Klei Aê Diê Blŭ: Klei Bi Êdah 2:4-5
Êlan kliăng: “Snăn hdơr bĕ mơ̆ng anôk ih lĕ buh leh, kmhal bĕ, leh anăn lŏ ngă bruă ih ngă tal êlâo …” (Klei Bi Êdah 2:5a)
Klei êmuh ksiêm mĭn: Si klei Khua Yang Yêsu lač leh kơ Phung Sang Aê Diê Êphêsô? Ya klei brei diñu ngă čiăng lŏ duah klei khăp tal êlâo? Ya klei diih hriăm kơ bruă mkra mjuăt klei hdĭp mngăt čiăng djă pioh ai tiê khăp kơ Khua Yang?
Čih hră mơĭt kơ Phung Sang Aê Diê Êphêsô, Khua Yang Yêsu mni kơ klei suăi dleh diñu, kơ klei diñu ăt răng mgang djă pioh kjăp klei bhiăn klei đăo leh anăn knhuah hdĭp phung đăo hŏng klei hur har (Klei Bi Êdah 2:2-3). Ƀiădah lĕ, êngao kơ klei mni anăn, Khua Yang ƀuah diñu “ih lui leh klei khăp ih mâo tal êlâo” (êlan 4). Klei bi knăl Phung Sang Aê Diê Êphêsô mâo mơ̆ng hruê tal êlâo jing klei khăp êdimi kơ Khua Yang tơl khua ƀĭng kna Y-Pôl iêô kơ diñu jing phung “Brei klei pap Aê Diê dôk mbĭt hŏng jih jang phung khăp kơ Khua Yang drei Yêsu Krist hŏng klei khăp hlŏng lar.” (Êphêsô 6:24). Ƀiădah hơưi êdi, êdei kơnăn sa wưng, năng ai êjai ngă bruă bi mđĭ kiă kriê mkra mjing, diñu bi luč hĕ klei khăp diñu mâo tal êlâo hŏng Khua Yang.
Khua Yang Yêsu yak čuăn kơ Phung Sang Aê Diê Êphêsô lŏ duah klei khăp tal êlâo hŏng bruă mkra mjuăt klei hdĭp mngăt: hdơr bĕ, kmhal bĕ, lŏ ngă (êlan 5). Jih klei mkra mjuăt klei hdĭp mngăt amâo djŏ ôh jing hdră mkra, bruă ngă brei diñu djă pioh, ƀiădah jing klei bi hriăm mjuăt mơ̆ng lam ai tiê čiăng lŏ bi trơ̆ng klei êpa mhao pioh kơ Khua Yang diñu bi luč hĕ leh.
Khua Yang čiăng diñu “hdơr bĕ” – ksiêm mĭn kơ wưng tal êlâo diñu mrâo bi tuôm hŏng Khua Yang, hdơr wĭt kơ klei hơ̆k mơak bŏ dlai hlăk tal êlâo diñu dôk hlăm Khua Yang. Khua Yang čiăng diñu “kmhal bĕ” – thâo kral ya kdrêč bruă hlăm klei hdĭp jing êăt leh, ênguôt hnĭng kơ klei thu krô klei hdĭp mngăt pô, leh anăn êpa mhao lui hĕ, bi mlih. Khua Yang čiăng diñu “lŏ ngă” – ngă jih ya bruă diñu ngă leh hlăk hruê tal êlâo diñu mrâo nao kơ Khua Yang. Năng ai hlăk anăn diñu ka thâo bruă ôh, ka thâo si kah mbha, mtô mblang, mmuñ atăt, mđăo Klei Aê Diê Blŭ… Ya mta klei diñu thâo hlăk anăn knŏng jing klei wah lač tuh êyuh hŏng jih ai tiê, klei kkuh mpŭ, tui duah Khua Yang, khăp čiăng kơ Klei Aê Diê Blŭ. Ƀiădah anăn yơh jing klei Khua Yang čiăng diñu “lŏ ngă”.
Năng ai hruê anei, hlăm knhuang êlan tui hlue Khua Yang, drei brei bruă knuă bi kpăk gun, amâo lŏ mđing, amâodah kyua lu đei mta bruă ngă kơ Khua Yang bi kgăn, drei bi luč hĕ klei khăp leh anăn klei hur har drei pioh kơ Khua Yang hlăk wưng tal êlâo. Leh anăn tơdah amâo mâo kmhal, ênưih snăk drei knŏng adôk mă rup klei đăo ti êngao đuč yơh. Khua Yang čiăng drei dưi găn gao klei lông dlăng hlăm klei hdĭp čiăng mkra mjuăt klei hdĭp mngăt, amâo djŏ ôh lŏ thiăm mđĭ hĭn hdră bruă lu bŏ leh hlăm hdră bruă ngă drei, ƀiădah Khua Yang čiăng drei dưm ai tiê klei mĭn kơ Khua Yang, čiăng dưi djă pioh nanao hlŏng lar klei khăp leh anăn klei bi mguôp suôr tliêr hŏng Khua Yang.
Si ngă drei brei bruă knuă bi kgăn leh anăn bi luč hĕ klei khăp tal êlâo hŏng Khua Yang mơ̆?
Wah lač: Ơ Khua Yang, akâo Ih pap brei kơ kâo kyuadah lui ai tiê kâo jing êăt. Akâo Ih đru kâo čŏng čiăng mkra mjuăt klei hdĭp mngăt msĕ si mnơ̆ng yua čiăng dưi nao giăm Ih hĭn, čiăng kơ êlah pui klei khăp hlăm ai tiê kâo lŏ ngur leh anăn ăt trơ̆ng nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Kbiă 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
