Mathiơ 28:5-7
“Dang ei Sư ưh pă oei tơ âu boih yua kơ Sư iung arih thoi Sư khan hmă. Tơ̆ng biĕm ưh kơ lui apinh biĕm năm lăng anih đêl đe tơ’bĭch Sư âu. Na dang ei biĕm năm hloi tơ lu bơngai pơhrăm păng Sư, khan kơ lu sư thoi âu: ‘’Bok Kei-Dei tơiung arih Sư đơ̆ng lôch boih…” (Mathiơ 28:6-7a)
Nơ̆r jet tơchĕng pơwao:
– Yua kơ kiơ drŏkăn bơngai pơhrăm păng Kră Yang năm lăng atâu Sư?
– Đang kơ lăng ‘bôh bơsat hoh, lu bơngai drŏkăn ‘nâu pơm kiơ?
– Tơchĕng lăng, đei bơtho kơ bơ̆n păng tơ’blŏk kơ bơ̆n thoi yơ kơplah lăng tơ anih đêl đe tơ’bĭch Kră Yang?
Lăm bơsat măng mu, tơngiĕt, ‘noh anih đe tơ’bĭch atâu Kră Yang. Anih ‘noh ‘bĕnh tơdrong lôch. Păng kư̆m anih ưh pă hơmĕng, jĭ pơmat păng hli hlơt. Mălei lăm năr tơpơh Kră Yang iung arih, lu linh jang ‘lơ̆ng khan kơ bre drŏkăn năm lăng anih đêl đe tơ’bĭch Sư. Atâu ưh pă ‘bôh ‘bơ̆t doh bơih. Anih ‘nâu ưh kơ đei kiơ păng jing tơdra tơbăt tơdrong Sư iung arih bơih. Kră Yang iung arih bơih, lĕch đơ̆ng bơsat. Bre drŏkăn linh jang athei bre sư năm lăng anih mă đêl đe tơ’bĭch Kră Yang wă kơ băt hơđăl păng đơ̆ng noh “Na dang ei biĕm năm hloi tơ lu bơngai pơhrăm păng Sư khan kơ lu sư thoi âu: ‘Bok Kei-Dei tơiung arih Sư đơ̆ng lôch bơih” (trong 7a). Jơ năr sơ’ngon hlôi bơih, dang ei trŏ kơ Sư wă wih hăm tơdrong arih, hăm khul tơpôl, wă ră roi Tơdrong ‘Nao ‘Lơ̆ng Kră Yang iung arih.
Rŏ lăng lăm tơdrong arih bơ̆n, bơ̆n kư̆m mơn nhen thoi dơ̆ng tơ lăm bơsat, hăm tơdrong jĭ pơmat, trăp trĭn, chhur nuih pơsĕl, ưh pă hơmĕng. Phĕt ‘blŏk kơ Kră Yang iung arih sơnăm ‘nâu, rim ‘nu kơ bơ̆n athei năm tơ anih đêl đe tơ’bĭch Kră Yang, wă kơ ‘bôh băt tơm kăl đei hơmet đang bơih. Mă tơdrong lôch Sư kư̆m kĕ jei bơih, lei na ưh kơ đei tơdrong kiơ anat hăm Sư?
Dang ei, dah đei “Bơsat” măng mu tơngiĕt ayơ mă bơ̆n oei bơwei lăm jơhngơ̆m, apinh ‘nĕ kơ hiơt đei bơsat mă đêl đe tơ’bĭch atâu Kră Yang – mălei dang ei, bơsat ‘noh bơsat hoh đĕch. Bơsat ‘noh hoh yua đơ̆ng Kră Yang oei arih. Bơsat ‘noh hoh yua kơ noh wă tơdra tơbăt tơdrong kĕ jei lăm anăn Kră Yang Yêsu.
Athei năm lăng bĕ anih đêl đe tơ’bĭch Sư păng đơ̆ng noh wih brŏk ră roi tơdrong chơt hiôk ‘nâu. Kră Yang Yêsu iung arih đơ̆ng lôch noh tơdrong tơpăt kăl kơ roi tơbăt wă kơ rim bơngai băt gah tơdrong hơmĕng lăm tơdrong arih. Kră Yang Yêsu dang ei oei arih ‘noh tơdrong chơt hiôk kăl kơ roi tơbăt wă kơ kon bơngai băt Kră Yang oei hiơ̆k bơngơ̆t Kră Yang lăng ‘bôh Sư. Kră Yang wă oei hơdai lu đe bu mă sơng iŏk Sư lăm trong brŏk tơ pơlei ‘lơ̆ng.
Anih đêl đe tơ’bĭch Kră Yang Yêsu jing tơdrong tơplih đơ̆ng tơdrong mơsêh Kră Yang iung arih. Anih bơsat măng mu tơngiĕt dang ei jing anih ‘bĕnh blai tơdrong hơmĕng, tơdrong ‘mêm păng pơđĭ nơ̆r tơ’blŏk gah tơdrong jang ră roi.
Kơkuh kơ Ih Kră Yang, kơplah tơchĕng pơwao gah tơdrong Kră Yang iung arih, apinh Ih tơgŭm kơ inh băt gah bơsat hoh, anih tơ’bôh tơdrong kĕ jei păng tơdrong mơsêh tơplih. Apinh Ih tơgŭm inh băt hơmet dôm “bơsat” mă inh oei bơwei lăm jơhngơ̆m, tuh ‘bĕnh tơdrong lui păng tơdrong hơmĕng, wă kơ inh jing pran lăm Kră Yang. Apinh Ih tơgŭm wă kơ inh adrin năm ră roi tơdrong chơt hiôk Kră Yang iung arih kơ lơ bơngai. Krao khan yua anăn Kră Yang Yêsu Krist, Amen.
Bơ̆n hăm wă lĕch đơ̆ng bơsat păng ră roi tơdrong chơt hiôk Kră Yang iung arih dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 13
Kênh Youtube BHKTHN:
