Yakơ 1:26-27
Trong tơm: “Bơngai lui bu băt kơ năm ngôi tơ lu kon mơti, lu bơngai adro apo pơmat-tat kơ’bah kơ’bôch păng sư ưh kơ kiơ̆ thoi lu bơngai tơ ala teh ưh kơ lui, bơngai noh boih ‘Bă tơm bơ̆n ‘Bok Kei-Dei jô̆ sư lui kơjăp hăm pơm tơpăt.” (Yakơ 1:27)
Nơ̆r jet tơchĕng pơwao:
– Ayơ mă tơ’bôh kơ minh ‘nu bơngai lui tơpă?
– Yua kơ kiơ tơdrong ‘noh jơ̆ gĭt kăl?
– Lu bơ̆n đei tơ’bôh kơ bơ̆n jing minh ‘nu bơngai lui thoi yơ?
Trong kơ̆l tơm lăm Sơ̆p hla bơar Yakơ noh jơ̆ đon lui tơpă, păng ‘bar trong Sơ̆p hla bơar năr âu, ‘bok Yakơ tơ’bôh pêng tơdrong tơ’bôh kơ minh ‘nu bơngai lui. Noh jơ̆ bơwei nơ̆r ‘bơ̆r pơma, bơ̆jang dŏng tơgŭm bơngai nai, păng arih ‘lơ̆ng rơgoh, weh ataih đơ̆ng dôm tơdrong ‘mê̆ ‘mach lăm teh đak (trong 26,27). Bơngai lui tơpă ưh kơ sĭ bơwei đon lui lăm jơhngơ̆m đĕch ôh mă lei tơ’bôh kơ bơngai nai păng bơngai nai gô pơsĭt kơ bơ̆n bơngai lui tơpă.
Hơdrol hloh, ‘Bok Yakơ pơma tơ’bôh kơ minh ‘nu bơngai lui tơpă noh jơ̆ bơwei nơ̆r ‘bơ̆r pơma. Kră Yang Yêsu đei bơtho khan thoi âu: “Yua kơ đơ̆ng ‘bĕnh lăm jơ-hngơ̆m na ‘bơ̆r tơlĕch” (Mathiơ 12:34). Nơ̆r pơma tơ’bôh kơ lăm jơhngơ̆m thoi yơ. Tơdah lăm jơhngơ̆m lui gơnang kơ Kră Yang lei dôm nơ̆r pơma pơ ư-ang kơ Kră Yang , păng tơ’bôh tơdrong ‘mêm păng tơdrong mơnat đơ̆ng Kră Yang hăm bơngai nai.
Hơrĭ, ‘bok Yakơ pơma kơ dôm tơdrong jang tơgŭm bơngai nai, mă hloh loi kơ dôm lu bơngai oei lăm tơdrong hơnat pat nhen thoi kơ lu bơngai mơti, bơngai hơdro po. Đon lui tơpă ưh kơ sĭ oei lăm hnam akŭm đĕch ôh mă lei kŭm kăl kơ lech tơ’ngoaih, tơ’bưh hăm lu bơngai đei tơdrong hơnat pat hăm tơdrong jang ‘mêm mơnat păng pơm ‘lơ̆ng tơgŭm bơngai nai.
Mă pêng noh jơ̆ arih ‘lơ̆ng rơgoh, weh ataih đơ̆ng dôm tơdrong ‘mê̆ ‘mach. Bơngai lui arih hơdai hăm lu bơngai ưh kơ lui mă lei ưh kơ gah lu bơngai ưh kơ lui păng ưh kơ arih kiơ̆ dôm tơdrong ưh kơ rơgoh lăm teh đak âu. Đon lui tơpă kăl kơ tơplih tơdrong arih lăm kon pơlei lơla, wă kơ jing thoi “’boh păng hơdah ăn kơ kon bơngai lăm teh đak”
Kiơ̆ kơ đe nai đei roi pơdah kơ tơdrong lui sư lui kiơ̆ kơ dôm tơdrong phĕt lu sư đei roi pơdah păng dôm tơdrong giĕng phĕt lăm tơdrong lu sư đei lui. Lu bơ̆n bơngai lui kơ Kră Yang, lu bơ̆n kăl kơ roi pơdah kơ đe bơ̆n jing bơngai lui Tơdrong ‘Nao ‘Lơ̆ng, kăl kơ năm akŭm kơkuh, kăl kơ pơnam bơ̆jang lăm tơdrong jang kiơ̆ thoi lăm hnam akŭm wă. Mălei dôm tơdrong noh ưh tam mă tôm bơ̆n kăl kơ tơ’bôh kơ bơ̆n jing minh ‘nu bơngai lui tơpă. Tơdrong lui noh kăl kơ tơ’bôh dôm tơdrong jang lăm chăl arih noh jơ̆ lăm nơ̆r pơma, tơdrong jang, tơdrong arih sa. Kơplah bơ̆n khan bơ̆n jing minh ‘nu bơngai lui, thoi noh nơ̆r pơma, tơdrong jang păng tơdrong arih sa lu bơ̆n kŭm kăl kơ kiơ̆ thoi nơ̆r Kră Yang đei bơtho khan, dah ưh, lu bơ̆n kăl kơ hơlen lăng bơ̆n jing bơngai lui tơpă lei mă ưh!
Đơ̆ng nơ̆r pơma, tơdrong pơm păng tơdrong arih lu bơ̆n, lu bơngai jih ‘ma kơ bơ̆n hăm đei ‘bôh hơđăl kơ lu bơ̆n jing kon ‘Bok Kei-Dei dah ưh?
Ơ Kră Yang inh bơnê kơ Ih đei rơih păng huai iŏk inh. Pinh tơgŭm inh ling lang tơ’bôh dôm tơdrong đon lui lăm nơ̆r pơma, lăm tơdrong jang, păng tơdrong arih sa. Hơpơi kơ dôm lu bơngai mă lăng lă chăl arih inh đei ư-ang kơ Kră Yang ‘Bă tơ pal plenh ti. Yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 19
Kênh Youtube BHKTHN:
