Philêmôn 1-3
“Pŭn dêh lu bơngai gơh pơm sơlam kơ đe wă kơ lu sư tơhiôk băl, đe gô jô̆ sư kon ‘Bok Kei-Dei.” (Mathiơ 5:9)
Nơ̆r jet tơchĕng pơwao:
– ‘Bok Pôl chih kơthơ Philêmôn kơplah ayơ?
– Lăm tơdrong jang pơm pơhiôk dih băl, sư tơ’bôh jơhngơ̆m hiơ̆k kơ Philêmôn thoi yơ?
– Lu bơ̆n kăl kơ pơm tơdrong kiơ lăm tơdrong jang pơhiôk dih băl?
‘Bok Pôl chih kơthơ Philêmôn âu đei chih dang lăm sơnăm 60.Đ.K, kơplah đe phak sư lăm hnam phak yua kơ tơdrong ‘lơ̆ng Kră Yang Yêsu tơ pơlei Rôm. Ưh kơ thoi lu kơthơ nai ‘bok Pôl ưh kơ đei roi tơbăt sư jơ̆ng ‘bang lăm kơthơ blŭng a sư iŏk đon ala khan sư minh ‘nu bơngai oei lăm hnam phak. Sư ưh kơ đei yua iŏk khan sư jơ̆ng ‘bang na athei đe, mălei sư chih kơthơ gơih kơ ‘bok Philêmôn hăm nơ̆r rơngơp hăm jơhngơ̆m hiôk thoi minh ‘nu bơngai apinh buăl sư sơng iŏk bơngai pơm đĭch. Kơlih kơ thoi noh, na lăm kơthơ pơih blŭng a tơbăt “anăn inh Pôl oei lăm hnam phak yua kơ inh lui kơ Kră Yang Yêsu Krist.” (trong 1a). Tơ lăm hnam phak, sư đei jơ năr tơgŭm ‘bok Ônêsim minh ‘nu bơngai pơm đĭch wă kơdâu klĕnh, lui sơng iŏk Kră Yang. Jơ ‘nâu, na sư chih kơthơ gơih ăn kơ Philêmôn, tơ’ngla ‘bok Ônêsim krao apinh sư mơnat păng sơng iŏk bơngai pơm đĭch ‘nâu. Tơdrong ‘noh wă tơbăt mă khan oei lăm hnam phak pơmat, kư̆m ưh kơ đei pơgăn ‘bok Pôl jang wă pơhiôk kơ bre Ônêsim păng Kră Yang, đơ̆ng noh kư̆m đĭ jơhngơ̆m tơgŭm ‘bok Philêmôn păng Ônêsim wă kơ bre sư hiôk dih băl.
‘Bok Pôl oei lăm hnam phak, sư kư̆m minh ‘nu bơngai pơgơ̆r gah bơhngol, sư tơ’bôh jơhngơ̆m hiơ̆k bơngơ̆t kơ Philêmôn păng lu bơngai juăt păng sư (trong 2a). Đơ̆ng tơdrong krao khan rai tơ’bôh tơdrong pơma dơnuh păng jơhngơ̆m hiơ̆k bơngơ̆t ‘bok Pôl lăm tơdrong hơpơi ‘maih pơhiôk dih băl “Nhi krao khan apinh ‘Bă tơm bơ̆n ‘Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling lang.” (trong 3). Sư krao khan kơ Philêmôn păng lu bơngai juăt păng sư đei tơdrong hơđơ̆ng tơpă lăm tơdrong dŏng pơklaih đơ̆ng ‘Bok Kei-Dei păng Kră Yang Yêsu Krist. ‘Nâu bơih tơdrong pŭn đơ̆ng rŏng kơ pơhiôk hăm ‘Bok Kei-Dei.
Kră Yang Yêsu khan: “Pŭn dêh lu bơngai gơh pơm sơlam kơ đe wă kơ lu sư tơhiôk băl, đe gô jô̆ sư kon ‘Bok Kei-Dei.” (Mathiơ 5:9). Đơ̆ng noh, jơ kon ‘Bok Kei-Dei, lu bơ̆n athei pŭ iŏk đĭ jơhngơ̆m pran, tơgŭm ‘nhŏng oh hiôk hăm ‘Bok Kei-Dei păng tơduă. Pơm ‘long sơlam pơhiôk dih băl noh minh tơdrong jang kăl kơ pŭ iŏk, pơyơ̆r akâu iŏk đon ala, kĕ chơ̆n. Phŏ kư̆m đei tơdrong jang pơhiôk dih băl, kư̆m pơma chrih dih băl, roi sa, jô̆ jâu hiong răm jên tơmam… mălei ‘nâu tơdrong jang kăl yua wă tơgŭm bơngai lui pôm jơhngơ̆m păng wơ̆ tơ̆l jrŭ să sư dang yơ. Păng ‘nâu bơih minh lăm lơ tơdrong pŭn đơ̆ng Kră Yang bơtho tơ’bôh lăm ‘bai bơtho tơ kơpal kông. Apinh Kră Yang ăn kơ rim ‘nu lu bơ̆n ‘nĕ kơ tơklah dih băl păng ưh kơ hiôk dih băl. Mălei bơ̆n athei pơm sơlam pơhiôk dih băl đĕch.
Ơ Kră Yang mă ‘mêm mơnat. Inh bơnê kơ Ih yua kơ inh jing kon Ih, đei hiôk hăm Ih păng tơduă lu nhôn. Apinh Ih ăn kơ jơhngơ̆m pran inh arih đei pơhiôk dih băl păng gơh tơgŭm lu ‘nhŏng oh nhôn. Krao khan yua anăn Kră Yang Yêsu Krist, Amen.
Lu bơ̆n gô yak hlôi đơ̆ng tơdrong pơgăn ayơ wă kơ tơdrong jang pơm ‘long sơlam pơhiôk dih băl?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 28
Kênh Youtube BHKTHN:
