I Petus 4:12-19
Nqe cim:
“Tiamsis yog nej cov uas ntseeg Yexus Khetos, nej raug kev tsimtxom, nej cia li ua Vajtswv tsaug, nej tsis txhob txajmuag qhia rau cov neeg uas tsimtxom nej ntawd hais tias nej yog cov uas ntseeg Yexus Khetos (1Petus 4:16)
Lus nug rau sawvdaws xav:
– Vim li cas ua Tswv Yexus thwjtim yuavtsum tiv kev txomnyem?
– Timthawj Petus ntuas yuavtsum ua li cas thaum tiv kev txomnyem?
– Koj pheej ua li cas thaum tiv kev txomnyem vim tus Tswv lub npe?
Cov ntseeg Yexus ua neej nyob hauv lub ntiajteb tiamsis tsis yog pejxeem rau lub ntiajteb. Yog li ntawd, Vajtswv cov menyuam yuavtsum ua neej txawv neeg ntiajteb ua, caum yam uas muaj nqis txawv neeg ntiajteb. Ua neej kom Vajtswv tau ntsej muag thiab qhia tshwm Tswv Yexus kev hlub, vim ntawd yog lub hom phiaj ntawm tus ntseeg kev ua neej nyob hauv lub ntiajteb. Yog li ntawd, peb yeej yuav ntsib kev tawm tsam, kev tsimtxom rau qhov peb ua tsis thooj tibneeg ntiajteb peb thiaj raug tawm tsam li cov ntseeg ib tiam dhau tiam los lawm.
Nyob rau hauv ntu Vajluskub no, Timthawj Petus ntuas kom cov ntseeg paub ua yam tsimnyog thaum tiv kev txomnyem vim tus Tswv lub npe. Xub thawj yog: txhob xav tsis thoob txog qhov uas yuav tsum tiv kev txomnyem thiab cov neeg ua zoo pheej tiv dhau los lawd (nqe 12). Tim ob, yuav tsum zoo siab xyiv fab thaum tiv kev txomnyem vim tus Tswv lub npe, rau qhov ua li ntawd yog peb tau koom nrog Yexus tiv kev txomnyem thiab tau sim Nws txojkev hlub loj kawg nkaus uas Nws muab pub rau peb. Heev tshaj qhov ntawd, peb yuavtsum haj yam zoo siab heev dua vim peb yuav pom Tswv Yexus tus tshwjchim ci ntsia iab rau yav tom ntej (nqe 13). Thaum paub hais tias peb nyiaj kev khwv, tiv kev txomnyem tsuas yog ib pliag xwb yuav hloov mus rau lub tshwjchim ci ntsia iab uas nyob mus ib txhis hauv hnub Tswv Yexus rov qab los mas txhawb peb zog kawg nkaus.
Timthawj Petus ntuas kom peb yuav tsum tiv kev txomnyem thiab ceev ruaj kev ntseeg, vim peb muaj npe yog tus ntseeg Tswv Yexus Khetos (nqe 16). Peb yuav tsum sawv khov tsis txhob qaug zog, tsis thim kev ntseeg vim txhua tus uas ncaj ncees yeej yuav tau txais nqi zog. Thiab tsis tas peb yuav ua pauj rov rau cov uas tsimtxom peb, vim twb muaj Vajtswv ua tus txiav txim lawm (nqe 17-18). Qhov no qhia peb paub txog Vajtswv yog tus uas muaj hwjchim tswj tagnrho txhua yam, Vajtswv paub tas txhua yam uas peb raug, Nws yuav txiav txim ncaj ncees rau txhua tus. Peb li feem xyuam yog “tso siab plhuav rau tus uas tsim peb” (nqe 19). Thaum uas peb ntseeg thiab tso siab plhuav rau Vajtswv, peb ua neej kom tsimnyog yog tus ntseeg los ntawm paub sib hlub, paub Vajtswv haujlwm thiab paub sib pab kom qhia tshwm Vajtswv lub npe rau neeg ntiajteb. Tej kev txomnyem tiam no tsuas yog ib pliag xwb, hnub Vajtswv txiav txim peb yuav mus nyob chaw tau zoo ib txhis.
Cov ntseeg twb tiv kev txomnyem lawm, tseem tabtom tiv kev txomnyem thiab yeej npaj siab yuav tiv kev txomnyem vim Vajtswv lub npe. Thaum tiv dhau tej kev txomnyem lawm, peb kev ntseeg haj yam loj hlob, peb tus yam ntxwv hloov, thiab tej ntawd yuav ua timkhawv rau peb lub neej ntseeg uas ciaj sia. Thov txhua tus uas ris lub npe yog tus ntseeg ua neej kom tsimnyog pub rau Tswv Yexus.
Thov Vajtswv
Vajtswv, nyuam yaus ua Koj tsaug, vim tau ris lub npe ntseeg Koj. Thov pab nyuam yaus tiv taus tej kev tsim txom los ntawm lub siab ntseeg thiab tso siab plhuav rau Koj txojkev tswj, kom nyuam yaus ua neej qhia tshwm Koj lub Npe rau neeg ntiajteb. Nyuam yaus tuav Tswv Yexus Khetos lub npe thov, Amees.
Peb puas zoo siab thaum uas tiv kev txom nyem vim tus Tswv lub npe?
Nyeem Vajluskub hauv peb lub xyoos: Chivkeeb 8
Kênh Youtube BHKTHN:
