I Thexalaunikes 2:9-12
Nqe cim:
“Nej twb paub lawm hais tias peb hlub nej txhua tus ib yam li leej txiv hlub nws cov menyuam. Peb twb txhawb nej lub zog thiab nplig nej siab lawm. Peb ua li ntawd kom nej thiaj paub ua nej lub neej haum Vajtswv siab. Vajtswv yog tus uas hu nej los ua nws haivneeg thiab los txais nws txoj koobhmoov” (I Thexalaunikes 2:11-12).
Lus nug rau sawvdaws xav:
– Timthawj Paulus thiab nws cov phoojywg ua tes haujlwm tshajtawm Txojmoo Zoo los ntawm nplooj siab zoo licas ?
– Timthawj Paulus ntshaw dabtsi ntawm cov ntseeg uas nyob hauv Pawg Ntseeg Thexalaunikes?
– Yuav tsum ua lubneej zoo licas rau tej koobhmoov uas Vajtswv pub?
Thaum tu cov ntseeg hauv Pawg Ntseeg Thexalaunikes, Timthawj Paulus nrog rau Xilas thiab Timautes yeej ua haujlwm los ntawm nplooj siab zoo li thaum lawv ua haujlwm pub rau lwm qhov, uas yog: Kub siab lug qhia Txojmoo Zoo kom sawvdaws paub Yexus Khetos thiab los ntseeg Nws. Dua li ntawd, lawv tseem ua haujlwm yug lawv tus kheej, tsis taij kom tau hwjchim lossis tau nqi zog dhau ntawm tes haujlwm dawbhuv no (I Thexalaunikes 2:6, 9). Thaum ua haujlwm, Timthawj Paulus yeej nquag ua, tsis ntshai kev khwv, nws hais tias “Peb ua haujlwm tas hnub tas hmo, rau qhov peb tsis xav kom nej nyuaj siab rau peb lub sijhawm uas peb tuaj qhia Vajtswv Txojmoo Zoo rau nej”. Kev ua haujlwm thiab kev ua neej ntawm Timthawj Paulus thiab nws cov phoojywg tau cov ntseeg hauv Thexalaunikes lees paub thiab ua timkhawv hais tias lawv yeej ua zoo. Tsis tas li ntawd xwb, nws tseem hais ntxiv hais tias: “Vajtswv ua tau timkhawv hais tias thaum peb tseem nrog nej cov ntseeg nyob, peb ua peb lub neej zoo kawg nkaus, peb ua neeg ncaj ncees thiab peb tsis tau ua ib qho txhaum li ” (nqe 10).
Timthawj Paulus thiab nws cov phoojywg txaus siab hlo tiv kev khwv, hlub tshua lwm tus zoo ib yam li leejtxiv hlub tej menyuam, tas siab tas ntsws txhawb zog, nplig siab thiab qhuab ntuas, ntshaw kom cov menyuam sab ntsujplig hauv Thexalaunikes paub ua lubneej “haum Vajtswv siab ” (nqe 12). Nws hais meej hais tias Vajtswv yog tus hu lawv los rau hauv Nws lub tebchaws thiab hauv Nws lub hwjchim ci ntsa iab, ntawd yog txoj koobhmoov loj uas tus Tswv muab pub rau Nws haivneeg. Tiamsis koobhmoov yeej mus sib nrawg nrog feemxyuam. Vim li ntawd Timthawj Paulus thiaj ntuas sawvdaws ua lubneej haum Vajtswv siab, vim Nws yog tus pub txoj koobhmoov rau peb. Yog tsis ua li ntawd, peb yuav txais tsis tau nws lub hwjchim tiamsis yuav raug txim.
Yam uas Timthawj Paulus ntshaw, paub tseeb hais tias kuj yog yam uas peb cov ua Vajtswv haujlwm ntshaw. Yuav muaj dabtsi zoo siab tshaj qhov uas pom cov ntseeg Tswv Yexus muaj lubneej hloov tshiab txhua hnub, ua neej phim txoj koobhmoov Vajtswv hu los rau hauv Nws lub tebchaws thiab hauv Nws lub hwjchim ci ntsa iab. Thiab qhov tseemceeb pub rau peb ntawm no yog peb yuav tsum tau Vajtswv thiab cov neeg ibncig ua timkhawv zoo hais tias peb tabtom ua lubneej haum Vajtswv siab, ua qauv zoo, loj hlob sab kev ntseeg, kom lwm tus pom thiab raws peb qab.
Thov Vajtswv
Vajtswv, Koj yog tus hu nyuam yaus los hauv Koj lub tebchaws thiab hauv Koj lub hwjchim, thov Koj pab nyuam yaus ua tau lubneej phim txoj koobhmoov uas Koj muab pub rau nyuam yaus, thiab siv nyuam yaus los txhawb lwm tus lub zog ua neej haum Koj siab. Nyuam yaus tuav Yexus lub npe thov. Amees.
Peb lubneej puas muaj yam dabtsi tsis tau phim rau txoj koobhmoov uas Vajtswv pub? Peb txiav txim siab yuav ua licas?
Nyeem Vajluskub hauv peb lub xyoo: Henplais 12
Kênh Youtube BHKTHN:
