Mathais 15:7-9
Nqe cim:
“Vajtswv hais tias cov neeg no lub qhov ncauj hwm Kuv, tiamsis lawv lub siab tsis npuab Kuv. Qhov uas lawv pehawm Kuv tsis muaj nqis li…” (Mathais 15:8-9a).
Lus nug rau sawvdaws xav:
– Vim licas Tswv Yexus hais tias cov Falixais thiab cov xibhwb qhia kev cai yog cov neeg “ntsej muag ncaj siab nkhaus”?
– Tus cev lus Yaxayas hais licas txog lawv?
– Niaj hnub nimno, peb ua neeg “ntsej muag ncaj siab nkhaus” rau tej yam twg?
Tswv Yexus hais tias cov Falixais thiab cov xibhwb qhia kev cai yog neeg “ntsej muag ncaj siab nkhaus” thias Nws hais tias Yaxayas hais yog heev txog lawv (Yaxayas 29:13). “Cuav” yog tsis tseeb, “ntsej muag ncaj siab nkaus” yog ua neej ob sab, dag ntxias, ua zoo sab nraud xwb. Cov Falixais thiab cov xibhwb qhia kevcai yog cov “ntsej muag ncaj siab nkhaus” vim lawv ua ntsej muag luag ntxhi pehawm Vajtswv tiamsis tseeb tiag lawv tsuas ua li tej uas neeg qhia xwb tsis yog ua raws li Vajtswv kevcai. Lawv txojkev pehawm tsis yog pib ntawm txojkev hlub tiamsis yog ua li kevcai xwb, sab nraud ua yam li kev ntseeg loj loj, tswj lub cev kom zoo zoo, ua li yog neeg dawbhuv tabmeeg sawvdaws, txhua yam lawv ua yog ua kom lawv tau ntsej muag xwb. Lawv tsuas qhuas Vajtswv ntawm lub ncauj xwb, txhais tau tias lawv tsuas ua sab nraud xwb hauv lub siab mas txav deb Vajtswv kawg nkaus li.
Peb saib zoo hauv nqe 8, tus Tswv hu cov Yixalayees ua “cov neeg no” tsis yog hu ua “Kuv haivneeg”. Tus Tswv kheev siv lolus “cov neeg no” thaum cov pejxeem tsis mloog Nws lus (Yaxayas 8:6, 11-12; Yelemis 14:10-11; Hakais 1:2). Thaum siv tus cevlus Yaxayas tej lus hais, Tswv Yexus xav hais tias “cov neeg ntsej muag ncaj siab nkhaus” tsis yog lawv ua neej yuam kev xwb tiamsis tseem qhia tej pejxeem pehawm yuamkev huv tibsi lawm thiab, lawv qhia Vajtswv haivneeg saib kevcai tseemceeb, ua zoo sab nraud xwb, tso tseg txojkev hlub Vajtswv los ntawm nplooj siab dawb paug, ua rau “cov neeg no” ncaim deb Vajtswv thiab tso Nws tseg. Tus Tswv suav hais tias txojkev pehawm li ntawd tsis muaj nqis hlo li.
Yauhas 4:24, Tswv Yexus qhia meej hais tias: “Vajtswv yog Ntsujpig, cov uas pehawm Vajtswv yuav tsum pehawm ntawm sab ntsujplig thiab qhov tseeb”. Pehawm tseeb tsis yog ua raws li kevcai tiamsis yog tawm hauv siab tuaj. Tus Tswv xav kom txhua tus uas pehawm Nws yuav tsum pehawm tawm hauv lub siab tuaj tiag tiag. Niaj hnub nimno, peb yeej pehawm Vajtswv rau txhua hnub Asthiv, fij khoom nyiaj txiag, ua kev cai ua Vajtswv tsaug,… Tiamsis yog peb ua tej ntawd vim raug yuam, ua li ib txwm ua, lossis vim ntshai Vajtswv “rau txim”, ntshai tsam cov ntseeg thuam thiab luag yus,… tsis yog vim paub nco Vajtswv txiaj ntsig thiab hwm Nws, ces Vajtswv yeej yuav hais tias peb txojkev pehawm tsis muaj “nqis li”. Yog peb tsuas xav kom muaj koob nto npe, ua haujlwm zoo tawm sab nraud tshaj li hauv peb lub siab, saib tej kevcai tseemceeb tshaj li Vajluskub… mas Vajtswv yuav hais rau peb tias “ntsej muag ncaj siab nkhaus”! Thov Vajtswv pab kom peb txawj hlub Nws, ua neeg ncajncees rau Nws thiab Pawg Ntseeg kom peb lubneej tau Vajtswv zoo siab.
Thov Vajtswv
Vajtswv, Koj paub nyuam yaus lub siab, thov pab kom nyuam yaus txawj hlub Koj thiab pehawm Koj tas siab. Txhob cia nyuam yaus ua neeg ntsej muag ncaj siab nkhaus ntawm Koj xub ntiag vim tsis muaj dabtsi yuav zais tau Koj li. Nyuam yaus tuav Tswv Yexus Khetos lub npe thov, Amees.
Peb puas ua neeg ntsej muag ncaj siab nkhaus li cov Falixais thiab?
Nyeem Vajluskub hauv peb lub xyoo: Chivkeeb 24
Kênh Youtube BHKTHN:
