II Timautes 1:1-5
Nqe cim:
“Kuv nco ntsoov hais tias koj muab siab rau ntseeg ib yam li koj pog Lau-is thiab koj niam Enikes. Nimno kuv cia siab hais tias koj tseem muab siab rau ntseeg” (II Timautes 1:5).
Lus nug rau sawvdaws xav:
– Lub tswvyim pab Timthawj Paulus qhuab ntuas, cob qhia tau Timautes yog dabtsi?
– Peb kawm tau dabtsi ntawm Timthawj Paulus kom tiv dhau tej kev sim siab hauv kev tu qhia menyuam?
Timthawj Paulus qhia rau peb paub lub tswvyim pab peb tu qhia tau menyuam rau tus Tswv. Thib ib, txhawj txog menyuam kev ntseeg. Tus tub hluas Timautes ua neej nyob hauv nroog Lixathas uas yog Kalatias cheebtsam av, nws muaj niam yog neeg Henplais, txiv yog neeg Kilis (Tes Haujlwm 16:1). Txij thaum me los, Timautes tau nws niam thiab niam tais qhia paub txog Vajluskub zoo heev (II Timautes 1:5; 3:15). Nyob hauv ntsug kev xa Moozoo thib ib, Timthawj Paulus tau coj Timautes los ntseeg Yexus, thiab nws saib ntsoov nws tus tub sab ntsujplig lub noob kev ntseeg tau cog lawm yuav nrha kaus zoo li cas.
Thib ob, tas siab tu menyuam txojkev ntseeg. Kev tu menyuam txojkev ntseeg pib ntawm txhawj txog sab nqaij tawv mus rau tus cwjpwm. Nws ntuas menyuam txog kev noj qab haus huv (I Timautes 5:23), pab menyuam hloov tus cwjpwm kom tsis raug lwm tus thuam (I Timautes 4:12). Timthawj Paulus cia menyuam nrog nws mus xa Txojmoo Zoo zaug ob kom tau cob qhia; nws txib menyuam sawv cev ntawm nws mus daws cov Pawg Ntseeg tej teebmeem (Filipis 2:19; I Thexalaunikes 3:2). Qhov tshwjxeeb, Timthawj Paulus cia Timautes nyob hauv Pawg Ntseeg Efexus zoo li ib tug tswv yug yaj, txhawj txog txhua tes haujlwm hauv Pawg Ntseeg (I Timautes 1:3). Tsis tas li ntawd xwb, nws tseem siv nws lub hwjchim los qhia txog Timautes rau lwm tus. Nyob hauv tej lus qhib thawj ntawm 9 tsab ntawv xa mus rau cov Pawg Ntseeg, twb muaj txog 5 tsab ntawv uas Timthawj Paulus sau tawm Timautes lub npe.
Thib peb, txhawb menyuam zog hla dhau tej kev sim siab sab kev ntseeg. Timthawj Paulus tau siv nws lubneej los ua qauv rau menyuam xyaum. Thaum raug kaw hauv tsev lojcuj zaum kawg thiab paub hais tias yuav raug luag muab tua, nws tau sau tsab ntawv kawg txhawb Timautes lub zog hais tias: “Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog” (II Timautes 4:2). Hais tau hais tias, Timthawj Paulus twb ua tiav tes haujlwm tu qhia nws tus tub sab ntsujplig dhau los ua ib tug tubrog zoo nyob hauv pluav rog sab ntsujplig lawm.
Tibneeg yim nyob ywjpheej, ces kev puastsuaj hauv lub cuabyig yim ntau, kev sim siab hauv kev tu qhia menyuam ua raws Vajtswv Txojlus qhia yim loj. Peb txhua tus txawm yog niam txiv, pog yawg, tus txheeb tus ze, lossis tsuas yog niam txiv sab ntsujplig, los yuav tsum kawm xyaum Timthawj Paulus tus qauv paub hmov tshua, tu qhia thiab txhawb menyuam lub zog hauv txojkev ntseeg. Txawm yuav muaj ntau yam kev sim siab los peb yuav tsum vamkhom tus Tswv txoj koobhmoov tu qhia menyuam dhau los ua Tswv Yexus cov tubrog uas zoo.
Thov Vajtswv,
Tus Tswv, nyuam yaus ua Koj tsaug vim tej zaj kawm hla dhau kev sim siab tu qhia menyuam dhau los ua cov tubrog zoo rau Koj. Thov qhia nyuam yaus paub hmov tshua, tu qhia thiab txhawb tej menyuam txojkev ntseeg heev dua qhov qub. Nyuam yaus tuav Yexus Khetos lub npe thov, Amees.
Peb tabtom tu qhia menyuam mus rau seem twg?
Nyeem Vajluskub hauv peb lub xyoo: Levis Kevcai 2
Kênh Youtube BHKTHN:
