Mathiơ 19:7-9
Trong tơm: “Yua kơ thoi noh na Inh wă khan kơ iĕm dang ei thoi âu: Bơngai bu achăng lê̆ akăn sư, akăn sư ưh kơ đei pơm pơyô kư̆ kă, na sư iŏk akăn plơ̆ng, bơngai ‘noh pơm yoch pơ’brơh kơ akăn sư. Mă-lei dah akăn sư pơm pơyô kư̆ kă kơ klo sư hơdrol, ‘noh klo sư gơh achăng. Klo sư mă hơdrol achăng lê̆ akăn sư boih, na dah bơngai nai đơ̆ng rŏng iŏk pơm akăn, bơngai noh kư̆m dang pơm yoch mơ̆n, yua kơ klo sư mă hơdrol achăng kư̆ kă ưh kơ trŏ kơ tơdrong achăng.” (Mathiơ 19:9)
Nơ̆r jet tơchĕng pơwao:
– Lu bơngai pharisi pơma tơplơ̆ lăm nơ̆r Kră Yang Yêsu bơtho păng khôi juăt Môis hăm tơdrong kơnhăm tơdrong kiơ?
– Kră Yang Yêsu đei tơl lu sư thoi yơ?
– Lu bơ̆n đei hŏk iŏk tơdrong kiơ kơ bơ̆n kơdih đơ̆ng lăm ‘bai pơhrăm âu?
Đơ̆ng rŏng kơ Kră Yang Yêsu bơtho gah tơdrong gĭt yom kơjăp gah ŭnh om, mă-lei lu bơngai pharisi jet sư khan: “Tơdah thoi ei, lei yua kơ kiơ Môis bơtho athei pơm hla bơar achăng akăn, đơ̆ng noh achăng hloi?” (trong 7 BTTHĐ). Lu sư wă pơjuă tơdrong Kră Yang bơtho, kơplah lu sư đei jet tơplơ̆ hăm nơ̆r Kră Yang bơtho păng gah khôi juăt Môis. Lu bơngai pharisi đei iŏk đơ̆ng lăm Bơtho Khôi Juăt 24:1-4, păng lu sư khan ‘bok Môis gơh ăn phep achăng klokăn, thoi noh kiơ̆ kơ tơdrong juăt đơ̆ng sơ̆ lu Ra’bi đe Juđê kư̆m bơtho athei achăng klokăn thoi noh mơ̆n.
Kră Yang Yêsu đei tơl nơ̆r lu bơngai pharisi wă kơ lu sư băt yua kơ kiơ ‘bok Môis đei chih lăm Hla bơar Khôi juăt thoi noh, “yua kơ lu yă ‘bok lu sư arăng kơ̆l dêh na Môis khan gơh pơm hla bơar achăng klokăn, mă-lei adrol kơ noh ưh kơ đei ôh”. (trong 8 BTTHĐ). Nơ̆r pơma “Arăng kơ̆l” wă pơma kơ lăm jơhngơ̆m arăng ưh kơ chu tơbral, ưh kơ chu wă kơ pơhiôk dih băl păng wă chu kiơ̆ tơdrong yoch păng kiơ̆ thoi kơdih wă. Kơplah klo dah akăn pơm yoch plah klokăn, ‘noh lĕch đơ̆ng arăng kơ̆l ưh kơ wă tơbral tơdrong yoch. Lu sư pơm kơ tơdrong tơ’bưh kơjăp tơdrong klokăn jing tôch đon. Thoi noh na Kră Yang ‘Bok Kei-Dei yua ‘bok Môis chih bơtho păng pơgŏ athei pơm hla ar achăng klokăn. Kră Yang Yêsu pơma tơpăt minh ‘măng dơ̆ng hăm lu bơngai pharisi ‘noh “achăng klokăn” ưh kơ đei layơ lăm nơ̆r ‘Bok Kei-Dei pơma đơ̆ng blŭng a sơ̆, ưh kơ đei thoi noh ôh. Tơdah ưh kơ đei tơdrong plah klokăn lei dôm tơdrong noh nai kư̆m ưh kơ gơh drơ̆ng lăm tơdrong achăng klokăn, đơ̆ng noh Kră Yang Yêsu bơtho tơdrong kăl lu bơngai pharisi păng lu bơngai Juđê mă oei pơm yoch tơdrong pơm pơyô kư̆kă dah plah klokăn.
Dang ei, jô̆ tơdrong achăng klokăn lăm teh đak âu kang rai lơ, mă khan Khul bơngai lui kư̆m đei, kơsô̆ lu achăng klokăn rai lơ pơm kơ lơ bơngai pơm yoch dang ei hloi dah ‘bôh păng rok kiơ̆ đơ̆ng rŏng kơ noh lĕch yua đơ̆ng lu bơngai achăng klokăn. Lu bơ̆n kư̆m đei kơtơ̆ng đei lơ tơdrong kư̆m nhen trŏ, wă kơ gơh pơma dŏng gah tơdrong pơchah gah ŭnh om. Lu bơ̆n jơ̆ Khul bơngai lui, kơplah đei tơdrong ưh kơ ‘lơ̆ng, đei tơdrong pơma băl, dah đei tơdrong kiơ nai dơ̆ng, bơ̆n athei lăng hơlen kơdih kâu bơ̆n, wă kơ ‘bôh tơdrong kiơ đei lăm bơ̆n, oei pơm kơ bơ̆n “arăng kơ̆l”. Ưh kơ wă chu iŏk tơdrong bơ̆n rơdu, tơdrong yoch bơ̆n, tơdah ưh kơ mơnat ăn kơ klo dah akăn bơ̆n kơdih. Athei pơma pơtruh dih băl mă tơpă, đơ̆ng noh krao khan roi pơdah kơ Kră Yang wă kơ Sư bơtho tơ’bôh păng pơklaih. Athei ling lang kăl kơ ‘blŏk tơdrong Kră Yang tơchĕng wă noh wă ba ăn kơ lu bơ̆n lăm tơdrong ŭnh om gơh đei mơn đei tơdrong pŭn hiôk đơ̆ng Kră Yang ăn.
Hăm đei tơdrong yoch hơyơ lăm tơdrong ‘mêm lăm ŭnh om pơm kơ bơ̆n “arăng kơ̆l” mă Kră Yang đei bơtho tơ’blŏk kơ bơ̆n ưh?
Ơ Kră Yang, inh bơnê kơ Ih đei bơtho gah tơdrong pơgơ̆p ŭnh om. Apinh Ih tơgŭm inh wă huay kơ arăng kơ̆l lăm dôm tơdrong Ih đei tơ’blŏk gah ŭnh om păng tơdrong ‘mêm inh păng ŭnh om inh gơh đei pŭn hiôk. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 17
Kênh Youtube BHKTHN:
