Pajlug 20:29
Nqe cim
“Peb qhuas cov hluas lub zog thiab hwm cov laus uas plaubhau dawb paug.” (Pajlug 20:29).
Lus nug rau sawvdaws xav:
– Qhov zoo ntawm cov neeg laus thiab cov neeg hluas yog dabtsi?
– Txojkev sib txuas ntawm txhua tiam neeg zoo li cas?
– Peb tsim tsa txojkev sib txuas thiab koomtes ntawm txhua tiam neeg hauv tsevneeg thiab Pawg Ntseeg zoo li cas?
Txhua tiam neeg, cov laus lossis cov hluas puavleej muaj qhov zoo. Cov neeg laus muaj hnubnyoog lawv ntsib ntau yam zoo lossis txomnyem, paub ntau yam vim yog ua neej nyob ntev. Lo lus “plaubhau dawb paug” tsis yog hais txog cov neeg muaj hnubnyoog laus tiamsis kuj qhia tshwm lub neej muaj tswvyim, ncaj ncees rau cov neeg hluas “saib taus”, xws li Vajntxwv Xalumoos sau tseg: “Ua neej nyob ntev yog nqi zog ntawm txojkev ncaj ncees. Ua neej laus plaubhau dawb yog lub mom yeebkoob.” (Pajlug 16:31). Cov hluas lub zog yog lawv lub meejmom lossis tau ntsejmuag uas lawv txaus siab. Nrog rau lub zog ntawd, cov hluas yuav muaj sijhawm ua tau ntau yam li lawv qhov kev npaj tseg. Hnub thaud, Yausuas xaiv cov tubrog hluas uas siab tawv mus ntaus yeebncuab: “Yog li ntawd, Yausuas thiaj txhij tubrog mus tua lub nroog A-is. Nws xaiv nws cov tubrog tau peb caug txhiab leej uas khov kho thiab kom lawv mus thaum ib tag hmo.” (Yausuas 8:4).
Ob qhov sib piv hauv nqe 29 yog siv ua kom qhia tawm qhov zoo thiab txojkev sib raug zoo ntawm ob tiam neeg. Cov hluas cheemtsum kawm paub cov laus kev ua neej, thiab cov neeg laus kuj cheemtsum cov hluas lub zog. Lub neej ncaj ncees, muaj tswvyim ntawm tej niamtxiv ua rau cov menyuam muaj kev zoo siab heev, thiab thaum tej menyuam ua tau ces cov laus kuj muaj kev zoo siab, tau ntsejmuag: “Tej neeg laus zoo siab heev rau lawv tej xeebntxwv ib yam li tej menyuam zoo siab rau lawv niam lawv txiv.” (Pajlug 17:6). Tej lus qhia txawj ntse ntawm Vajntxwv Xalumoos qhia paub ob pab neeg hnubnyoog sib txawv, neeg laus thiab cov neeg hluas puavleej muaj nqis rau tus Tswv thiab ib leeg cheemtsum ib leeg.
Cov ntseeg Yexus cheemtsum zeem paub lub meejmom thiab feem xyuam ntawm yus hauv txhua pab. Yog neeg laus ces ua qauv rau cov hluas los ntawm kev ua neej sib hlub, dawbhuv. Dua li ntawd, cov neeg laus yuav tsum qhia, piav tej uas yus tau txais hauv tus Tswv txoj koob hmoov thiab tej zaj kawm hais txog kev ntseeg, tej uas yuav ua tau lossis tsis tau rau cov hluas. Cov hluas kuj cheemtsum siv zog thaum tseem hluas, rau siab ntso kawm ntaub ntawv, ua haujlwm tas siab. Cov hluas yuav tsum txo hwjchim kawm, saib tej uas cov neeg laus qhia. Yuav tsum qhia tshwm kev saib taus niamtxiv pogyawg, tej menmyuam hauv tsevneeg thiab tej neeg laus hauv Pawg Ntseeg. Qhov uas sib pab ntawm ob tiam neeg ua rau muaj kev hlub, txhim tsa kom loj hlob hauv Pawg Ntseeg thiab nrog tej neeg sawvdaws.
Thov Vajtswv,
Vajtswv, thov Koj zam txim rau nyuam yaus vim qee zaus nyuam yaus ua rau muaj tej kev sib faib ntawm cov laus thiab cov hluas. Thov Koj pub kom nyuam yaus muaj kev hlub, kev txawj ntse thiab txo hwjchim ua neej nrog txhua hom neeg kom muaj kev sib raug zoo ntawm cov laus thiab cov hluas, sib koomtes ua tus Tswv tes haujlwm. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb puas saib taus, lees yuav, thiab txhim tsa cov neeg uas muaj hnubnyoog sib txawv nrog yus lawm tau?
Nyeem Vajluskub hauv peb lub xyoo: II Petus 2
Kênh Youtube BHKTHN:
