Aê Diê Blŭ: Rôm 8:1-4
Êlan kliăng: “Kyuanăn ară anei hin amâo lŏ mâo klei bi kmhal ôh kơ phung dôk hlăm Krist Yêsu.” (Rôm 8:1)
Klei êmuh ksiêm mĭn: Ya klei mrâo mrang yuôm bhăn Khua ƀĭng kna Y-Pôl hưn? Si ngă Aê Diê doh jăk dưi bi mtlaih hĕ anak mnuih mơ̆ng klei bhiăn Ñu phat kđi leh kơ klei djiê? Si klei yuôm hŏng drei mơ̆ng klei mrâo mrang jăk siam anei?
Êdei kơ kjuh kdrêč hưn kơ klei soh leh anăn klei bi kmhal, kčưm mơ̆ng kdrêč 8, Khua ƀĭng kna Y-Pôl brei thâo, Aê Diê hưn kơ klei pap brei prŏng prĭn, amâo lŏ mâo klei bi kmhal ôh kơ phung dôk hlăm Krist Yêsu (êlan 1). Ñu mblang kơ klei bhiăn Yang Mngăt Jăk, klei hdĭp hrô leh kơ klei bhiăn hđăp arăng čih leh (Rôm 7:6). Klei bhiăn arăng čih jing klei bhiăn čiăng brei anak mnuih thâo kral anăn pia mta klei soh ngă leh, leh anăn klei bi kmhal jing klei djiê hlŏng lar. Jih jang mnuih kkiêng ti lăn ala anei luč klei čang hmăng, kyuadah amâo mâo ôh pô dưi djă pioh kluôm ênŭm klei bhiăn čiăng dưi yap jing kpă ênô. Ƀiădah Aê Diê jing klei khăp, Ñu bi mtlaih leh anak mnuih tlaih kơ klei rai luč, Ñu brei sa hdră êlan mkăn čiăng kơ mnuih dưi yap jing kpă ênô, hŏng bruă Khua Yang Yêsu bi tui klei soh.
Khua Yang Yêsu jing Aê Diê Pô Tal Dua trŭn hriê jing mnuih hlăm asei mlei kđeh mnuih čiăng ngă bruă hdră bi mtlaih phung mnuih. Mjing Ñu sa čô mnuih sĭt êmĭt ƀiădah amâo msĕ hŏng jih jang mnuih ôh, Ñu kluôm dhuôm amâo mâo klei soh ôh, knŏng hjăn sa Ñu yơh dưi ngă kluôm ênŭm klei bhiăn Aê Diê. Kyuadah jing kđeh mnuih, snăn Ñu tŭ leh klei bi kmhal arăng pơ̆ng ti kyâo bi kal, djiê hrô brei kơ klei soh anak mnuih (êlan 3). Khua Yang Yêsu brei leh Ñu Pô jing mnơ̆ng myơr ngă yang bi tui klei soh. Kyuadah Khua Yang Yêsu jing Aê Diê Pô yơh, kyuanăn klei Ñu djiê mâo ênoh yuôm dưi bi mtlaih jih jang hlei pô đăo kơ Ñu hlăm jih jang ênuk.
Knuih doh jăk Aê Diê mâo klei dưi wĭt ngă, klei ngêñ Ñu hŏng phung mnuih bi kdơ̆ng luč jih mliêt hlăk Khua Yang Yêsu tuč ai ti dlông kyâo bi kal. Klei čoh čuăn mơ̆ng klei bhiăn dưi ngă bi leh kluôm ênŭm hlăm drei, hŏng bruă Khua Yang Yêsu Krist bi tui leh klei soh. Êjai mmông sa čô mnuih mă tŭ Khua Yang Yêsu jing Pô Bi Mtlaih kơ ñu, Yang Mngăt Jăk klei hdĭp jing Pô mâo leh mơ̆ng mphŭn dơ̆ng (Klei Mphŭn Dơ̆ng 1:2) srăng dôk mbĭt, kđăm pô anăn jing dŏ Khua Yang Yêsu, brei kơ ñu klei ktang myang mâo klei čiăng leh anăn ngă hlue si klei Khua Yang Yêsu bi hmô. Ară anei jih jang mnuih dôk hlăm Khua Yang Yêsu, čiăng lač kơ phung đăo mă tŭ Khua Yang Yêsu jing Pô Bi Mtlaih kơ ñu, srăng dưi mâo klei Aê Diê yap kpă, amâo lŏ tŭ klei phat kđi ôh.
Bi mni kơ Khua Yang kyua klei khăp amâo dưi mkă ôh Ñu pioh brei kơ grăp čô drei. Hdră êlan bi mtlaih mơ̆ng Aê Diê doh jăk, khăp hơiêng, sĭt klă, năng kơ grăp čô drei myơr ai tiê đăo knang čiăng dưi tlaih kơ klei bi kmhal, mđrăm mbĭt hŏng klei anăn hdĭp klei hdĭp mrâo “Hdĭp amâo djŏ tui si kđeh ôh, ƀiădah tui si Yang Mngăt Jăk ” (êlan 4).
Si drei dôk hdĭp, leh Aê Diê brei tlaih leh mơ̆ng klei bi kmhal?
Wah lač: Ơ Khua Yang, bi mni kơ Aê Diê Tlâo Čô Yang pap brei leh kơ kâo, brei kâo tlaih mơ̆ng klei bi kmhal! Akâo kơ Yang Mngăt Jăk brei kơ kâo klei ktang myang čiăng dưi hdĭp mâo klei dưi hĭn hŏng klei soh leh anăn dưi jing msĕ si Ama kâo hlăm adiê hĭn grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 8-9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
