Pajlug 21:16-18; Loos 6:15-23
Nqe cim
“Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tus Tswv los” (Loos 6:23).
Lus nug rau sawvdaws xav:
– Nuj nqis ntawm txhua tes haujlwm ua hauv kev txhaum yog dab tsi?
– Los ntawm qhov twg Vajtswv cov menyuam tau los ua qhev rau kev ncaj ncees?
– Ua li cas kom peb thiaj mus tau kawg tus Tswv txoj kev ncaj ncees?
Pajlug 21:16-18 qhia hais tias tus neeg ua phem yuav tau sau tej nujnqis uas nws ua. Nws tsis nyiam taug tus Tswv txoj kev ncaj ncees, tso txoj kev txawjntse tseg xaiv taug txoj kev txhaum. Qhov nuj nqis uas nws mus yuam kev yog “txojkev tuag nyob tos rawv”, nws yuav nrog cov neeg tuag nyob ua ke (nqe 16). Muaj qee tus neeg twb tsimnyog nrhiav kawm Vajtswv txoj kev ncaj ncees thiab nrhiav kev zoo siab hauv tus Tswv Txoj Kevcai tiamsis nws ho mus qaug rau kev lomzem, kev ua si, kev quav dej quav cawv. Thaum dhau txoj kev qaug cawv lawm, teebmeem haj yam muaj ntau tuaj, kev pluag loj zuj zus ntxiv, lub neej tsaus ntuj zuj zus (nqe 17). Thaum kawg tus neeg phem yuavtsum pauj nws kev txhaum, tej kev phem, kev ua tsis ncaj rau tus neeg ncaj ncees lawm ces nws yuav tau sau rov qab. Lawv nrhiav txhua txoj haukev coj tus neeg ncaj ncees mus kev tuag ces tamsim no lawv yuavtsum tuag hloov tus neeg ncaj ncees. Nqe 18 rov hais dua vajntxwv Xalumoos tej lus qhia hais tias: “Cov neeg ncaj ncees tau txais kev cawm dim; cov neeg siab phem yuav raug kev puastsuaj” (Pajlug 11:8). Tus neeg phem yuavtsum ris txoj kev tuag uas nws ua rau tus neeg ncaj ncees. Tiamsis tus neeg ncaj ncees Vajtswv yuav cawm nws dim.
Nyob rau hauv Loos 6:15-23, timthawj Paulus ntuas Vajtswv cov menyuam yuavtsum khiav deb txoj kev txhaum, tsis txhob ua kev txhaum qhev ntxiv lawm vim kev ua phem thaum kawg yog kev tuag. Vajtswv cov menyuam yuavtsum zeem paub hais tias vim Vajtswv kev hlub, koob hmoov Nws cawm peb dim kev txhaum kom tsis ua kev txhaum qhev ntxiv lawm. Tamsim no peb dhau los ua qhev rau kev ncaj ncees, yuavtsum vamkhom Vajtswv kom ua neej ncaj ncees thiab dawbhuv. Hauv Tswv Yexus Khetos peb tau tso dim tawm hauv txoj kev txhaum los, lub neej hloov dua tshiab thiab thaum kawg tau txojsia ib txhis.
Thov Vajtswv pab kom thaum peb tau Vaj Ntsujplig ntuas, ceebtoom txog kev txhaum peb tig los lees txim kiag tamsim rau Vajtswv. Vamkhom Vaj Ntsujplig kev nplig siab, txhawb zog kom peb mus kawg tus Tswv txoj kev thiab nco ntsoov hais tias: “…Nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tus Tswv los” (Loos 6:23). Tsis txhob qaug rau txoj kev lomzem hauv lub ntiajteb no tiamsis cia li taug tus Tswv txoj kev ncaj ncees peb yuav muaj kev kaj siab, txaus siab nyob rau tiam no thiab yuav muaj txojsia ib txhis saum Ntuj Ceebtsheej.
Thov Vajtswv,
Tus Tswv, thov zam txim rau nyuam yaus tej kev xav thiab tes haujlwm ua uas yog kev txhaum. Thov pab nyuam yaus kom tsis txhob qaug rau txoj kev lomzem hauv lub ntiajteb no tiamsis cia li taug tus Tswv txoj kev ncaj ncees mus kom kawg nyuam yaus thiaj muaj kev kaj siab, txaus siab, thiab muaj txojsia ib txhis. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Puas muaj txoj kev phem twg, txoj kev lomzem twg ua rau peb tsis xav taug tus Tswv txoj kev ncaj ncees?
Nyeem Vajluskub hauv peb lub xyoos: Mathais 22
Kênh Youtube BHKTHN:
