Klei Aê Diê Blŭ: II Kôrantô 8:16‑21
Êlan kliăng:“Kyuadah hmei gĭr tui duah klei djŏ, amâo djŏ knŏng ti anăp Khua Yang ôh, ƀiădah wăt ti anăp mnuih msĕ mơh” (II Kôrantô 8:21)
Klei êmuh ksiêm mĭn: Si klei Khua ƀĭng kna Y‑Pôl lač kơ phung mă bruă mbĭt? Ya ngă ñu čiăng ngă bi jăk klei đru mguôp? Ya klei hriăm drei mâo mơ̆ng Khua ƀĭng kna Y‑Pôl tơdah ngă dŭm bruă djŏ tuôm kơ prăk mah?
Êlâo hĭn, Khua ƀĭng kna Y‑Pôl myơr klei “bi mni kơ Aê Diê, Pô dưm leh hlăm ai tiê Y‑Tit klei hur har msĕ snăn kơ diih” (êlan 16). Mơ̆ng anăn, drei ƀuh knuih ñu luă gŭ tơdah ñu thâo săng Aê Diê pô dôk gĭt gai djăp mta bruă, leh anăn Ñu ruah klei dưi tiŏ nao hlei pô nao hlăm bruă mngăt myang, wăt tơdah ñu pô jing pô hưn mdah leh klei čiăng hlăm bruă knuă ăt msĕ mơh brei Y‑Tit nao ti Sang Aê Diê Kôrantô mă kdrêč đru mguôp. Klei leh kơ anăn hlăm êlan 19, Khua ƀĭng kna Y‑Pôl bi mklă bruă đru mguôp čiăng đru ayŏng adei hlăm sa klei đăo jing bruă ngă jăk, leh anăn ñu pô srăng bi leh bruă jăk anei amâo djŏ hŏng hdră kñăm mpŭ mni klei hing ang pô amâodah duah klei tŭ dưn kơ pô, ƀiădah “čiăng bi guh kơang Khua Yang”.
Êngao anăn, Khua ƀĭng kna Y‑Pôl lŏ brei kơ drei sa klei bi hmô ăt msĕ mơh klei bhiăn hlue ngă bruă knuă djŏ tuôm kơ prăk mah: Tal sa, ñu amâo ngă hjăn ôh ƀiădah mâo Y‑Tit leh anăn sa čô mkăn amâo hưn anăn ngă bruă đru mguôp leh anăn kriê dlăng prăk mah čiăng bi mklă klei doh mngač leh anăn ñĕ kơ klei arăng hing amâo djŏ. Tal dua, klei brei mđing hlăm klei bhiăn ruah mnuih ngă bruă jăk ƀiădah ênưih ngă kơ arăng čhuai anei jing “Phung Sang Aê Diê ruah ñu”, “hing ang hlăm jih jang Phung Sang Aê Diê kyua klei ñu mtô klei mrâo mrang jăk” (êlan 18‑19), amâo djŏ ôh ruah tui si klei pô čiăng. Kyua phung anei mâo bruă klam “čiăng bi êdah ai tiê kmah hmei”, “ƀuah hmei hlăm klei hmei kiă kriê mnơ̆ng brei pap lu êbeh anei” (êlan 20).
Knuih hdĭp jăk mơ̆ng Khua ƀĭng kna Y‑Pôl klă sĭt amâo mâo pô dưi ƀuah ôh, khădah snăn amâo djŏ kyua snăn ôh tơdah mă bruă ñu amâo mđing kơ klei arăng bi mĭn, ƀiădah ñu lač leh klei bhiăn pô jing gĭr ngă bi jăk, hlăm anăn mâo bruă kriê dlăng prăk mah, amâo djŏ knŏng doh mngač ti anăp Aê Diê ôh ƀiădah lŏ brei klă mngač ti anăp mnuih mơh (êlan 21). Tui hriăm klei bi hmô mă bruă mơ̆ng Khua ƀĭng kna Y‑Pôl đru drei amâo lĕ hlăm klei mĭn jhat msĕ si phung mă bruă kơ Aê Diê đăm lĕ ôh kơ prăk mah, amâodah hjăn pô bi mklă dŭm bruă djŏ tuôm kơ prăk mah. Jih dua klei mĭn ênưih mjing klei găl kơ Satan. Klei yuôm bhăn hĭn hlăm bruă djŏ tuôm kơ prăk mah jing Anăn Aê Diê dưi guh kơang tơdah bruă Ñu dưi đĭ kyar leh anăn Sang Aê Diê mâo klei hơ̆k mơak.
Si drei ba yua klei bhiăn kriê dlăng prăk mah?
Wah lač: Ơ Aê Diê! Kâo bi mni kơ Ih kyua dŭm klei Ih mtô kâo răng kriê klei hdĭp mă bruă kpă ênuah, klă mngač kơ prăk mah, amâo djŏ knŏng ti anăp Aê Diê ôh ƀiădah ăt ti anăp mnuih mơh.
Dlăng Klei Aê Diê Blŭ hlăm tlâo thŭn: Y‑Amôs 1:1‑2:5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
