Klei Aê Diê Blŭ: Klei Mphŭn Dơ̆ng 22:1-2
Êlan kliăng: “Hŏng klei đăo Y-Abraham myơr leh Y-Isăk tơdah Aê Diê lông dlăng ñu, pô mă tŭ leh klei ƀuăn kăp myơr anak êkei ñu mâo knŏng sa čô.” (Hêbrơ 11:17)
Klei êmuh ksiêm mĭn: Hlei pô Y-Abraham jing, leh anăn ya ngă Aê Diê lông dlăng klei đăo ñu? Mơ̆ng ya hdră êlan Y-Abraham dưi hgao klei lông dlăng, ya klei hriăm kơ diih kơ klei tŭ klei knap kyua klei đăo?
Leh găn knhuang êlan sui dlông êbat mbĭt hŏng Khua Yang, Y-Abraham mâo klei bi knal sĭt kơ klei Aê Diê ƀuăn hlăk kkiêng anak êkei ñu Y-Isăk. Anăn Y-Isăk mblang jing “tlao”. Klei kkiêng kơ Y-Isăk amâo djŏ knŏng ba hriê asăp tlao hơ̆k mơak kơ ung mô̆ mduôn ôh, ƀiădah wăt ênai tlao mơak kơ klei đăo ung mô̆ diñu, kyua jao kluôm jih klei hdĭp kơ Khua Yang. Mĭndah knhuang êlan klei đăo Y-Abraham truh leh ti anôk bi kčah, ƀiădah Aê Diê ruah leh ñu čiăng lŏ lông dlăng sa blư̆ dơ̆ng, čiăng dlăng si klei Y-Abraham đăo kơ Aê Diê mâo kdriêl knhal mơ̆. “Aê Diê lač, “Mă bĕ anak ih, anak ih mâo knŏng sa čô, Y-Isăk, pô ih khăp anăn; nao bĕ kơ čar Môria. Tinăn brei ih myơr ñu jing mnơ̆ng myơr čuh ti dlông sa boh čư̆ Kâo srăng ktrâo kơ ih.” (êlan 2). Klei mtă brei ngă anei jing dleh thâo săng êdi kơ drei, kyuadah bi mklăk hŏng knuih jing Aê Diê pô. Ƀiădah klă sĭt Y-Abraham mâo klei bi mguôp suôr tliêr hŏng Khua Yang leh anăn thâo klă anei jing asăp blŭ Ñu. Wăt tơdah amâo thâo săng jih ôh, ƀiădah ñu đăo kơ Aê Diê mâo hdră kñăm yơh tơdah mtă brei ngă msĕ snăn. Leh anăn ñu čuăn gưt ngă hŏng klei đăo, “Hŏng klei đăo Y-Abraham myơr leh Y-Isăk tơdah Aê Diê lông dlăng ñu” (Hêbrơ 11:17a), mbĭt hŏng ai tiê kjăp ktang êbat nao hŏng klei đăo, “Aê Diê pô srăng brei êđai biăp pioh kơ mnơ̆ng myơr čuh.” (Klei Mphŭn Dơ̆ng 22:8).
Hŏng lu mnuih, tŭ klei knap mñai kyua klei đăo jing tlă anăp hŏng klei ngă jhat mơ̆ng phung bi kdơ̆ng hŏng Aê Diê. Ƀiădah hlăm boh klei truh kơ Y-Abraham, tŭ klei knap mñai kyua klei đăo jing klei tŭ ư luč jih klei ñu pô myuôm khăp hĭn tơdah klei anăn jing klei Aê Diê čiăng. Klei Y-Abraham čuăn ngă dleh dlan amâo djŏ knŏng bi êdah si hnơ̆ng ñu khăp kơ Aê Diê ôh, ƀiădah wăt bi êdah hnơ̆ng klei ñu pô đăo knang kơ Aê Diê mơh.
Si klei drei dôk tŭ klei knap kyua klei đăo ară anei? Năng ai drei dôk ti anăp klei ruah, tơdah čuăn gưt asăp Khua Yang, drei srăng luč jih klei drei myuôm khăp hĭn. Amâodah năng ai klei drei tŭ klei knap mñai, hriê mơ̆ng klei Khua Yang amâo ngă tui si klei drei čang hmăng ôh, Ñu amâo msir mgaih ôh klei dleh dlan drei kwưh akâo mơ̆ng sui hruê leh, kơ klei ruă duam, kơ prăk kăk yua, kơ gŏ sang găp djuê…
Klei bi hmô kơ klei đăo mơ̆ng Y-Abraham, sa klei đăo đup gưt, jao kluôm, kyuanăn yơh ñu dưi hgao klei lông dlăng dleh dlan, đru drei thâo săng snei, hŏng klei knap mñai srăng mjuăt mjing klei đăo čiăng kơ lŏ đăo knang hĭn leh anăn hmiêt mkăp čiăng bi guh kơang kơ Anăn Aê Diê. Hmăng hmưi grăp čô drei srăng lač hŏng Khua Yang “Nĕ tinei kâo” ti anăp jih jang klei lông dlăng Khua Yang mdưm.
Si drei srăng lač hŏng Khua Yang tơdah tlă anăp hŏng klei lông dlăng klei đăo bŏ hŏng klei dleh dlan?
Wah lač: Ơ Khua Yang, tơdah kâo tlă anăp hŏng klei lông dlăng klei đăo, brei kâo tui hriăm mơ̆ng klei Y-Abraham bi hmô, kjăp ktang, amâo mgei ai tiê, khut khat đăo knang kơ Khua Yang. Đru kâo thâo săng hlăm jih jang klei, hdră Khua Yang mkra pioh kơ kâo jing jăk hĭn nanao, čiăng kơ kâo đăo kjăp nanao kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
