Chivkeeb 38:27-30
Nqe cim:
“Thaum muaj txoj Kevcai lawm sawvdaws hajyam ua txhaum; tiamsis qhov twg muaj kev txhaum, Vajtswv txojkev hlub hajyam muaj nyob qhov ntawd” (Loos 5:20).
Lus nug rau sawvdaws xav:
– Muaj pestsawg tus pojniam muaj npe nyob hauv ntawv teev Tswv Yexus cov yawg koob tej npe (Mathais 1)?
– Vim licas tus Tswv xaiv cov pojniam no los nyob hauv ntawv teev Tswv Yexus cov yawgkoob tej npe?
– Qhov no txhawb peb lub zog licas, tshwjxeeb yog thaum ua txhaum lossis raug teebmeem?
Peles yog ib tug ntawm ob tug menyuam ntxaib uas muaj los ntawm kev txhaum ntawm Yudas thiab nws tus nyab Tamaj. Ntawm no yog ib qho kev txajmuag tiamsis Tamaj thiab Peles ho yog cov neeg tau xaiv, kom dhau los ntawm caj ces no yug tau Vajntxwv Daviv thiab kuj yog cajces uas Yexus los yug ua neeg. Rov nyeem ntawv teev Tswv Yexus cov yawgkoob tej npe nyob hauv Mathais 1, peb pom txog 5 tug pojniam lub npe, nyob hauv muaj Tamaj uas yog neeg Kana-as, ua txhaum pw nrog nws txivyawg. Ntawm no yog ib qhov uas tshwjxeeb heev vim cov neeg Yudais yeej tsis saib hlob pojniam yog li ntawd feem ntau tej ntawv teev cajces hauv Vajluskub Qub puavleej tsis sau cov pojniam tej npe, tsuas yog hauv Chivkeeb 4:19 thiaj sau txog Lamej ob tug pojniam xwb, tiamsis ntawd yog sau txog Ka-ees cajces uas tsis hwm tus Tswv.
Qhov uas Peles los yug qhia rau peb ib zaj tseemceeb sab ntsujplig, ntawd yog Vajtswv yog tus tabtom tswjkav txhua yam thiab Nws muaj peevxwm hloov tau yam phem los ua yam muaj nqis (Loos 8:28). Qhov no pab peb muaj kev qab siab nyob hauv txhua lub tsamthawj ua neej, txawm yog nyob hauv peb txojkev ruam los Vajtswv txojkev hlub yeej tseem nyob nrog nraim, ua muaj nqis rau cov uas paub tso kev txhaum tseg tig los cuag Nws.
Tsis tas li ntawd xwb, peb kuj zeem paub hais tias Vajtswv txojkev hlub loj dua txhua tsav yam (Loos 5:20-21). Yudas, Vajntxwv Daviv, Timthawj Petus… tsis yog cov neeg dawbhuv zoo kawg nkaus, lawv puavleej tau ua txhaum, thiab los ntawm tus Tswv txojkev hlub tau cawm thiab siv lawv los ua tej cuabyeej loj hauv Nws txhais tes. Txawm peb yuav yog leejtwg, phem qias npaum cas, los tus Tswv yeej zam txim yog hais tias peb txaus siab tso tus kheej rau hauv Nws txojkev hlub. Leejtwg los kuj muaj qhov txhaum, tiamsis tseemceeb yog peb paub tso tseg, lees txim kom kev txhaum cov taug thiaj tsis ua rau peb tus kheej, tsevneeg, cov menyuam thiab Pawg Ntseeg raug kev puastsuaj!
Dhau ntawm Tswv Yexus cov yawgkoob uas sau tseg hauv ntawv teev cajces qhia pom txog Nws kev txo hwjchim txij puag thaum Nws los yug. Peb yuav tsum zeem paub hais tias tus kheej tsis tseemceeb dabtsi, tsuas yog ib tug neeg txhaum uas tau txais tus Tswv txojkev hlub xwb, peb thiaj yuav ua tau lubneej txo hwjchim tabmeeg tus Tswv thiab peb tej kwvtij. Thaum peb tau tsau tsawv hauv tus Tswv txojkev hlub, peb yuav tau txais dag zog tiv dhau tej kev sim siab hauv lub cuabyig kom ua neej muaj nqis pub rau tus Tswv.
Thov Vajtswv,
Tus Tswv, nyuam yaus ua Koj tsaug, vim txojkev hlub loj kawg nkaus Koj tau xaiv, cawm, thiab zam nyuam yaus tej kev txhaum. Thov pab nyuam yaus tiv dhau tej kev sim siab hauv lub cuabyig kom nyuam yaus tsevneeg paub hlub thiab ua haujlwm rau Koj mus tas simneej. Nyuam yaus tuav Yexus Khetos lub npe thov, Amees.
Peb puas zeem paub tus Tswv txojkev hlub loj kawg nkaus pub rau peb tus kheej thiab lub cuabyig lawm tau?
Nyeem Vajluskub hauv peb lub xyoo: Levis Kevcai 1
Kênh Youtube BHKTHN:
