Klei Aê Diê Blŭ: II Y-Timôthê 1:1-5
Êlan kliăng: “Kâo hdơr kơ klei ih đăo sĭt suôr. Klei đăo anăn hdĭp leh êlâo hlăm aduôn ih H’Lôis, leh anăn hlăm amĭ ih H’Ônis, leh anăn kâo thâo sĭt ară anei klei đăo anăn ăt hdĭp hlăm ih.” (II Y-Timôthê 1:5)
Klei êmuh ksiêm mĭn: Ya hdră êlan hgăm klei tŭ jing Khua ƀĭng kna Y-Pôl hlăm klei mtô mjuăt Y-Timôthê? Ya klei drei hriăm mơ̆ng Khua ƀĭng kna Y-Pôl čiăng dưi găn gao klei lông dlăng hlăm bruă čiêm rông mtô anak čô?
Khua ƀĭng kna Y-Pôl brei leh kơ drei hdră êlan hgăm hlăm bruă čiêm rông mtô anak čô kơ Khua Yang. tal sa, uêñ mĭn kơ klei đăo. Êkei hlăk ai Y-Timôthê hdĭp ti ƀuôn Listrơ krĭng Galati, amĭ jing sa čô Israel, ama jing sa čô Grĕk (Bruă Phung Khua Ƀĭng Kna 16:1). Mơ̆ng hlăk hđeh, ñu mâo amĭ leh anăn aduôn mtô bi hriăm Klei Aê Diê Blŭ Klei Bi Mguôp Hđăp klă mngač (II Y-Timôthê 1:5; 3:15). Hlăm wir hiu hưn Klei Mrâo Mrang Jăk tal sa, Khua ƀĭng kna Y-Pôl đru leh ñu jing sa čô đăo kơ Krist, leh anăn uêñ mĭn ktuê dlăng mjeh klei đăo anak ñu hlăm klei hdĭp mngăt ñu rah leh dôk đĭ hriê kơ prŏng.
Tal dua, hŏng jih ai tiê čiêm rông klei đăo kơ anak. Klei čiêm rông klei đăo kčưm dơ̆ng mơ̆ng klei uêñ mĭn kơ asei mlei kđeh truh kơ knuih anak. Ñu bi mđĭ ai anak răng kriê bi jăk klei suaih asei mlei (I Y-Timôthê 5:23), đru anak brei dưi hŏng klei blao čiăng đăm arăng dlăng hơăi mang (I Y-Timôthê 4:12). Ñu brei anak ñu dưi tui hlue ñu hlăm wir hiu hưn Klei Mrâo Mrang Jăk tal dua čiăng ktrâo atăt ñu; tiŏ nao gơ̆ bi ala kơ ñu čiăng mgaih msir đa đa mta klei mâo hlăm Phung Sang Aê Diê (Philip 2:19; I Têsalônik 3:2). Boh nik nak, Khua ƀĭng kna Y-Pôl lui brei Y-Timôthê dôk hŏng Phung Sang Aê Diê Êphêsô msĕ si sa čô mgăt biăp, kiă kriê lu mta bruă ngă mdê mdê hlăm Phung Sang Aê Diê (I Y-Timôthê 1:3). Êngao kơnăn, ñu lŏ yua klei kơhưm ñu čiăng hưn Y-Timôthê hŏng jih jang mnuih. Hlăm klei blŭ kčưm hưn mdah pô čih dua păn pŏk hră mơĭt kơ Phung Sang Aê Diê, mâo leh truh kơ êma pŏk hră mơĭt Khua ƀĭng kna Y-Pôl dưm mbĭt anăn Y-Timôthê hlăm anăn.
Tal tlâo, bi mđĭ ai anak găn gao klei lông dlăng klei đăo. Khua ƀĭng kna Y-Pôl yua leh klei hdĭp ñu pô ngă klei bi hmô kơ anak ñu. Hlăk dôk hlăm war mnă knhal tuč leh anăn thâo arăng dơ̆ng ba bi mdjiê ñu, ñu čih hră tal knhal tuč bi mđĭ ai Y-Timôthê “mtô klei Aê Diê blŭ, brei ih gĭr thâodah mông găl amâodah amâo găl ôh, mblang bi klă, ƀuah, mđĭ ai, đăm kƀah ôh klei gĭr leh anăn klei mtô.” (II Y-Timôthê 4:2). Klah čŭn, Khua ƀĭng kna Y-Pôl tŭ jing leh hlăm klei rông ba mtô anak ñu hlăm klei hdĭp mngăt, jing sa čô kahan ktang hlăm kdrăn blah klei hdĭp mngăt.
Ala ƀuôn ƀrư̆ mâo klei êngiê, klei mčah rai hlăm gŏ sang ƀrư̆ lu hĭn, klei lông dlăng hlăm bruă rông ba mtô anak čô tui hlue Klei Aê Diê Blŭ ktang hĭn mơh. Grăp čô drei thâodah amĭ ama kkiêng amâodah amĭ ama rông, amâodah aê aduôn, amĭ ama neh aprŏng, wăt phung amĭ ama hlăm ai tiê klei mĭn dưn, brei drei hriăm mơ̆ng Khua ƀĭng kna Y-Pôl čiăng thâo uêñ mĭn, čiêm rông klei đăo kơ anak čô leh anăn bi mđĭ ai diñu dôk kjăp hlăm klei đăo. Wăt tơdah mâo lu klei lông dlăng ƀiădah knang bĕ kơ klei pap Khua Yang čiăng dưi rông ba mtô anak čô jing phung kahan ktang kơ Khua Yang Yêsu.
Drei dôk uêñ mĭn rông ba mtô anak čô hlăm ya kdrêč bruă?
Wah lač: Ơ Khua Yang, bi mni Khua Yang kơ dŭm klei hriăm dưi găn gao klei lông dlăng, čiăng rông ba mtô anak čô jing phung kahan ktang kơ Khua Yang. Akâo Khua Yang brei kâo uêñ mĭn êlâo hĭn, čiêm rông leh anăn bi mđĭ ai klei đăo anak čô kâo lu hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
