Klei Aê Diê Blŭ: Y-Mathiơ 15:7-9
Êlan kliăng: “Phung anei mpŭ kơ kâo hŏng ƀăng kƀông, ƀiădah ai tiê diñu kbưi mơ̆ng kâo, Amâo yuôm ôh klei diñu kkuh mpŭ kơ kâo…” (Y-Mathiơ 15:8-9a)
Klei êmuh ksiêm mĭn: Ya ngă Khua Yang Yêsu iêô kơ phung Pharisi leh anăn phung khua čih hră jing “phung ai ngăm”? Si klei Khua pô hưn êlâo Y-Êsai hưn leh êlâo kơ diñu? Hruê anei, drei ăt jing “phung ai ngăm” mơh hlăm ya boh klei?
Khua Yang Yêsu iêô kơ phung Pharisi leh anăn phung khua čih hră jing “phung ai ngăm” leh anăn Ñu bi mklă klei Khua pô hưn êlâo Y-Êsai lač leh kơ diñu djŏ snăk (Y-Êsai 29:13). “Mgưt” jing amâo sĭt ôh, “ngă mgưt” amâodah “ai ngăm” jing hdĭp dua nah, luar, hưn mdah ti êngao. Phung Pharisi leh anăn phung khua čih hră jing “phung ai ngăm” kyua diñu ngă mgưt hur har kkuh mpŭ kơ Aê Diê ƀiădah klă sĭt diñu knŏng gưt hlue si klei mtă hŏng ƀăng kƀông amâo gưt ôh kơ klei bhiăn Aê Diê. Klei diñu kkuh mpŭ amâo djŏ kbiă mơ̆ng klei khăp ôh ƀiădah ktrŏ kơ klei bhiăn, klei bi êdah ti êngao ngă yuôm bhăn, ngă mgưt knuih huĭ mpŭ, doh jăk ti anăp pô mkăn ƀiădah klă sĭt knŏng čiăng mđĭ thiăm kơhưm diñu pô đuč. Diñu knŏng huĭ mpŭ kơ Aê Diê hŏng ƀăng êgei, jing knŏng ti êngao đuč ƀiădah hlăm lam ai tiê kbưi snăk hŏng Aê Diê.
Brei drei mđing hlăm êlan 8, Khua Yang iêô kơ phung ƀuôn sang Israel jing “phung anei” amâo djŏ jing “phung ƀuôn sang Kâo” ôh. Aê Diê khăng yua boh blŭ “phung anei” tơdah phung ƀuôn sang amâo gưt asăp Aê Diê leh anăn ngă hlue si klei diñu pô čiăng (Y-Êsai 8:6, 11-12; Y-Yêrêmi 14:10-11; Y-Agê 1:2). Tinei, tơdah hrêč mă klei blŭ Khua pô hưn êlâo Y-Êsai, Khua Yang Yêsu čiăng mñă klă “phung ai ngăm” anei amâo djŏ knŏng hdĭp soh ôh ƀiădah wăt lŏ mtô kơ phung ƀuôn sang Aê Diê kkuh mpŭ soh mơh, mtô phung ƀuôn sang Aê Diê dlăng yuôm kơ rup klei bhiăn kkuh mpŭ bi êdah ti êngao ƀiădah lui hĕ ai tiê kpă ênô, huĭ mpŭ kơ Khua Yang, ngă kơ “phung anei” lui Khua Yang leh anăn bi ktlah kbưi hŏng Ñu. Hŏng Khua Yang klei kkuh mpŭ msĕ snăn jing hơăi mang.
Hlăm hră Klei Mrâo Mrang Y-Yôhan 4:24, Khua Yang Yêsu mtô: “Aê Diê jing Mngăt Myang, leh anăn hlei pô čiăng kkuh mpŭ kơ Ñu, brei kkuh mpŭ hŏng mngăt leh anăn hŏng klei sĭt nik.” Kkuh mpŭ sĭt amâo djŏ jing klei bhiăn ti êngao ôh ƀiădah hŏng jih ai tiê. Khua Yang čiăng kơ hlei pô kkuh mpŭ kơ Ñu brei kkuh mpŭ hŏng ai tiê sĭt suôr leh anăn kpă ênô. Hruê anei, drei ăt pioh mơh mnĭt mmông kkuh mpŭ kơ Khua Yang hlăm knăm kjuh, myơr leh anăn myơr klei bi mni… Ƀiădah tơdah drei knŏng ngă kyua bruă klam, kyua klei mưng, kyua huĭ kơ “Aê Diê bi kmhal”, kyua huĭ ayŏng adei hlăm Sang Aê Diê mưč mač kơ pô… ƀiădah kluôm dhuôm amâo djŏ ôh kyua ai tiê hdơr knga leh anăn huĭ mpŭ kơ Aê Diê snăn klei drei kkuh mpŭ ăt jing “hơăi mang”. Tơdah drei mđing kơ klei hing ang lu hĭn kơ knuih hdĭp, bi êdah đei ti êngao hĭn kơ ai tiê hlăm lam, mđing đei kơ bruă hlue ngă djăp klei bhiăn klei đăo, klei bhiăn hĭn kơ bruă hlue gưt Klei Aê Diê Blŭ… snăn Aê Diê ăt srăng lač drei jing “phung ai ngăm”! Akâo Khua Yang đru drei thâo huĭ mpŭ kơ Aê Diê, hdĭp sĭt hŏng Aê Diê leh anăn hŏng Phung Sang Aê Diê čiăng kơ knuih hdĭp drei bi mơak kơ Aê Diê.
Drei dôk hdĭp mgưt msĕ si phung Pharisi mơ̆?
Wah lač: Ơ Khua Yang, Aê Diê thâo ai tiê kâo, akâo kơ Ih đru kâo khăp nanao kơ Aê Diê leh anăn huĭ mpŭ kơ Ih hŏng jih ai tiê. Akâo kơ Ih đru kâo đăm hdĭp mgưt ôh ti anăp Ih kyua kâo thâo amâo mâo ôh ya klei dưi mdăp hŏng Pô Thâo Kluôm Ênŭm. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
