II Xwmtxheej Vajntxwv 7:12-18

Nqe cim: 

“Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (II Xwmtxheej Vajntxwv 7:14).

Lus nug rau sawvdaws xav:

• Vajtswv los tshwm thiab coglus licas rau Vajntxwv Xalumoos?
• Lo lus cog tseg ntawd muaj haujlwm yuav tsum ua dabtsi?
• Peb thov Vajtswv thiab thov pab lwm tus licas, Vajtswv thiaj teb peb tej lus thov?

Hauv tshooj 6, Vajntxwv Xalumoos tau thov tus Tswv hlub Nws haivneeg thaum lawv ua txhaum. Xalumoos thov Vajtswv pab rau nws haivneeg tau ntau hli tom qab ntawd. Thiab hauv tshooj 7 no, hais txog Vajtswv los tshwm rau Vajntxwv Xalumoos pom tom qab uas ua kevcai fij lub Tuamtsev tau ib ntu lawm. Tus Tswv hais rau vajntxwv hais tias Nws yuav mloog vajntxwv tej lus thov; Nws yuav zam txim thiab kho lub tebchaws Yudas yog hais tias lawv ua tej no: Tim ib, txo hwjchim thiab lees kev txhaum; tim ob, thov tus Tswv zam txim; tim peb, nrhiav tus Tswv kawg siab kawg ntsws thiab tim plaub, tso kev phem kev qias tseg (nqe 14). Kev lees txim tiag tiag yog los ntawm ua haujlwm tshwm tso kev txhaum tseg. Tus Tswv Txojlus qhia meej hais tias yog Nws haivneeg ua raws li hais saum no, Nws yuav mloog lawv thov thiab zam txim rau lawv.

Txuas ntxiv, tus Tswv kuj hais khov kho rau vajntxwv Xalumoos hais tias, Nws yuav nyob hauv lub Tuamtsev uas Xalumoos ua thiab yuav saib ntsoov lossis mloog lawv tej lus thov ntawm qhov chaw no (nqe 15-16). Tus Tswv kuj qhia rau vajntxwv Xalumoos kom yuav tsum kawm nws txiv uas yog vajntxwv Daviv tus qauv, hwm tus Tswv thiab ua raws li Nws tej kevcai ces tus Tswv yuav foom koob hmoov rau Xalumoos (nqe 17-18). Ntawm no yog lo lus cog tseg muaj nqis uas tus Tswv pub rau vajntxwv Xalumoos thaum nws tabtom ua vajntxwv kav cov neeg Yixalayees. Tus Tswv cov lus cog tseg muaj haujlwm kom ua yog mloog lus thiaj tau txais tej koob hmoov uas Nws pub.

Nimno, peb tabtom ua neej nyob rau lub ntiajteb puv npo kev ntxhov siab, kev txhaum, Vajtswv cov menyuam yuav tsum nco ntsoov Nws tej lus cog tseg, txo hwjchim thov Vajtswv pab rau yus haivneeg, yus lub tebchaws. Vajtswv yog tus ncaj ncees, Nws yuav mloog thiab teb peb tej lus thov thaum peb paub txo hwjchim taij thov, paub nrhiav Nws kawg siab kawg ntsws thiab lees kev txhaum tabmeeg Nws. Peb haivneeg cheemtsum tau Vajtswv cov menyuam thov Vajtswv pab kom tus Tswv hlub tshua thiab cawm lawv dim hauv txojkev tsaus ntuj kom muaj ntau leej tig rov los cuag tus Tswv.

Lub neej uas nrog tus Tswv mus, peb kuj cheemtsum tswj rawv yus tus kheej txhua hnub, txo hwjchim lees tej kev txhaum uas peb tau ua hauv txhua hnub tabmeeg Vajtswv, ua li ntawd peb thiaj tau txais kev zam txim ntawm tus Tswv thiab muaj txojkev sib raug zoo nrog Nws. Vajtswv lub Pawg Ntseeg kuj cheemtsum koom siab thov Vajtswv pab rau yus haivneeg, cia siab tus Tswv yeej yuav teb sawvdaws tej lus thov xwb.

Tus Tswv, thov Koj qhia kom nyuam yaus nco ntsoov Koj tej lus cog tseg, nyuam yaus thiaj paub txo hwjchim, lees txim kawg siab kawg ntsws thiaj tau txais Koj txojkev zam txim. Thov Koj pab kom nyuam yaus nco ntsoov thov Vajtswv pab rau nyuam yaus lub tebchaws thiab nyuam yaus haivneeg. Amees.

Peb puas tau ua neeg txo hwjchim, thov Vajtswv thiab nrhiav Nws txhua hnub?

Nyeem Vajluskub hauv peb lub xyoo: Exalas 6

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn