Loos 8:1-4
Nqe cim:
“Nimno tus uas nrog Yexus Khetos koom ib txojsia, tus ntawd yuav tsis raug txiav txim.” (Loos 8:1)
Peb saib ntxiv phau txhais tshiab.
“Vim li no tsis muaj kev rau txim rau tus uas nyob hauv Yexus Khetos” (Hmowsv).
Lus nug rau sawvdaws xav:
– Timthawj Paulus tshaj qhia tsab xov tseemceeb twg?
– Ua li cas Vajtswv tus uas dawbhuv cia li tso tibneeg dim tsis rau txim tuag rau tibneeg?
– Tsab xov zoo no muaj ntsiab lus rau peb li cas?
Xya tshooj ua ntej qhia txog txojkev txhaum thiab kev rau txim, hla mus rau tshooj 8, Timthawj Paulus qhia paub Vajtswv tso dim, tsis rau txim rau cov neeg uas nyob hauv Yexus Khetos lawm (nqe 1). Paulus txhais qhia Vaj Ntsujplig txoj Kevcai hloov txoj cai uas sau ua ntaub ntawv (Loos 7:6). Txoj Kevcai sau ua ntaub ntawv yog kevcai qhia tibneeg paub kev txhaum thiab lub txim yog kev tuag mus ibtxhis. Txhua tus neeg uas yug los hauv ntiajteb no puavleej tsis muaj kev cia siab, vim tsis muaj leejtwg muaj peevxwm coj tau txoj Kevcai kom ua tau neeg ncaj ncees li. Tiamsis Vajtswv yog tus uas muaj kev hlub, Nws cawm cov neeg puastsuaj, qhia lub tswvyim ua neeg ncaj ncees dhau los ntawm tus Tswv Yexus txojkev tuag txhiv.
Tswv Yexus yog lub Zwmtxwv Thib Ob ntawm Vajtswv Vaj Peb leeg los yug ua neeg cawm tibneeg ntiajteb dim. Nws muaj yam ntxwv yog tibneeg tiamsis Nws tsis ua txhaum, Nws yog tus uas ua tiav Vajtswv txoj Kevcai. Ntawm sab nqaij tawv, Nws raug ntsia saum ntoo khaublig, tuag theej tibneeg lub txim (nqe 3). Tswv Yexus muab Nws tus kheej ua qhov khoom fij cawm tibneeg. Vim Tswv Yexus yog Vajtswv, yog li Nws txojkev tuag muaj nqis cawm tau txhua tus uas ntseeg nyob txhua tiam neeg.
Vajtswv tus yamntxwv dawbhuv tiav, Nws txojkev chim rau cov neeg tawmtsam Nws ploj mus thaum Tswv Yexus nyo hau ntshis thiab tu siav nrho saum ntoo khaublig. Qhov uas txoj Kevcai yuam tau ua tiav los ntawm Tswv Yexus txojkev tuag txhiv. Thaum ib tug neeg txais yuav Tswv Yexus ua tus Tswv cawmseej hauv nws lub neej, Vaj Ntsujplig los nyob hauv tus ntawd lub siab (Chivkeeb 1:2) yuav nrog nws nyob, ua homthawj nias rau cov neeg uas yog Tswv Yexus tug, pub rau tibneeg ua tau raws li tus Cawmseej. Nimno cov neeg uas nyob hauv Yexus Khetos, txhais tau tias cov neeg uas ntseeg Tswv Yexus ua lawv tus Tswv, yuav tau Vajtswv tawm lus hais tias ncaj ncees, dim txim lawm.
Ua tus Tswv tsaug vim Nws txojkev hlub muab pub rau peb txhua tus. Vajtswv txojkev cawm peb dim dawbhuv, hlub, tseeb tsimnyog peb txhua tus ntseeg thiab txais yuav kom peb tau dim, thiab tau lub neej tshiab “tsis yog peb ua raws li peb lub siab qub qhia, tiamsis yog peb ua raws li Vaj Ntsujplig qhia.” (nqe 4).
Thov Vajtswv,
Tus Tswv, nyuam yaus ua Koj tsaug qhov uas koj hlub, pub rau nyuam yaus tau dim! Thov Vaj Ntsujplig pub kom nyuam yaus kovyeej txojkev txhaum thiab ua tau zoo li tus Tswv ua zuj zus. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb tabtom ua neej zoo li cas thaum tau Vajtswv tso dim?
Nyeem Vajluskub hauv peb lub xyoo: Pajlug 8-9
Kênh Youtube BHKTHN:
