Rôm 13:8-10
“Tơdrong bơ̆n hre kơ đe, bơ̆n athei jah ăn na jah tôch. Mă gah tơdrong ‘mêm kơ bôl buăl ưh kơ tôch ôh. Bơngai bu ‘mêm kơ bôl buăl, bơngai noh ưh kơ hŭt ôh dôm tơdrong juăt ‘Bok Kei-Dei pơkă.”
(Rôm 13:8)
Nơ̆r jet tơchĕng pơwao:
– ‘Bok Pôl khan liơ kơplah pơma kơ “tơdrong ‘mêm kơ bôl buăl ưh kơ tôch ôh”?
– Pơm thoi yơ tơdrong ‘mêm gơh pơm kiơ̆ khôi juăt?
– Tơdrong ‘mêm đei gĭt thoi yơ lăm tơdrong arih ih?
‘Bok Pôl bơtho tơdrong bơ̆n hre kơ đe, bơ̆n athei jah ăn na jah tôch. Mă khan lei ră, sư bơtho tơdrong ‘mêm kơ bôl buăl ưh kơ tôch ôh (trong 8). Minh ‘nu bơngai đei “HRE” lei na trŏ kơ “ĂN”. Rim ‘nu bơngai đei sơng iŏk Kră Yang Yêsu bơih minh tơdrong ‘mêm tih, tơdrong ‘mêm Sư ro ưh kơ tôch lăm tơdorng arih tơ rim ‘nu lu kon Sư. Bơ̆n ưh kơ đei layơ ‘mêm kơ Kră Yang trŏ thoi tơdrong ‘mêm Sư ‘mêm kơ bơ̆n, kơlih kơ thoi ei, rim ‘nu kơ bơ̆n tă kơ hre kơ Kră Yang gah tơdrong ‘mêm. Arih rai đunh sot tơ kơpal teh, bơ̆n rai hre kơ Kră Yang lơ hloh gah tơdrong ‘mêm mơnat dih băl, arih tơ’bôh tơdrong ‘mêm tơduă kon bơngai mă thoi rup Kră Yang, mă khan bơngai lui kơ Kră Yang păng lu bơngai tam mă lui. ‘Bok Pôl khan hơđăl, bu ‘mêm kơ Kră Yang ‘mêm kơ bôl buăl, ‘noh bơih pơm kiơ̆ Khôi juăt Kră Yang đei bơtho, “mêm kơ ‘Bok Kei-Dei, ‘mêm kơ bôl buăl” (Mathiơ 22:37-40). Đĭ đăng dôm Khôi juăt tơm kăl Kră Yang gơh pơm ăn tơduă kon bơngai lăm Mơjĭt khôi juăt ‘Bok Kei-Dei đei ăn kơ kon pơlei: “Tơdrong juăt ‘Bok Kei-Dei pơkă sơ̆ thoi âu: Iĕm ‘nĕ plah klo kăn đe, ‘nĕ pơlôch bơngai, ‘nĕ kơ tơtông, ‘nĕ kơ ‘nhĕng mŭk tơmam đe, mă tơdrong juăt nai kư̆m thoi tơdrong juăt Sư pơkă âu: Athei ‘mêm kơ bôl buăl thoi iĕm ‘mêm akâu kơdih.” (trong 9).
Mă khan bơ̆n bơngai thoi yơ hĭ kư̆m ưh kơ đei bu areh achăng lê̆ bơ̆n, wă pơm pơrăm kơdih akâu bơ̆n, mălei bơ̆n ling lang chă trong wă ba ăn kơ bơ̆n đei tơdrong arih tôm mah, chơt hiôk păng rơnŭk rơnua hloh. Dah bơ̆n ‘mêm kơ bôl buăl thoi bơ̆n ‘mêm kơ akâu kơdih, bơ̆n ưh kơ đei layơ wă pơm pơrăm lu sư gah sĕch akar, jơhngơ̆m păng bơhngol. Bơ̆n ‘nĕ kơ pơjĭp yua iŏk ‘nhŏng oh wă pơm tơdrong đei lơi yua ăn kơdih, mălei athei pơm tơdrong kiơ mă gơh đei lơi yua ăn kơ bơngai nai. Ling lang tơgŭm dih băl ưh kơ achăng băl ôh. Tơdrong ‘mêm tơpăt tơpă, ưh kơ lăng kơdih gô chông bơtho tơ’bôh kơ bơ̆n đei tơdrong arih ‘lơ̆ng hơiă hăm rim bơngai. Păng thoi ei, bơ̆n pơm kiơ̆ khôi juăt bơih.
Bơ̆n tơ’blŏk kơ bơngai lui jơ̆ bơngai yoch đei Kră Yang Yêsu huai iŏk păng tơplih wă kơ jing thoi Kră Yang hloh. Arih ‘mêm mơnat noh tơdra tơbăt bơ̆n kon Kră Yang ‘Bok Kei-Dei tơpă, lu bơngai mă pơm kiơ̆ khôi juăt.
Kơkuh kơ Ih ơ Kră Yang, inh bơnê kơ Ih yua kơ Ih đei ‘mêm kơ inh wă kơ inh arih băt ‘mêm mơnat! Apinh đơ̆ng dôm nơ̆r pơma, tơdrong jang păng tơdrong tơchĕng inh tơ’bôh tơdrong ‘mêm Ih, wă kơ inh gơh pơm kiơ̆ trŏ khôi juăt păng ba tơdrong ưang Anăn Ih, krao khan yua anăn Kră Yang Yêsu Krist, Amen!
Lu bơ̆n oei pơm kiơ wă ăn keh hre kơ tơdrong ‘mêm dih băl lăm tơdrong arih rim năr?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 4
Kênh Youtube BHKTHN:
