Tĭt 2:9-10
“Gah bơngai đĭch, lu bơngai khul iĕm lu mơ’nah đĭch đe, sư athei lui yom kơ yŏng tơ’ngla sư…” (Tĭt 2:9a)
Nơ̆r jet tơchĕng pơwao:
– Pôl bơtho kơ Tĭt athei sư bơtho kơ bơngai lui arih thoi yơ păng weh đơ̆ng tơdrong kiơ?
– Đei yua đơ̆ng tơdrong arih ‘noh tơdrong kiơ?
– ‘Bai pơhrăm ‘nâu yua iŏk kơ bơ̆n thoi yơ?
Nơ̆r “đĭch đam” lăm âu wă pơma kơ bơngai đĭch, lăm chăl Rôm sơ̆, bơngai yŏng Tơ’ngla gơh pơgơ̆r ‘noh lu đĭch đam sư. Pôl bơtho kơ Tĭt athei đei nơ̆r bơtho “Tơdrong ‘Bok Kei-Dei mă trŏ hŏ” (Tĭt 2:1) wă kơ lu bơngai đĭch noh bơih bơngai lui đei tơdrong arih sa “Lui pơm ‘lơ̆ng thoi noh, na sư khan tơdrong bơ̆n bơtho tơdrong ‘Bok Kei-Dei ‘lơ̆ng tơpă, tơdrong ‘Bok Kei-Dei wă pơklaih đĭ bơngai đơ̆ng tơdrong yoch” (trong 10).
Lu bơngai đĭch chăl adrol sơ̆ đei tơdrong đe pơm kơnê̆, pơgŏ jang hrat đơ̆ng yŏng tơ’ngla. Tơplih lăm tơdrong ayăt plơ̆, lu sư athei tơ’bôh tơdrong arih Bơngai Lui hăm yŏng tơ’ngla. Lu sư kăl kơ pơm pêng tơdrong: Mă mônh, Athei chu kiơ̆. “Lu bơngai đĭch athei chu kơ yŏng tơ’ngla”, wă khan chu kiơ̆ nơ̆r, chu kơ yŏng tơ’ngla mă khan yŏng tơ’ngla pơm kơ sư thoi yơ hĭ athei tơ’bôh tơdrong arih Bơngai Lui ‘noh chu kiơ̆. Mă ‘bar, Lu sư kư̆m “bơ̆jang mă ‘lơ̆ng wă kơ yŏng sư lăp đon”. Đĭch đam athei đĭ jơhngơ̆m pơm mă ‘lơ̆ng dôm tơdrong jang yŏng tơ’ngla sư pơjao wă kơ yŏng sư lăp. Mă pêng, Athei tơnăp. “Sư athei pơm ‘lơ̆ng tơpăt păng yŏng tơ’ngla sư ling lang”. Đĭch đam athei pơm ‘lơ̆ng tơpăt “yua kơ iĕm jang wă pơhiôk yŏng bơ̆n Yêsu Krist, ưh kơsĭ iĕm jang wă pơhiôk kon bơngai đĕch ôh.” (Kôlôssê 3:23).
‘Nguaih kơ noh dơ̆ng, lu bơngai đĭch kư̆m đei bơtho athei weh đơ̆ng ‘bar tơdrong: Mă mônh “’Nĕ hil plơ̆ kơ yŏng sư. Lăm chăl ‘noh sơ̆ yŏng tơ’ngla lăng đĭch sư nhen thoi tơmam sư wă yua mơ̆ng kơ sư wă. Dah yŏng tơ’ngla tơpăt, pơgŏ pơđep kư̆ kă lei ‘bônh dêh pơm kơ đĭch đam đei tơdrong pơhlŭ ‘maih hil plơ̆ kơ yŏng sư hloh kơ tơdrong chu yom. Đĭch đam noh bơih Bơngai Lui kăl kơ tơ’bôh jơhngơ̆m chu yom kiơ̆ kơ nơ̆r, ‘nĕ kơ arăng kơ̆l hil plơ̆ yua kơ tơdrong noh ưh kơ yua kiơ ôh. Mă ‘bar, “păng ‘nĕ kơ tơtông tơmam yŏng sư” đei bơngai đĭch mơ’nah yŏng sư pơjao wei tơmam. Lơ bơngai ‘bônh dêh đei jơhngơ̆m ham hloh kơ tơpăt wă wei tơmam ăn kơ yŏng tơ’ngla sư. Mălei dah minh ‘nu Bơngai Lui tơtông, mă khan yua kơ tơdrong kiơ noh ră, tơdrong noh kư̆m ưh kơ ‘lơ̆ng ‘bơ̆t anăp Kră Yang yua kơ đei pơm glăi hăm khôi juăt “’Nĕ kơ tơtông klĕ” (LĐ Êyiptơ 20:15).
Lĕch đơ̆ng kơplah bơngai đĭch arih trŏ hăm nơ̆r bơtho “đon lui” ‘noh tơdrong lui kơ ‘Bok Kei-Dei, hơdah kơ tôm tơdrong, lu bơngai yŏng tơ’ngla gô ‘bôh tơdrong phara lăm tơdrong arih đơ̆ng đĭch đam mă Lui. Gah lu bơngai đĭch ưh kơ đei arih pơmat ôh dah arih trŏ thoi nơ̆r Kră Yang bơtho, yua kơ ‘Bok Kei-Dei bơih Tơ’ngla gô ăn tơmam apah kơ lu sư (Hêbrơ 11:6).
‘Bai pơhrăm ‘nâu gô tơ’blŏk rim ‘nu kơ lu bơ̆n dang ei, yua kơ đĭ đăng Bơngai Lui tă kơ đơ̆ng pham Kră Yang huai iŏk ngăl wă kơ bơ̆n đơ̆ng đĭch kơ yang kơnê̆ jing đĭch đam ‘Bok Kei-Dei. Apinh Kră Yang ăn kơ bơ̆n arih chu yom kơ Kră Yang ling lang, tơnăp hăm Kră Yang wă kơ Anăn Kră Yang păng tơdrong lui kơ Sư gơh ưang păng lơ bơngai băt.
Kơkuh kơ Kră Yang, bơnê kơ Ih đei dŏng pơklaih inh wă kơ inh jing đĭch đam Ih. Apinh Ih ăn kơ chăl arih inh pơư pơang anăn ‘Bok Kei-Dei lăm tôm tơdrong, păng đơ̆ng tơdrong arih inh lơ bơngai băt păng lui kơ Ih. Krao khan yua anăn Yêsu Krist, Amen!
Bơ̆n arih hăm trŏ thoi đĭch đam Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 24
Kênh Youtube BHKTHN:
