Mathiơ 21:14-17
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Ư-ang Kơ Kră Yang Đơ̆ng Lu Hơ’lơ̆p kiơ̆ kơ Sơ̆p Hla bơar ‘Bok Kei-Dei Mathiơ 21:14-17.
14 Kơplah noh đei lu bơngai măt tol, lu bơngai jơ̆ng kue năm tơ Sư, na Sư pơklaih hloi. 15 Lu ‘bok soi tih, lu thây bơtho đe Juđê ‘bôh tơdrong mơsêh Sư pơm noh păng kơtơ̆ng lu đe hơ’lơ̆p wang hô pơma ư-ang kơ Sư khan: “Hôsana, bơnê kơ ‘Bok Krist Kon Sâu pơtao Đawit.” Lu sư ‘bôh thoi noh, lu sư blĕk dêh. 16 Na lu sư năm khan kơ Yêsu: “Ih hăm kơtơ̆ng lu đe hơ’lơ̆p pơma ei?” Yêsu khan: “Kơtơ̆ng. Bĭ iĕm tam mă đŏk lăng ôh hă đe chih roi tơdrong ‘Bok Kei-Dei thoi âu: Ơ Kră Yang, Ih ăn kơ lu hơ’lơ̆p păng lu bơngai nge băt pơma bơnê ư-ang kơ Ih?” 17 Klaih kơ noh Sư sơlah đơ̆ng lu đe noh năm tơ Pơlei Bethani ‘bĭch tơ ei.
Trong tơm ‘bai pơhrăm ‘nâu:
“Đơ̆ng ‘bơ̆r lu hơ’lơ̆p iĕ lu oei mŏm, Ih pơjing pơlei kơjăp, yua kơ lu ayăt. Wă pơm kơ lu bơngai ayăt păng lu iung kơting jing hreh.” (Hơriso 8:2)
Nơ̆r jet tơchĕng pơwao:
– Kră Yang pơm kiơ̆ kơ lu bơngai jơ̆ng kue, păng đe ư-ang kơ Sư thoi yơ?
– Jơhngơ̆m lu ‘bok soi thoi yơ?
– Iŏk tơdrong mơnat tih đơ̆ng Kră Yang, bơ̆n athei arih thoi yơ?
Kơkuh kơ đĭ đăng,
Đơ̆ng rŏng kơ Kră Yang Yêsu pơpuh đe mơdro tơ hnam akŭm păng tơplih băl jên tơ hnam akŭm, lu bơngai jơ̆ng kue, jơ̆ lu bơngai mă ‘nhŏng oh achăng lê̆, sư năm tơ Kră Yang păng Kră Yang pơklaih đĭ đăng. Kră Yang ‘brơ̆k mơnat kơ lu bơngai ‘nâu mălei lu ‘bok soi păng lu bơngai bơtho tơdrong juăt đe Juđê ưh kơ hiơ̆k bơngơ̆t lu sư. Lu sư ‘bôh tơdrong Kră Yang Yêsu pơm tơdrong mơsêh mălei lu sư ưh kơ đei ư-ang kơ Kră Yang, tơplơ̆ dơ̆ng, kơplah kơtơ̆ng nơ̆r ư-ang đơ̆ng lu đe hơ’lơ̆p na lu sư blĕk. Lu sư blĕk dêh yua kơ lu đe hơ’lơ̆p wang hô pơma ư-ang khan: “Hôsana, bơnê kơ ‘Bok Krist kon sâu pơtao Đawit” minh ‘măng dơ̆ng pơma hơđăl Kră Yang Yêsu bơih Yang Mêsi, tơdrong mă lu ‘bok soi păng lu thây bơtho tơdrong juăt đe Juđê ưh kơ lăp đon. Lu sư athei Kră Yang Yêsu khă kơ lu đe hơ’lơ̆p ‘nĕ pă pơma thoi noh, mălei Kră Yang khan iĕm tam đŏk lăng lăm Sơ̆p Hla bơar ‘Bok Kei-Dei lăm Hơriso 8:2 na khan lu sư mă lu hơ’lơ̆p păng lu bơngai nge kư̆m băt ư-ang kơplah ‘bôh tơdrong Kră Yang pơm. Mălei sơ’ngon dêh, lu ‘bok soi păng lu thây bơtho tơdrong juăt jơ̆ lu bơngai mă hlôh băt, hŏk pơhrăm lơ bơih mălei tă kơ ưh kơ đei ư-ang kơ Kră Yang na pơgăn lê̆ dơ̆ng tăm. Lăm Luka 19:40 roi pơdeh tơdrong Kră Yang tơl lu ‘bok soi kơplah lu sư athei khan kơ lu jơ̆ng ‘bang ngăn hreh khan: “… dah lu sư thĕng lei lu tơmo kư̆m gô pơma ư-ang mơ̆n ưh kơ lê̆ ôh.” Kră Yang wă kơ băt lu sư kơdih lu sư arăng kơ̆l na ‘nhŏ kơ dôm tơmam kư̆m ‘maih hơri ư-ang kơ Sư.
