Mathiơ 21:42-46
“Lu bơ̆n mă lui kơ Yêsu, bơ̆n gĭt kơ Sư tơpă. Gah lu bơngai mă ưh kơ lui, lu sư ‘blep thoi tơdrong đe chih tơpă: Tơmo lu bơngai man hnam tŭk boih, tơmo noh ‘Bok Kei-Dei lăng gĭt tơpă man pơklop Sư ‘bơ̆t mum hnam.” (I Pêtrôs 2:7)
Nơ̆r jet tơchĕng pơwao:
– Yua kơ kiơ Kră Yang Yêsu jet lu bơngai pơgơ̆r tơdrong lui đe Juđê nơ̆r đơ̆ng Hla bơar’Bok Kei-Dei pơma gah tơmo mum hnam?
– Lu bơngai pơgơ̆r tơdrong lui đe Juđê tơwih kơ Sư thoi yơ?
– Bơ̆n kăl kơ pơdơ̆ng hơnă đon lui bơ̆n thoi yơ?
Đang kơ hơ’mon tơdrong pơtih gia lu bơngai jang mơng mir hơmu pơm kơnê̆ noh Kră Yang Yêsu jet lu bơngai pơgơ̆r tơdrong lui đe Juđê khan iĕm tam lah đŏk lăng Hla bơar Hơriso118:22-23 noh hă?
Sơ̆, mưh man hnam, lu ‘bok thơ̆ ngăl rơih lu tơpei tơmo ‘lơ̆ng pơdơ̆ng ‘bơ̆t puăn pah mum wă man puăn pah tơnăr hnam noh tơ’bưh băl. Tơmo mum hnam noh kăl dêh lăm tơdrong wă kơ hnam gơh kơjăp.Tơdah đe kăt tơpei tơmo ưh kơ lăp thoi đei hơgăt lei sư ‘bơm tih dêh kơ tơdrong hnam ưh kơ kơjăp noh.Yua kơ ‘noh bơih na lu ‘bok thơ̆ man hnam athei rơih mă hơlen dêh ‘mơ̆i. Mă khan lei ră, đei lu ‘bok thơ̆ mơ’nah tam mă gan juăt rơih tơpei tơmo, ngăl glăi ‘bơ̆t lu sư iŏk tŭk lê̆ lu tơpei tơmo ‘lơ̆ng ‘lơ̆ng noh, na rơih iŏk tă tơ tơmo kơnê̆ kơnê̆ noh dơ̆ng.
Kră Yang Yêsu bơtho đe, Sư roi đêl nơ̆r lăm Sơ̆p Hla bơar pah so chih gah tơmo mum hnam noh, Sư wă bơtho khan đei lơ bơngai lăm adrĕch Sư kơdih kuă kơ Sư, sơngah chăng lê̆ Sư Kră Yang mă kơjăp thoi tơmo mum hnam, Sư thoi tơmo mum hnam oei hơnơ̆ng kơjăp đĕch mă khan đe kuă kơ Sư ră.Tơmo bơih kăl hloh kơ đĭ-đăng tơmam nai lăm tơdrong pơm hnam ‘nao, hnam Kră Yang, wă khan Khul Bơngai Lui.(Tơdrong jang 4:11). Kră Yang kư̆m roi tơ’bôh khan “Tơdrong hlĭch” mă ‘Bok Kei-Dei gô pơm ‘bơ̆t anăp kon pơlei Sư noh Sư gô ăn Dêh char Sư kơ adrĕch nai, wă khan Sư wă pơgơ̆r jơhngơ̆m lu adrĕch nai, đơ̆ng Sư pơgơ̆r noh, lu đe ei arih tơplih ‘nao, arih pơyua ăn kơ Sư. Na lu đe bu sơngah kơ Kră Yang Yêsu,pơrơ̆ng tơweh achăng lê̆ Kră Yang, lu sư gô răm rai thoi hơnong ‘ba mă đe yuă bơyan phang, đe preh tơ anih preh ‘ba, kial bơbơ̆t pơđông lê̆ hiong hiach đĭ.
Tơdrong ‘noh hei Kră Yang gô pơm keh ‘bơ̆t năr Sư sek tơlang đĭ-đăng adrĕch drung bơngai ning-
mônh (Đaniel 2:34-35).Lu ‘bok soi tơm păng lu kră pơgơ̆r tơdrong lui đe Juđê,lu sư kơtơ̆ng dôm nơ̆r noh, lu sư băt Kră Yang khan lu sư. Lu sư băt Kră Yang khan lu sư thoi noh mă trŏ sư, lu sư tơbral, mă-lei lu sư ưh kơ tơbral, tă tơ chă đon wă pơlôch lê̆ Kră Yang. Mă-lei yua kơ lu sư hli kơ kon pơlei na lu sư ưh kơ pơlôch Kră Yang ‘bơ̆t jơ ‘noh.
Dang ei Kră Yang ‘Bok Kei-Dei pơdơ̆ng Khul Lui ‘bơ̆t Kră Yang Yêsu Krist dang Tơmo mum Hnam.’Bok Pôl kư̆m chih wă pơma kơ tơdrong gĭt bơ̆n kơplah bơ̆n oei lăm Kră Yang noh sư chih khan thoi âu: “Bơ̆n thoi đe pơtăm keh minh pôm hnam. Lu jơ̆ng ‘bang Yêsu hăm lu bơngai pơtruh nơ̆r ‘Bok Kei-Dei lu sư thoi lu jrăng pơtăm tŏk-bŏk, na Yêsu Sư thoi jrăng mum.(Êphêsô 2:20)
Bơ̆n athei kơchăng pơ’lơ̆ng hli kơ bơ̆n tơchĕng chhôk dêh bơ̆n kĕ pơm ‘lơ̆ng kơdih na sơngah kuă kơ gơnang kơ ‘Bok Kei-Dei, achăng lê̆ Sư. Kư̆m athei kơchăng hli kơ tơdrong lui chroih pơthơr bơ̆n wă kơ bơ̆n rơih hơnă plơ̆ng nai dơ̆ng ‘ngoaih kơ Kră Yang Yêsu; ‘Bok Pôl kư̆m hlôi tơbăt wă kơ Khul Lui pơlei Kôrintô kơchăng, sư tơbăt thoi âu: “Sư pơm tơm kơ bơ̆n na iĕm athei gơnang kơ Sư mă tơpă wă kơ lui kơjăp kiơ̆ thoi đe bơtho iĕm sơ̆, na tơdrong lui iĕm rai đunh rai wơ̆. Mă tôm tơdrong kiơ kiơ athei băt bơnê kơ ‘Bok Kei-Dei ngăl” (Kôlôsê 2:7)
Kơkuh kơ Ih Kră Yang, inh apĭnh Ih pă jô̆ yo kơ inh yua kơ lơ wơ̆t inh arih dang lĕ tơweh lê̆ Ih đơ̆ng chăl arih inh.Apinh Ih tơgŭm inh ling-lang băt kơnăl kơ Ih thoi Tơmo Tih kơjăp ling-lang,wă kơ inh gơnag kơ Ih na tơdrong lui inh kơjăp. Inh krao khan yua anăn Kră Yang Yêsu Krist, Amen!
Bơ̆n hăm đei pơma lu tơdrong kiơ,pơm lu tơdrong kiơ dang lĕ tơweh lê̆ Kră Yang đơ̆ng chăl arih bơ̆n ưh?
Đŏk nơ̆r’Bok Kei-Dei lăm pêng sơnăm: II Hơ’mon 20.
Kênh Youtube BHKTHN:
