Klei Aê Diê Blŭ: Klei Bi Hriêng 25:26-27
Êlan kliăng: “Mnuih kpă lĕ hlăm klei mnuih ƀai mplư jing msĕ si kbăng êa êkăl amâodah akŏ êa arăng bi čhŏ.” (Klei Bi Hriêng 25:26)
Klei êmuh ksiêm mĭn: Ya mta klei mtao Y-Salômôn mñă kơ “mnuih kpă”? Ya ngă “mnuih kpă” ư ai hĕ mbĭt hŏng “mnuih ƀai”? Ya klei diih thâo kral kơ bruă klam pô (dlăng thiăm Y-Mathiơ 5:13-16)?
Wăt tơdah grăp čô srăng klam mă kơ klei hdĭp ñu pô ƀiădah đăm wơr bĭt ôh mâo nanao klei bi hmăi ti krah drei pô hŏng phung riêng gah. Mtao Y-Salômôn mtô snei, “mnuih kpă” brei răng snăk čiăng đăm “lĕ hlăm klei mnuih ƀai mplư”. “Lĕ” mblang jing êbuh, phưi jang, ring rang. Snăn, “mnuih kpă lĕ hlăm klei mnuih ƀai mplư” tơdah mnuih anăn amâo jhŏng hdĭp kpă ênô, ƀiădah ư ai mbĭt leh anăn phưi jang hŏng “mnuih ƀai” kyua klei mĭn amâo kjăp, hlue tui si tĭng ngĭn thut. Sa čô mnuih msĕ snăn srăng msĕ si “hnoh êa êkăl” arăng juă bi ksul lăn lŭ, leh anăn msĕ si “akŏ êa arăng bi čhŏ”, msĕ si kbăng êa ba klei ruă tưp. Tơdah mnuih kpă dôk hdĭp djŏ hŏng Klei Aê Diê Blŭ, mnuih anăn jing msĕ si akŏ êa êngeh bi êđăp kơ mnuih mkăn (Klei Bi Hriêng 10:11a), ƀiădah tơdah amâo lŏ dôk hdĭp djŏ hŏng Klei Aê Diê Blŭ snăn mnuih anăn srăng jing msĕ si akŏ êa arăng bi čhŏ, ba klei ruă tưp leh huĭ hyưt kơ mnuih mnăm.
Mtao Y-Salômôn iêô mthưr “mnuih kpă” brei răng hlăm klei hdĭp grăp hruê, amâo ư ai hŏng lăn ala, ƀiădah gĭr dôk hdĭp tui si Klei Aê Diê Blŭ (Y-Mathiơ 5:13). Tơdah sa čô phưi lui hĕ klei Khua Yang iêô mthưr, dôk hdĭp msĕ hŏng lăn ala snăn mnuih anăn jing mnuih hơăi mang, mă tŭ klei hêñ mlâo kơ ñu pô, leh anăn jing sa klei bi hmô jhat kơ mnuih mkăn.
Ya ngă “mnuih kpă” tŭ ư mbĭt leh anăn kkui kŏ ti anăp “mnuih ƀai”? Năng ai čiăng duah êlan êlưih truh kơ klei tŭ dưn kơ ñu pô. Lu mnuih huĭ hyưt ti anăp klei lăn ala ksŭng ngă kyuanăn “lĕ hlăm klei mnuih ƀai mplư”. Amâodah mnuih anei knang đei kơ ñu pô, mĭndah ñu pô dưi ksiêm si boh klei truh, kyuanăn ñu mĭn ñu dưi dôk dơ̆ng ti anăp “mnuih jhat” leh anăn tŭ klei lĕ msĕ si Y-Lot, kyua klei ñu tŭ ư mbĭt bi rai klei hdĭp ñu, gŏ sang mbĭt hŏng jih djuê ana. Amâodah năng ai kyua mơ̆ng klei tluh pô atăt “mnuih kpă ênô” grăp knhuang ƀrư̆ đuĕ kbưi mơ̆ng êlan kpă ênô. Mtao Y-Salômôn lač hlăm êlan 27, êa hnuê jing jăk ƀiădah ƀơ̆ng lu đei jing “amâo jăk ôh”; klei “bi mni” amâo soh ôh ƀiădah klei boh phŭn jing “tui duah” leh anăn “tui duah klei bi mni” kơ hlei pô. Tơdah sa čô mnuih yap ñu pô jing phŭn ti krah leh anăn dơ̆ng tui duah klei “bi mni kơ ñu pô” jih jang klei srăng jing soh êlan. Tui duah klei bi mni kơ pô srăng atăt drei truh kơ klei tŭ ư mbĭt hŏng klei jhat ƀai leh anăn hdĭp soh wê hŏng Klei Aê Diê Blŭ. Kyuanăn, brei drei thâo mkhư̆ hĕ klei pô tluh čiăng dưi dôk kjăp, amâo êdu ai ti anăp klei lông dlăng leh anăn bi đru hdơ̆ng găp dưi găn klei lông dlăng hlăm klei hdĭp.
Si ngă drei khăng lĕ hlăm klei mnuih ƀai mplư mơ̆?
Wah lač: Ơ Khua Yang, akâo Ih kiă kriê ai tiê klei mĭn kâo dôk kjăp hlăm Khua Yang leh anăn Klei Ih Blŭ hlăk tlă anăp hŏng klei lông dlăng dleh dlan. Đru kâo hdơr nanao kơ bruă klam hŏng Khua Yang kơ klei hdĭp gŏ sang kâo leh anăn kơ lu mnuih mkăn msĕ mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