Dang ei, bơ̆n kăl kơ băt bơ̆n âu thoi bơngai oei lăm măng mu gah bơhngol đei Kră Yang pơklaih, bơ̆n âu thoi bơngai tơmoi ưh kơ gơh năm jê̆ Kră Yang wă kơkuh yua kơ kiơ̆ kơ tơdrong juăt. Mălei dang ei bơ̆n đei iŏk tơdrong mơnat tih đơ̆ng Kră Yang Yêsu kơplah gơh mơ̆t tơ hnam Kră Yang wă rơngei kơkuh kơ Sư. Athei jing bơngai ư-ang kơ Kră Yang hăm đĭ jơhngơ̆m bơ̆n, athei pơyơ̆r jơhngơ̆m bơ̆n kơ Kră Yang wă bơ̆jang kơ Sư. Bơ̆n ‘nĕ kơ thoi lu ‘bok soi păng lu thây bơtho tơdrong juăt đe Juđê lăm hnam akŭm noh sơ̆, ưh kơ băt tơdrong Kră Yang mơnat, ưh kơ bơnê, ư-ang kơ Kră Yang lăm tơdrong arih. Apinh ‘nĕ kơ đei bơngai bu arih pơrơ̆ng ưh kơ băt hăm dôm tơdrong Kră Yang đei pơm kơ bơ̆n, păng kư̆m ‘nĕ kơ chrih pơma dah pơgăn lu ‘nhŏng, mŏ, oh bơ̆n ư-ang bơnê kơ Kră Yang. Bơ̆n kư̆m ‘nĕ kơ bơnê ư-ang kơ Kră Yang kơdrô̆ bơ̆n đĕch mălei kư̆m athei pơlung păng tơgŭm bơngai nai wang ư-ang kơ Kră Yang hơdai hăm bơ̆n.
Lu bơ̆n pôm đon lăm tơdrong krao khan,
Kơkuh kơ Kră Yang mơsêh, inh băt Ih đei tơdrong mơnat tih dêh, kơplah Kră Yang Yêsu chu lôch wă dŏng pơklaih păng hơmet chăl arih inh. Apinh Ih tơgŭm inh ling lang ư-ang tơdrong Kră Yang mơnat lăm tôm tơdrong lăm chăl arih, păng kư̆m pơlung lơ bơngai nai wang bơnê ư-ang kơ Kră Yang mơ̆n. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Tơdrong arih, nơ̆r bơ̆n pơma hăm đei pơgăn lu ‘nhŏng, mŏ, oh nai wă bơnê kơ Kră Yang ưh?
‘Nĕ kơ kret lu nơ̆r pơma bơnê
Ư-ang tơdrong pŭn hiôk Yang ‘Bă ăn kơ bơ̆n
‘Nĕ kơ kret hơ-ri ư-ang
Bơnê kơ Kră Yang chu lôch dŏng kon bơngai
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 14
Kênh Youtube BHKTHN:
