Nêhêmi 1:4-11
“Ơ Kră Yang! Apinh Ih pơgling đon mơ̆ng nơ̆r lu đĭch đam Ih krao apinh păng krao chă, lu bơngai mă đĭ jơhngơ̆m hli yom kơ Anăn Ih…”(Nêhêmi 1:11a)
Nơ̆r jet tơchĕng pơwao:
– ‘Bok Nêhêmi đei pơm kiơ kơplah kơtơ̆ng tơdrong chhur nuih gah adrĕch sư kơdih?
– Nơ̆r sư krao khan tang đei dôm tơdrong kiơ?
– Jơhngơ̆m bơ̆n thoi yơ kơplah bơ̆n krao khan tang kơ bơngai nai?
‘Bok Nêhêmi sư bơngai Juđê lăm jơhnơr mă ‘bar oei tơ Babylôn. Sư pơm tih oei jang ăn kơ pơtao. Mă khan tơpŭ kơ sư tơ dêh char đe păng sư wơ̆ ‘lŏ tơ noh, mălei jơhngơ̆m sư oei tơchĕng ‘blŏk kơ pơlei sư kơdih mưh đei bơngai đơ̆ng pơlei Jêrusalem truh, sư jet gia hloi păng gơh băt kơ lu bơngai Isơrael oei oei tơ noh arih lăm tơdrong pơmat tat dêh, dur pơlei pơchah răm, sư jĭ jơhngơ̆m, sơ’ngon păng nhơ̆m grong lăm hơdôm năr, na ơ̆t kơ sŏng sa păng krao khan kơ Kră Yang ‘Bok Kei-Dei tơgŭm kon pơlei sư.
Mă jơhngơ̆m sư ưh kơ hiôk kơ tơdrong truh kơ kon pơlei sư, ‘bok Nêhêmi ưh kơ hăt hot pơm kiơ̆ kơdih sư ôh, mălei hơdrol hloh sư năm ‘bơ̆t anăp Kră Yang, lăm tơdrong krao khan, pơih nơ̆r krao khan blŭng a sư, bơnê ư-ang tơdrong ‘lơ̆ng Kră Yang păng băt tơpă kơ Kră Yang sư bu. Sư apinh Kră Yang mơ̆ng nơ̆r sư krao khan (trong5-6). Đơ̆ng noh, sư roi tơdrong yoch kon pơlei sư păng tơdrong yoch sư kơdih, sư tơ’blŏk nơ̆r Kră Yang pơkă (trong 7-9). Sư kư̆m tơ’blŏk tơdrong mơnat đơ̆ng Kră Yang dŏng pơklaih kon pơlei Isơrael, păng mă hơtuch minh wơ̆t dơ̆ng, sư apinh Kră Yang mơ̆ng nơ̆r krao khan lu bơngai mă hli yom kơ sư (trong 10-11). Nơ̆r krao khan ‘bok Nêhêmi jơ̆ minh tơdrong ‘lơ̆ng dêh, roi tơdrong tih tin Kră Yang ‘Bok Kei-Dei, roi tơdrong yoch păng tơbral, đơ̆ng noh pơtôch nơ̆r hăm nơ̆r krao khan apinh dŏng tơgŭm. Tơdrong mă trŏ kơ bơ̆n tơchĕng iŏk noh jơ̆ nơ̆r sư krao khan blŭng a ưh kơ thar krao apinh dŏng tơgŭm hloi ôh, mălei hơdrol hloh sư roi gah Kră Yang ‘Bok Kei-Dei jơ̆ Tơ’ngla mă tih hloh păng trŏ kơ bơ̆n hli yom. Sư kư̆m tơ’bôh khan Kră Yang ‘Bok Kei-Dei wei nơ̆r pơgơ̆p Sư păng ‘mêm mơnat kơ lu đe bu mă ‘mêm kơ Sư. ‘Nguaih kơ noh, sư roi tơdrong yoch kon pơlei Isơrael păng tơdrong yoch kơdih sư. ‘Nâu bơih tơ’bôh nơ̆r krao khan minh ‘nu bơngai hli yom kơ Kră Yang tơpă.
Ahrei âu mưh bơ̆n krao khan tang athei băt kơnăl tơpă kơ Tơ’ngla mă bơ̆n krao chă, ưh kơ trŏ rup yang ưh kơ băt tơchĕng ôh. Sư bơih Kră Yang ‘Bok Kei-Dei mơsêh mơyang gơh pơm tôm tơdrong ‘lơ̆ng tơpăt, ‘mêm mơnat păng kư̆m băt kơdih bơngai yoch na tơbral roi kơ Kră Yang dôm tơdrong yoch, ‘nguaih kơ noh bơ̆n ‘blŏk kơ dôm nơ̆r Kră Yang ‘Bok Kei-Dei đei pơkă lăm sơ̆p hla bơar Sư păng krao apinh Sư noh jơ̆ tơ’bôh jơhngơ̆m bơ̆n lui kơ Tơ’ngla mă bơ̆n krao khan tơgŭm bơ̆n đĭ jơhngơ̆m lui gơnang kơ Sư păng krao chă tơdrong dŏng tơgŭm đơ̆ng Kră Yang lăm nơ̆r bơ̆n krao khan tang, hơdrol kơ bơ̆n wă pơm jang tơdrong kiơ.
Bơ̆n hăm juăt krao khan tơgŭm kơ ‘nhŏng oh bơ̆n ưh?
Ơ Kră Yang apinh Ih tơgŭm inh pơhrăm kiơ̆ rok ‘bok Nêhêmi lăm tơdrong krao khan tang bơngai nai. Apinh tơ’blŏk kơ inh băt kơnăl tơpă kơ Kră Yang jơ̆ Tơ’ngla mơsêh gơh pơm tôm tơdrong păng trŏ kơ hli yom wă kơ inh krao khan đĭ jơhngơ̆m, krao khan tang hăm jơhngơ̆m lui ngeh kơ Kră Yang gô tơl tơwih, krao khan yua anăn Kră Yang Yêsu Krist, Amen.
Đŏk Sơ̆p hla bơar ‘Bok Kei-Dei lăm pêng sơnăm: II Samuel 3.
Kênh Youtube BHKTHN:
