Henplais 12:25-29
Nqe cim:
“Yog li ntawd, peb cia li ua Vajtswv tsaug, rau qhov peb tau lub tebchaws uas nyob khov kho ua peb tug. Peb yuav tsum ua nws tsaug thiab pehawm nws raws li nws lub siab nyiam. Thaum peb pehawm nws, peb yuav tsum hwm thiab paub ntshai nws.” (Henplais 12:28).
Lus nug rau sawvdaws xav:
– Tus ntseeg Yexus cheemtsum muaj tus cwjpwm twg thaum hnov tus Tswv lub suab?
– “Tau lub tebchaws uas nyob khov kho” txhais tau li cas?
– Zeem paub yus txoj koob hmoov, peb yuav ua tus Tswv haujlwm zoo li cas?
Tus uas sau tsab ntawv Henplais nqua hu cov ntseeg “tsis txhob tawv tus uas qhia nej” (nqe 25). Vajtswv hais rau Nws haivneeg dhau los ntawm cov cev Vajtswv lus thiab dhau los ntawm Tswv Yexus (Henplais 1:1-2). Tiamsis cov Yixalayees tsis mloog tus Tswv tej lus hais, thiab nqi zog tsis mloog lus yog lawv tsis tau mus nyob hauv lub tebchaws coglus tseg. Ntawm no, tus sau tsab ntawv Henplais ceebtoom rau cov ntseeg hais tias yog lawv tsis kam mloog tus Tswv tej lus, nqi zog hajyam yuav txaus ntshais dua. Zaj kawm no hais txog tus Tswv ncaj ncees dawbhuv, cov Yixalayees tsis ntseeg; muab sau los qhia kom cov ntseeg paub txo hwjchim mloog thiab ua raws li tus Tswv hais.
Ib zaug ntxiv, tus uas sau tsab ntawv Henplais coj cov ntseeg rov mus ntsia lub tsamthawj saum roob Xinais, thaum uas tus Tswv hais rau Mauxes, ua rau lub roob qeeg nkaws, qhia paub tus Tswv lub hwjchim thiab kev dawbhuv ci ntsa iab. Ntawm Vajtswv xubntiag, tagnrho txhua yam puavleej ua zog qeeg nkaws. Tej tebchaws muaj zog sawv tuaj thiab poob tas. Tej vajntxwv muaj koob nto npe kuj tsis nrov npe lawm. Txhua yam kuj yuav ploj tas. Tsuas yog cov neeg uas nyob hauv “lub tebchaws uas nyob khov kho”, yog lub tebchaws uas Tswv Yexus ua thiaj nyob mus ibtxhis xwb. Vim peb ntseeg Tswv Yexus, peb tau los ua pejxeem nyob hauv lub tebchaws ntawd.
Zeem paub koob hmoov, peb yuav tsum qhia tshwm lub siab ua tus Tswv tsaug thiab “pehawm Nws raws li Nws lub siab nyiam” (nq 28). “Yuav tsum hwm” txhais tias muaj tus cwjpwm “saib taus” lossis “paub ntshai”. Peb “hwm” tus Tswv yog thaum peb zeem paub tias Nws yog tus dawbhuv, muaj hwjchim loj kawg nkaus, peb tsis zoo dabtsi. Peb “paub ntshai” vim tus Tswv zoo kawg nkaus, loj tshaj thiab peb paub tsis txog, peb tus kheej yog tus neeg tsis tsimnyog. Lub siab uas hwm li no, qhov xubthawj yuav tsum qhia tshwm thaum peb tuaj pehawm tus Tswv, xws li hnav tsoos tsho tsimnyog, zaum kom zoo, koom nrog kev pehawm, lub siab kub lug rau tes haujlwm pehawm, xav ua kom tus Tswv zoo siab. Thaum tau cob ib tes haujlwm twg, peb yuav tsum txo hwjchim, txaus siab hlo ua vim tau sijhawm los ua tus Tswv tes haujlwm, tsis yog ua yuav meejmom, tau qhuas. Cia li nco ntsoov hais tias Vajtswv yog tus uas muaj kev hlub, ua siab dawb siab zoo thiab kuj yog tus uas dawbhuv, Nws yuav muab tej kev txhaum hlawv huvsi mus.
Thov Vajtswv,
Tus Tswv, txawm yog lub ntiajteb no ua zog koog los Koj coglus pub lub tebchaws nyob khov kho rau nyuam yaus los ntawm Koj txoj koob hmoov. Thov Koj pab kom nyuam yaus paub ua Koj tsaug, muaj tus cwjpwm zoo siab hlo ua Koj tes haujlwm raws li Koj lub siab nyiam. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Tus cwjpwm thiab kev ua haujlwm ntawm peb puas tau hwm tus Tswv thiab raws li Nws lub siab nyiam lawm tau?
Nyeem Vajluskub hauv peb lub xyoo: Teev Npe 11
Kênh Youtube BHKTHN:
