Luka 11:1-10
“Iĕm bơngai kơnê̆ ră, mă-lei iĕm kư̆m băt chă ăn kơ kon iĕm tơmam sa ‘lơ̆ng, pơma kiơ kơ ‘Bă bơ̆n tơ plĕnh ti, dah bơ̆n apinh Sư, Sư gô ăn kơ bơ̆n Yang Bơhngol ‘Lơ̆ng tơpă.” (Luka 11:13)
Nơ̆r jet tơchĕng pơwao:
– Lu bơngai lăm tơdrong roi hơ’mon Kră Yang Yêsu roi jô̆ tang măt kơ bu păng tơdrong kiơ?
– Yêsu wă bơtho lu bơngai pơhrăm păng Sư tơdrong kiơ gah tơdrong krao khan?
– Lu bơ̆n kăl kơ tơplih tơdrong kiơ lăm tơdrong krao khan?
Đơ̆ng rŏng kơ bơtho lu bơngai pơhrăm păng Sư lăm tơdrong krao khan (trong 1-4). Kră Yang Yêsu đei pơtih gia tơdrong bơtho hăm tơdrong roi hơ’mon kơ minh ‘nu tơmoi truh tơ hnam bơ̆n kơ măng noh minh tơdrong gĭt kăl dêh yua kơ chăl noh sơ̆ ưh kơ đei hnam ‘bĭch tơmoi păng ‘bĭch tơ hnam tơmoi ưh kơ hơđơ̆ng. Thoi noh na đơ̆ng gah hơlĕch băt sơng iŏk tơmoi noh tơdrong jang ‘lơ̆ng tơpă. Mă khan tơmoi truh bơ̆n ưh kơ băt jơ noh, tơ’ngla hnam hiơ̆k bơngơ̆t yua kơ ưh kơ đei tơmam sa wă sơng tơmoi.
Wă pơkeh tơdrong anat ‘nâu tơ’ngla hnam năm tơ hnam bôl buăl na apinh pêng tŏ ‘bĕng mi, mă khan lei ră, bơngai ‘nâu bôl buăl sư ưh kơ wă tơgŭm sư yua kơ “’măng đĭ chơ kăl bơih” tơdrong ‘nâu wă tơdra tơ’bôh buăl sư ưh kơ wă pơjuăl. Tơ pơlei Pasastin, tơdrong pôm jơhngơ̆m đon kăl dêh. Tơdrong blŭng a lăm til pơge đei ‘măng tơpơih păng mă bu bu kư̆m gơh mơ̆t lĕch, mălei dah ‘măng tang chơkăl lê̆ bơih noh tơdra tơ’ngla hnam noh ‘maih pơdơh ‘biơ̆ bơih, ưh kơ đei bu năm tơkan ăp mă đei tơdrong gĭt kăl na gơh hloh kơ noh dơ̆ng, ‘nhŏng oh jum dăr đei tơbăt “Kon hơ’lơ̆p păng inh wă tep bơih.” Hnam lu bơngai Juđê jơ noh sơ̆ lăp minh phŏng đĕch, dah đei bơngai iung năm pơih ‘măng lei gô pơm kơ đĭ đăng hơđơ̆r ngăl. Mălei bơngai năm apinh ‘bĕng sư kăl wă kơ đei tơmam sa wă sơng bôl sư na sư mah “chă pơhrơ̆k” buăl sư. “chă pơhrơ̆k” wă khan “ưh kơ mơlâu” pơma pha ‘biơ̆, tơdrong mă bơ̆n năm tơ hnam đe kơmăng wă chă pơjuăl đe noh tơdrong ưh kơ pơyom păng tơdrong ưh kơ ‘lơ̆ng.
Bơ̆n ‘bôh bơih tơ’ngla hnam năm apinh tơmam sa noh pơma pơtih gia kơ lu bơngai pơhrăm păng Yêsu na bơngai rông ‘bôt noh pơma pơtih kơ Kră Yang ‘Bok Kei-Dei (trong 13). Păng tơdrong pơm tơ’bôh apinh ‘bĕng noh pơtih kơ tơdrong krao khan. Lăm tơdrong pơtih gia ‘nâu. Kră Yang wă krao lu bơngai pơhrăm păng Sư athei pơ̆n nuih năm tơ Kră Yang, sĭt tơpă Kră Yang gô tơl tơwih tơdrong krao khan apinh lu sư.
Đei lơ bơngai khan dah ‘Bok Kei-Dei băt tôm tơdrong (Hơriso 139:4). Lei yua kơ kiơ bơngai lui kăl kơ krao khan? Tơdrong pơtih gia ‘nâu tơbăt tơdrong krao khan lu bơngai lui noh ‘Bok Kei-Dei lăp đon, hloh kơ noh đơ̆ng ‘nâu bơih ‘Bok Kei-Dei rơih iŏk tơ’bôh tơdrong mơsêh Sư, păng ‘nâu kư̆m tơdrong kăl lăm tơdrong tơ’bưh bơ̆n hăm Kră Yang.
Ơ Kră Yang, inh bơnê kơ Ih đei ăn kơ inh tơ’bưh hăm Ih lăm tơdrong krao khan, inh bơnê kơ Ih inh băt kơ Ih oei pơgling đon Ih mơ̆ng inh krao khan. Apinh Ih ăn kơ inh pơ̆n nuih păng adrin krao khan kơ Ih. Krao khan yua anăn Kră Yang Yêsu Krist, Amen.
Lu bơ̆n oei krao khan hăm Kră Yang đĭ jơhngơ̆m thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 31
Kênh Youtube BHKTHN:
