Galati 1:11-24
“Kon bơngai ưh kơ đei bơtho inh tơdrong noh, pôm Yêsu Krist đĕch tơbăt kơ inh tơdrong ‘nao ‘lơ̆ng Sư.” (Galati 1:12)
Nơ̆r jet tơchĕng pơwao:
– ‘Bok Pôl pơma thoi yơ gah Tơdrong ‘Nao ‘Lơ̆ng mă sư đei ră roi?
– Tơdrong băt mơn kơ sư gah Tơdrong ‘Nao ‘Lơ̆ng phara kơ sư đei băt mơn kơplah sư lui kiơ̆ tơdrong lui Juđê thoi yơ?
– Lu bơ̆n đei sơng iŏk Tơdrong ‘Nao ‘Lơ̆ng thoi yơ?
Đơ̆ng rŏng kơ sư đei pơma rơđah hơđăl kơ tơdrong kơ nhăm kơ tơdrong jang sư noh jơ̆ ưh kơ wă kơ kon bơngai lăp đon, ‘bok Pôl đei tơl ăn kơ lu bơngai mă chă trong pơma kơnê̆ kơ sư: Lu bơngai đei khan kơ sư thoi âu Tơdrong ‘Nao ‘Lơ̆ng mă sư bơtho noh jơ̆ đơ̆ng kon bơngai chă plêl đĕch (trong 11). ‘Bok Pôl đei pơma tơl lu sư Tơdrong ‘Nao ‘Lơ̆ng mă sư đei bơtho noh jơ̆ ưh kơ đơ̆ng kon bơngai ôh, kŭm ưh kơ đơ̆ng lu bơngai lui tơring Juđê bơtho sư ôh (trong 12, 17-22).
Yua kơ kiơ tơdrong gĭt gah tơdrong ‘bok Pôl ưh kơ đei iŏk Tơdrong ‘Nao ‘Lơ̆ng đơ̆ng kon bơngai? Wă kơ tơl nơ̆l noh, ‘bok Pôl đei roi gah tơdrong mă sư sơng iŏk tơdrong lui sư kơ dih na tơl ăn. Sư đei pơma thoi âu đơ̆ng sơ̆ sư lui gah Juđê “pran dêh” gah “kiơ̆ tơdrong juăt đơ̆ng lu ƀok kơdră lu sư sơ̆ ”. Pơma pha ra, tơdrong lui gah Juđê mă sư đei lui sơ̆ noh, mă khan sư mơnơh dêh kơ tơdrong noh, mă lei noh jơ̆ kiơ̆ tơdrong juăt đĕch, kiơ̆ tơdrong “juăt so”, tơdrong mơn “inh đei mơ̆ng đe bơtho” wă khan “tơdrong mơn noh đơ̆ng đe nai”. Ưh kơ đei tơdrong mơn kơdih hăm Kră Yang.
Mălei, gah Tơdrong ‘Nao ‘Lơ̆ng noh jơ̆ pha ra. Đei ‘bar wơ̆t ‘bok Pôl pơma rơđah tơdrong mă sư đei iŏk Tơdrong ‘Nao ‘Lơ̆ng noh jơ̆ đơ̆ng Kră Yang (trong 12, 15-16). Thoi noh tơdrong âu pha ra kơ tơdrong lui khul Juđê, tơdrong lui mă Pôl đei noh jơ̆ đơ̆ng Kră Yang ‘Bok Kei-Dei. Tơpă Pôl đei pơma hơđăl kơ Tơdrong ‘Nao ‘Lơ̆ng mă sư đei noh ưh kơ đơ̆ng ‘bok Pêtrôs, Yakơ dah bơngai bu đơ̆ng Juđê, mă khan đei bơngai bơtho noh jơ̆ đơ̆ng Kră Yang ră, mă lei gah ‘bok Pôl noh jơ̆ tơdrong lui kiơ̆ băl đĕch, tơdrong lui noh wă khan “inh đei mơ̆ng đe”. Sư kăl kơ tơ’bơ̆p Kră Yang kơdih sư. Lu bơngai tơnăp nhen thoi yă Mari, ‘bok Sachari, yă Ane, ‘bok Simêôn… lăm tơdrong pha-ra lu sư đei tơdrong tơƀơ̆p Kră Yang kơdih lu sư hăm ‘Bok Kei-Dei, ưh kơ đơ̆ng tơdrong lui đơ̆ng ‘bok yă dah Sơ̆p hla bơar đei bơtho. Yă Samari đơ̆ng rŏng kơ tơ’bơ̆p Kră Yang na sư lui păng pơm kơdranh kơ kon pơlei, mă lei kơplah kon pơlei đei mơ̆ng Kră Yang bơtho lu sư đei khan thoi âu: Lu bơngai lui đơ̆ng rŏng khan kơ duch ei thoi âu: “Nhôn lui kơ Sư dang ei ưh kơ sĭ nhôn băt đơ̆ng ih ôh. Nhôn lui kơ Sư dang ei yua kơ nhôn kơtơ̆ng Sư bơtho na nhôn băt hloi kơ Sư ‘Bok Dŏng Pơklaih kon bơngai tơpă.” (Yôhan 4:42).
Chăl dang ei, lu bơ̆n đei lui yua kơ đei bơngai nai kơdranh ăn kơ bơ̆n, păng lu bơ̆n kăl kơ đei bơnê kơ ‘Bok Kei-Dei lăm tơdrong noh, mă lei Tơdrong ‘Nao ‘Lơ̆ng mă lu bơ̆n đei sơng iŏk noh jơ̆ bơ̆n kăl kơ băt mơn kơdih bơ̆n hăm ‘Bok Kei-Dei. Lu bơ̆n đei mơ̆ng đe pơma thoi âu “‘Bok Kei-Dei ưh kơ đei sâu!” Rim ‘nu kơ bơ̆n kăl kơ đei đon lui, hăm tơdrong tơƀưh hăm ‘Bok Kei-Dei kơdih lu bơ̆n.
Ơ Kră Yang, Inh bơnê kơ Ih yua kơ đei bơngai dui ba inh păng bơtho inh ăn kơ inh băt kơ Ih. Mă lei pinh Ih tơgŭm inh wă kơ inh tơ’bơ̆p Ih, băt mơn kơ Ih, wă kơ dôm nơ̆r inh kơdranh noh jơ̆ tơdrong tơpă đơ̆ng inh băt mơn tơpă. Yua anăn Kră Yang Yêsu Krist, Amen!
Lu bơ̆n jơ̆ “kon” lei mă “sâu” Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Luka 14
Kênh Youtube BHKTHN:
