Txo Hwjchim Tabmeeg Vajtswv – 3/3/2022

946

Yakaunpaus 4:1-10

Nqe cim:

Nej cia li txo nej lub hwjchim tabmeeg Vajtswv, Vajtswv thiaj yuav tsa nej lub hwjchim” (Yakaunpaus 4:10).

Lus nug rau sawvdaws xav:

  • Yakaunpaus ntuas kom peb yuav tsum ua dabtsi?
  • Nws xav hais dabtsi tshwjxeeb hauv cov lus ntuas no?
  • Tus Tswv coglus li cas thaum peb paub txo hwjchim lees kev txhaum tabmeeg Nws?
  • Peb cheemtsum ua dabtsi kom tau txais txojkev zam txim thiab tau tus Tswv tsa hwjchim?

Tom qab uas nqua hu cov ntseeg tsis txhob mus ua li neeg ntiajteb ua, tsis txhob ua raws li lub siab nyiam (nqe 1-5), Yakaunpaus ntuas ntau lo lus muaj nuj nqis heev. Yog Vajtswv cov menyuam ua raws li cov lus ntuas no ces yeej yuav tau txais tej koob hmoov uas Vajtswv pub.

Hauv nqe 6, Yakaunpaus hais khov kho hais tias: Vajtswv yuav tawmtsam tus uas khavtheeb, tiamsis Vajtswv yuav foom koob hmoov rau tus uas txo hwjchim (Pajlug 3:34; I Petus 5:5). Lub ntsiab tseemceeb ntawm cov lus ntuas no yog hais txog lub siab txo hwjchim, tsis khavtheeb tabmeeg tus Tswv. Ua ntej yog, Yakaunpaus ntuas kom peb yuav tsum ua yog cia li mloog Vajtswv lus. Nej yuav tsum tawmtsam dab Ntxwgnyoog, dab thiaj yuav khiav ntawm nej mus (nqe 7). Dab Ntxwgnyoog niaj hnub tawmtsam Vajtswv thiab nrhiav tswvyim los ntxias kom peb khiav tawm ntawm tus Tswv mus. Yog peb mloog Vajtswv lus, ua raws li Nws lub siab nyiam thiab vamkhom Nws lub hwjchim tawmtsam dab Ntxwgnyoog ces dab yeej yuav khiav ntawm peb mus xwb. Qhov ntxiv yog, peb yuav tsum “cia li los nyob ze Vajtswv”, txhais tau hais tias peb tig rov los cuag tus Tswv (Xakhaliyas 1:3). Thaum peb yim nyob ze tus Tswv ces Nws yuav nyob ze peb ib yam li ntawd thiab peb yuav paub Nws lub siab nyiam, ces Nws yuav pub hwjchim kom peb tawmtsam yeej dab Ntxwgnyoog thiab ua neej raws li Nws lub siab nyiam. Thiab Yakaunpaus kuj nqua hu peb yuav tsum ntxuav nej tej tes kom huv… yuav tsum tu nej lub siab kom zoo (nqe 8), txhais tau hais tias yuav tsum ua lub neej dawbhuv. Qhov no yog lub neej paub nyuaj siab, quaj ntsuag lees kev txhaum thiab txiav txim siab tso tseg (nqe 9). Qhov no yog tes haujlwm txo hwjchim tabmeeg tus Tswv kom Nws ntxuav peb dawbhuv. Thaum peb zeem paub yus txojkev txhaum, muaj lub siab lees kev txhaum tiag tiag rau tus Tswv ces Nws yog tus ncaj ncees, Nws yuav ua raws li Nws tau coglus tseg lawm, Nws yuav zam peb tej kev txhaum thiab Nws yuav ntxuav peb tej kev txhaum huv tibsi mus (I Yauhas 1:9).

Thaum kawg, Yakaunpaus sau zog tus Tswv tej lus cog tseg los ntawm lo lus nqua hu kom txo hwjchim lees txim, Nej cia li txo nej lub hwjchim tabmeeg Vajtswv, Vajtswv thiaj yuav tsa nej lub hwjchim(nqe 10; I Petus 5:6). Txo hwjchim yog tus cwjpwm zeem paub hais tias yus tsis muaj zog, ua tsis tau dabtsi, tsis tsimnyog.“Txo lub hwjchim tabmeeg Vajtswv” yog qhov uas mloog lus thiab vamkhom tus Tswv tagnrho, zeem paub yus ua tsis tau, yus phem kawg nkaus, yus  cheemtsum tau tus Tswv hlub thiab pab cawm. Tus Tswv xav tau lub siab uas lees kev txhaum tas siab, xav cia tus Tswv ntxuav kom tau dawbhuv. Thaum ntawd tus Tswv yuav tsa peb nyob lub meejmom tseemceeb ntawm Nws txoj koob hmoov pub dawb uas Nws muab pub rau peb. Thov tus Tswv pab kom peb txaus siab txo hwjchim, lees kev txhaum tabmeeg Vajtswv, peb thiaj tau txais txojkev zam txim thiab tsa hwjchim rau peb.

 Vajtswv, thov Koj pab kom nyuam yaus paub txo hwjchim tabmeeg Koj, lees tej kev txhaum tas siab thiab txais yuav Koj txojkev hlub thiab lub meejmom tseemceeb uas Koj pub rau nyuam yaus. Amees.

Peb puas tau txais kev zoo siab thiab muaj lub neej hloov dhua tshiab thaum lees kev txhaum rau tus Tswv lawm?

 

Nyeem Vajluskub hauv peb lub xyoo: Exalas 4:17-5:17

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn

Bài trướcHạ Mình Trước Chúa – 3/3/2022    
Bài tiếp theoHTTL ĐÀ NẴNG – CUỘC HÀNH TRÌNH THẾ KỶ – (Phần 6)