Tĭt 2:11-15
“Thoi noh na ‘Bok Kei-Dei athei bơ̆n hŭt đĭ dôm tơdrong kơnê̆, ‘nĕ pă kiơ̆ đon lu bơngai ưh kơ lui. Đon lu bơngai ưh kơ lui sư ‘maih pơm lơ tơdrong kư̆ kă đĕch. ‘Bok Kei-Dei athei bơ̆n pơm jơhngơ̆m đon dim ‘lơ̆ng tơpăt kơ Sư hăm bôl buăl ala teh âu mơ̆n” (Tĭt 2:12)
Nơ̆r jet tơchĕng pơwao:
– Tơdrong ‘Bok Kei-Dei mơnat ‘noh kiơ?
– Tơdrong mơnat păng tơdrong arih lui yom đei tơ’bưh dih băl thoi yơ?
– Bơ̆n athei arih thoi yơ kơplah đei tơdrong Kră Yang mơnat?
‘Bok Pôl đei pơma ‘bơm kơ “’Bok Kei-Dei khan tơbăt ăn kơ bơ̆n băt kơ Sư ‘mêm mơnat kơ bơ̆n tơpă wă pơklaih đĭ đăng đơ̆ng tơdrong yoch” (trong 11). “’Mêm mơnat” dah mơnat ăn đĕch noh tơdrong ‘mêm ‘Bok Kei-Dei ăn đĕch tơbăt kơ bơ̆n bơih bơngai yoch ưh kơ trŏ wă iŏk tơdrong mơnat noh, mălei đei ăn lăm Kră Yang Yêsu Krist kơplah “Kră Yang Yêsu ăn akâu Sư kơdih chu lôch tang bơ̆n bơngai yoch. Sư huai iŏk bơ̆n wă kơ bơ̆n huay pă pơm tơdrong yoch dơ̆ng. Sư ăn kơ bơ̆n jing kon ‘lơ̆ng tơpăt Sư păng Sư ăn kơ jơhngơ̆m bơ̆n wă pơm ‘lơ̆ng hăm đe ling lang” (trong 14). Đơ̆ng tơdrong ‘noh bơih, kơplah lui sơng iŏk Kră Yang Yêsu, gơh mơnat ăn tơdrong yoch bơ̆n păng iŏk tơdrong dŏng pơklaih “na dang ei Sư pơklaih bơ̆n đơ̆ng tơdrong yoch tơpă. Sư pơklaih ưh kơsĭ bơ̆n pơm tơdrong ‘lơ̆ng ‘mơ̆i na Sư pơklaih. Sư pơklaih bơ̆n bơngai yoch yua kơ Sư ‘mêm mơnat tơpă” (Tĭt 3:5).
Tơdrong Kră Yang ‘mêm mơnat ưh kơsĭ dŏng bơhngol bơ̆n đĕch ôh na dŏng bơ̆n klaih đơ̆ng tơdrong yoch oei chô̆ pơkơ̆ng bơ̆n. Đơ̆ng noh, kơplah minh ‘nu bơngai mă iŏk tơdrong dŏng pơklaih, gah Sư bơih, lei na tơdrong ‘mêm mơnat noh “thoi noh na ‘Bok Kei-Dei athei bơ̆n hŭt đĭ dôm tơdrong kơnê̆, ‘nĕ pă kiơ̆ đon lu bơngai ưh kơ lui. Đon lu bơngai ưh kơ lui sư ‘maih pơm lơ tơdrong kư̆ kă đĕch. ‘Bok Kei-Dei athei pơm jơhngơ̆m đon dim ‘lơ̆ng tơpăt kơ Sư hăm bôl buăl ala teh âu mơ̆n” (trong 12). Tơdrong arih pơm ‘lơ̆ng lui yom kơplah iŏk tơdrong ‘mêm mơnat Kră Yang ăn noh ưh kơsĭ sơngah kơ tơdrong yoch păng dôm tơdrong hưch ham kơnê̆ adrol sơ̆ ôh, na gơnang kơ tơdrong pran Kră Yang wă kơ arih lui yom păng bơ̆jang kơ Sư hloi lăm chăl arih dang ei. Yua kơ bơ̆n “kơplah bơ̆n chang gô Yêsu Krist mă tih hloh. Sư bơih ‘Bok Dŏng pơklaih bơ̆n, Sư wă jur tơ ala teh dơ̆ng. Năr ei kơnh bơ̆n gô ‘bôh Sư hlĭch tơpă, akâu Sư ‘bak ‘lơ̆ng rŏ hloh kơ đĭ đăng bơngai ala teh, na jơhngơ̆m bơ̆n chơt hiôk păng Sư” (trong 13). Trong 14 tơbăt tơdrong tơ’bưh lăm tơdrong dŏng mơnat kơ tơdrong arih ba ăn đei yua kơ lơ bơngai, “Kră Yang Yêsu Krist ăn akâu Sư kơdih chu lôch tang kon bơngai bơ̆n. Sư huai iŏk bơ̆n wă kơ bơ̆n huay pơm yoch dơ̆ng. Sư ăn kơ bơ̆n jing kon ‘lơ̆ng Sư păng Sư ăn kơ jơhngơ̆m bơ̆n wă pơm ‘lơ̆ng hăm đe ling lang” (trong 14 BTTHĐ).
Kơplah lui sơng iŏk Kră Yang Yêsu pơm ‘bok dŏng pơklaih chăl arih bơ̆n, rim kơ bơ̆n tă kơ iŏk tơdrong mơnat ăn ngăl, bơ̆n ưh kơ đei layơ tep lăm tơdrong Kră Yang mơnat dŏng pơklaih mălei lăm năr mă bơ̆n oei arih lăm teh đak âu, bơ̆n kăl kơ gơnang kơ tơdrong pran Kră Yang wă kơ weh đơ̆ng tơdrong pơhlŭ, hơmet bơ̆n kơdih dôm “tơmam tơblah ‘Bok Kei-Dei” (Êphêsô 6:10-18). Wă kơ kĕ jei đơ̆ng dôm tơdrong kơnê̆ pơhlŭ, păng chu wă bơ̆jang kơ Kră Yang jơ̆ Tơ’ngla chu lôch huai iŏk tơdrong yoch bơ̆n. Athei ‘blŏk ling lang Kră Yang dŏng bơ̆n păng pơhrăm pơjuăt bơ̆n jing kon pơlei pơla gah Sư. Bơ̆n athei adrin pơm tơdrong ‘lơ̆ng păng arih pơm ‘lơ̆ng lăm jơ năr mă oei chang gô Kră Yang wă jur dơ̆ng wă iŏk bơ̆n brŏk oei hăm Sư ling lang.
Kơkuh kơ Kră Yang, bơnê kơ Ih đei dŏng pơklaih inh bơngai mă ưh kơ hơnhŏ kơ klaih. Apinh Kră Yang tuh thim jơhngơ̆m pran wă kơ inh pơ̆n nuih tơ’bưh păng kĕ jei đơ̆ng dôm tơdrong pơlong, pơhlŭ, arih pơm kơ Kră Yang lăp đon păng tơgŭm kơ bơngai nai kơjăp yak kiơ̆ trong brŏk tơ pơlei ‘lơ̆ng. Krao khan yua anăn Yêsu Krist, Amen!
Bơ̆n arih hăm hiơ̆k lăm tơdrong lui yom pơm ‘lơ̆ng kơplah đei iŏk bơih tơdrong ‘mêm mơnat?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 37
Kênh Youtube BHKTHN:
