Chivkeeb 22:1-2
Nqe cim:
“Twb yog vim Anplahas ntseeg, Anplahas thiaj coj nws tus tub Ixaj mus yuav muab tua fij rau Vajtswv. Thaum ntawd twb yog Vajtswv sim Anplahas siab. Txawm yog Vajtswv coglus tseg rau Anplahas lawm los Anplahas tseem zoo siab muab nws tib leeg tub coj mus tua fij rau Vajtswv thiab. (Henplais 11:17)
Lus nug rau sawvdaws xav:
– Anplahas yog leejtwg thiab vim li cas Vajtswv sim nws kev ntseeg?
– Dhau los ntawm Anlpahas hla dhau Vajtswv txojkev sim ntseeg, koj kawm tau dab tsi txog qhov uas muab siab tiv txomnyem vim kev ntseeg?
Tom qab uas nrog tus Tswv mus tau ib ntus lawm, Anplahas paub txog tej uas Vajtswv tau coglus rau nws lawm muaj tseeb thaum uas yug tau Ixaj. Lub npe Ixaj txhais hias tias “luag”. Ixaj yug los tsis yog ua rau nkawd luag thaum nkawd twb laus lawm xwb tiamsis tseem ua rau nkawd zoo siab luag vim nkawd tau muab lub neej fij tagnrho rau Vajtswv. Zoo li hauv txojkev uas Anplahas tabtom nrog tus Tswv mus ua rau nws txaus siab heev, tiamsis Vajtswv txawm nrhiav kev sim Anplahas kev ntseeg ib zaug ntxiv saib nws kev ntseeg Vajtswv puas ruaj khov. Thaum Anplahas ntsib kev zoo siab, Vajtswv ho sim saib Aplahas ruaj siab rau Vajtswv li cas, “Vajtswv hais tias, “Koj cia li coj koj tibleeg tub Ixaj uas koj hlub tshaj plaws, mus rau pem tebchaws Mauliyas. Koj cia li muab nws tua hlawv fij pub rau kuv saum lub roob uas kuv yuav qhia rau koj” (nqe 2). Qhov uas Vajtswv taij no peb tsis totaub vim nws tawm tsam Vajtswv tus yam ntxwv. Tiamsis Anplahas sib raug zoo nrog Vajtswv heev nws yeej paub meej hais tias ntawd yog Vajtswv lub suab ntag. Txawm yog totaub tsis tas los, Anlpahas ntseeg hais tias Vajtswv yeej muaj kev cheentsum li ntawd. Thiab Anplahas txiav txim siab ua raws li kev ntseeg, “… Anplahas thiaj coj nws tus tub Ixaj mus yuav muab tua fij rau Vajtswv” (Henplais 11:17a), Anplahas yeej rhais ruam mus muaj zog sis los ntawm kev ntseeg, nws thiaj hais tias “Vajtswv yuav muab ib tug menyuam yaj rau wb” (Chivkeeb 22:8).
Coob leej xav hais tias, tiv txomnyem vim kev ntseeg ces yog tiv kev tsimtxom los ntawm cov neeg uas tawm tsam Vajtswv thiab tawm tsam Vajtswv cov neeg. Tiamsis peb pom qhov uas Anplahas tiv txomnyem vim kev ntseeg yog kam cia yus poob yam uas muaj nqis tshaj plaws ntawm yus, yog hais tias qhov ntawd yog yam uas Vajtswv xav tau. Txojkev txiav txim siab ntawm Anplahas tsis yog qhia pom nws kev hlub Vajtswv li cas xwb, tiamsis tseem qhia pom nws tus kheej ntseeg Vajtswv txog qib twg thiab.
Peb tiv txomnyem vim kev ntseeg li cas? Tej thaum peb tabtom sawv rau ntawm ib qhov chaw uas yuavtsum tau xaiv, lossis kev txiav txim siab mloog Vajtswv lus, peb yuav poob yam uas peb saib muaj nqis kawg nkaus ntawm peb mus. Tej thaum peb tiv kev txomnyem vim kev ntseeg los ntawm qhov uas tsis tau raws li peb xav, thov Vajtswv ntev loo los Vajtswv yuav tsis teb peb tej lus thov kom zoo mob nkees, kom muaj nyiaj txiag, lossis tsev neeg nyob sib haum…
Tus qauv kev ntseeg ntawm Anplahas, yog ib txojkev ntseeg uas mloog lus paub fij tagnrho rau Vajtswv. Thaum mloog lus tuag nthi pab tau peb hla dhau txojkev sim siab uas nyuaj, pab tau peb paub hais tias tiv kev txomnyem haj yam ua rau peb muaj kev ntseeg ntxiv, thiab txaus siab ua rau Vajtswv lub lub npe tau qhuas. Thov kom peb txhua tus hais rau Vajtswv hais tias “kuv nyob ntawm no” kam txais yuav txhua yam kev sim siab uas Vajtswv pom zoo cia tuaj raug peb.
Thov Vajtswv
Vajtswv, thaum nyuam yaus ntsib tej kev sim siab uas Koj cia raug nyuam yaus, thov pab nyuam yaus xyaum Anplahas tus qauv, sawv khov, ua taus siab ntev thiab tso siab plhuav rau Koj. Thiab thov pab nyuam yaus zeem paub hais tias, txhua yam nyob hauv Koj kev npaj tseg lawm puavleej zoo rau nyuam yaus kom nyuam yaus ntseeg thiab mloog Koj lus. Nyuam yaus tuav Tswv Yexus Khetos lub npe thov, Amees.
Peb yuav ua li cas thaum uas ntsib kev txomnyem tuaj sim peb kev ntseeg?
Nyeem Vajluskub hauv peb lub xyoos: Chivkeeb 6
Kênh Youtube BHKTHN:
