Klei Aê Diê Blŭ: Klei Mphŭn Dơ̆ng 38:27-30
Êlan kliăng: “Aê Diê brei klei bhiăn čiăng kơ mnuih ƀuh klei soh jing lu hĭn; ƀiădah ti anôk klei soh jing lu hĭn, klei pap jing lu kdlưn hĭn mơh;” (Rôm 5:20)
Klei êmuh ksiêm mĭn: Mâo dŭm čô mniê mâo anăn hlăm phung aê aduôn Khua Yang Yêsu (Y-Mathiơ 1)? Ya ngă Khua Yang ruah phung mniê anei dưm hlăm phung aê aduôn Khua Yang Yêsu? Si klei anei bi mđĭ ai drei, boh nik nak leh ngă soh amâodah dluh lĕ?
Y-Pêres jing sa hlăm dua čô anak ƀă kmar mơ̆ng klei ngă soh knhông Y-Yuđa hŏng mtâo mniê ñu H’Tamar. Anei jing sa klei hêñ mlâo ƀiădah H’Tamar leh anăn Y-Pêres jing hĕ mnuih mâo klei ruah, mơ̆ng anăn kkiêng kơ mtao Y-Đawit leh anăn ăt jing găp djuê ba Khua Yang hriê ti lăn ala mơh. Răk wĭt anăn phung aê aduôn Khua Yang Yêsu hlăm hră Y-Mathiơ kdrêč 1, drei ƀuh mâo êma čô mniê, hlăm anăn mâo H’Tamar jng mnuih Kanaan, ngă klei soh knhông hŏng kmha ñu pô. Anei jing sa klei mdê hĭn êdi, kyuadah phung Israel dlăng amâo mpŭ ôh kơ phung mniê, kyuanăn păt čiăng jih anăn phung aê aduôn hlăm Klei Bi Mguôp Hđăp amâo mâo anăn phung mniê ôh, êngao hlăm Klei Mphŭn Dơ̆ng 4:19 mâo anăn dua čô mô̆ Y-Lamek, ƀiădah anei jing anăn phung aê aduôn Y-Kain amâo mâo huĭ mpŭ kơ Aê Diê.
Klei kkiêng kơ Y-Pêres brei kơ drei sa klei hriăm hlăm klei hdĭp mngăt yuôm bhăn, anăn jing Aê Diê dôk kiă kriê ti dlông jih jang klei, leh anăn Ñu dưi bi mlih wăt klei jhat dưi jing klei tŭ dưn (Rôm 8:28). Klei anei đru drei mâo klei êđăp ênang êjai tlă anăp hŏng jih jang klei găn truh hlăm klei hdĭp, tơl wăt klei mluk mgu drei, kyua klei pap brei Aê Diê ăt kiă kriê čiăng ba klei tŭ dưn kơ hlei pô mâo ai tiê thâo kmhal leh anăn lŏ wĭt hŏng Khua Yang.
Tĭng nah mkăn, drei ăt thâo kral mơh klei pap Aê Diê jing prŏng hĭn kơ jih jang (Rôm 5:20-21). Y-Yuđa, mtao Y-Đawit, khua ƀĭng kna Y-Pêtrôs… amâo jing phung doh jăk kluôm dhuôm ôh, jih jang ngă soh sơăi, leh anăn kyua klei pap Khua Yang bi mtlaih leh leh anăn yua diñu jing mnơ̆ng yua ngă bruă prŏng prĭn hlăm kngan Ñu. Hlei bĕ drei jing, tơl si hnơ̆ng klei jhat drei, Khua Yang ăt pap brei mơh, khă bi drei hmiêt mkăp dưm drei pô hlăm klei pap leh anăn klei Aê Diê pap brei. Jih jang mnuih jing soh sơăi, mta phŭn jing drei thâo mjưh, thâo kmhal, čiăng kơ boh tŭ jhat mơ̆ng klei soh amâo lŏ bi rai drei pô, gŏ sang, phung anak drei, leh anăn wăt Phung Sang Aê Diê msĕ mơh!
Djuê ana Khua Yang Yêsu čih hlăm anăn phung aê aduôn, brei ƀuh klei Ñu luă gŭ, bi ti gŭ Pô dơ̆ng mơ̆ng hlăk kkiêng kơ Ñu. Brei drei thâo ƀuh kơ drei jing hơăi mang, êngao kơ klei jing sa čô mnuih soh jhat mă tŭ klei pap Khua Yang, čiăng kơ drei dôk hdĭp luă gŭ ti anăp Khua Yang leh anăn ayŏng amai adei pô. Tơdah tram drei hlăm klei pap Khua Yang, drei mă tŭ klei ktang dưi găn gao jih klei lông dlăng hlăm gŏ sang čiăng kơ gŏ sang drei tŭ dưn kơ Khua Yang nanao.
Si ngă drei thâo kral mơ̆ klei pap Khua Yang êbeh dlai ti dlông drei pô leh gŏ sang drei?
Wah lač: Ơ Khua Yang, bi mni kơ Khua Yang kyua klei pap Ih êbeh dlai kơ kâo tơdah Ih ruah kâo, bi mtlaih kâo, leh anăn pap brei klei soh kâo. Akâo Khua Yang brei kâo dưi găn gao jih klei lông dlăng hlăm gŏ sang čiăng kơ jih sang kâo hdĭp klei hdĭp khăp kơ Khua Yang leh anăn myơr klei hdĭp kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
