Pajlug 14:1
Nqe cim:
“Tus pojniam uas muaj tswvyim tuav tau nws lub cuab lub yig nyob ruaj ntseg, tiamsis tus pojniam ruam muab nws lub cuab lub yig rhuav povtseg.” (Pajlug 14:1).
Lus nug rau sawvdaws xav:
– Ib tus pojniam cheemtsum muaj tus cwjpwm li cas los txhim tsa lub cuab yig?
– Tus cwjpwm no pab tau lub tsev neeg hla dhau tej ntu sijhawm uas muaj kev txomnyem li cas?
– Peb yuavtsum ua li cas thiaj tau ib lub tsev neeg zoo thiab muaj kev hlub?
Vajluskub hais meej txog feem xyuam ntawm tus txiv hauv lub tsev neeg yog ua tswv thiab kav (Efexus 5:22-26), txawm li ntawd los txhua tus hauv lub tsev neeg puavleej muaj feem koom tes txhim kho tsev neeg nyob sib hlub. Vajntxwv Xalumoos qhia hais tias, ib tus pojniam nws yuav “txhim kho” lossis “rhuav” lub cuabyig yog nyob ntawm nws tus cwjpwm. Lolus “cuabyig” tsis yog hais txog lub vaj tse xwb tiamsis yog hais txog txhua fab hauv lub tsev neeg kev ua neej nrog tebchaws, kev khwv noj haus, kev hlub, kev ntseeg, thiab tshwjxeeb yog pab kom txhua tus hauv lub tsev neeg sib hlub, sib ncawg nyob taus ua ke. “Tus pojniam uas muaj tswvyim” tsis yog nquag txhim kho lub cuabyig xwb tiamsis nws tseem muab txhua yam uas cheemtsum ntawm sab ntsujplig thiab sab siab ntsws pub rau tsev neeg huv tibsi. Txhua yam uas nws ua yog vim ua rau lub tsev neeg nkaus xwb. Tiamsis “tus pojniam ruam” txawm yog nws nrhiav tau nyiaj txiag ntau pub rau lub tsev neeg, muaj txaus txhua yam siv ntawm sab nqaij tawv tiamsis nws “rhuav” nws lub tsev neeg sab siab ntsws thiab sab ntsujplig. Txhais hais tias, nws txhais tes rhuav nws lub tsev neeg thiab tej uas nws muaj pov tseg ntag.
Li cas thiaj yog ib “Tus pojniam uas muaj tswvyim”? Phau ntawv Pajlug qhia hais tias, yog tus uas hwm tus Tswv (Pajlug 9:10), cia siab thiab ua neej raws li tus Tswv lub siab nyiam (Pajlug 3:5). Yog li ntawd, txhim kho lub neej ntawm sab ntsujplig yog yam uas tus pojniam thiab txhua tus hauv lub tsev neeg yuavtsum tau xub ua, ua ntej huv tibsi. Lub tswvyim uas los ntawm Vajtswv los cheemtsum muaj txhua lub sijhawm, tshwjxeeb yog thaum uas muaj tej teebmeem tuaj raug, rau lub neej txij nkawm xws li: tawm tswvyim sib txhawv, kev coj noj coj ua tsis sib thooj, txhua tus hauv tsev neeg ib tus xav lawm ib yam thiab tej teebmeem ntawm kev siv nyiaj txiag… Yog peb loj hlob ntawm sab ntsuplig thiab mloog tus Tswv lus lawm peb daws tsis nyuaj thiab daws tau haum Vajtswv siab. Tiamsis yog tsis paub hwm tus Tswv, txhua tus hauv lub tsev neeg nyias ua raws nyias siab nyiam, khav theeb, qia dub, tsis muaj kev hlub, tsis zam txim … ces yuav muab lub tsev neeg “lub cuab lub yig rhuav povtseg.” Yog li ntawd, peb txhua tus yuavtsum txo hwjchim, nrhiav Vajtswv thiab thov Nws pub lub tswvyim uas yog Nws li (Yakaunpaus 1:5) los txhim kho lub tsev neeg kom ua neej zoo thiab sib hlub.
Thov Vajtswv,
Vajtswv, nyuam yaus ua Koj tsaug uas Koj pub rau nyuam yaus muaj ib lub tsev neeg. Thov tus Tswv pab nyuam yaus thiab tsev neeg paub nrhiav Vajtswv lub tswvyim kom txhua tus txawj los txhim kho lub cuabyig thiab ua neej nyob sib hlub. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tabtom “txhim kho” lossis “rhuav” peb lub tsev neeg?
Nyeem Vajluskub hauv peb lub xyoos: Mathais 1
Kênh Youtube BHKTHN:
